Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Simon se aandele-wenke
10 September 2021

Simon Brown is die stigter en direkteur van die beleggingswebwerf JustOneLap.com en ’n kenner van die aandeelmarkte. In dié rubriek deel hy sy insigte in van die onlangse groot gebeure op die markte.

MASSMART

Verkoop en koop

Massmart het aangekondig dat hy besig is met onderhandelinge om ’n beherende belang in OneCart te koop en sodoende aanduidings gegee van sy langtermynstrategie.

Die moedermaatskappy Walmart ding regstreeks mee teen Amazon in Amerika, en hulle het ’n meerderheidsbelang in die Indiese Flipkart, waarvan Walmart in 2018 beheer gekry het.

Dis duidelik dat Massmart op plaaslike kleinhandel konsentreer, en Walmart sal goeie tegnologiese ondersteuning en insigte bied wat, tesame met OneCart, kan beteken dat die maatskappy ’n belangrike deelnemer aan die steeds jong aanlyn kleinhandelsbedryf in Suid-Afrika word.

Massmart laat vaar beheer oor etlike ondernemings met laer marges omdat hy Cambridge Food, Rhino en Massfresh aan Shoprite* verkoop. Die transaksie is R1,4 miljard werd wat Shoprite maklik kan bekostig en wat Massmart sal toelaat om skuld af te betaal. Shoprite kan hierdie verliesmakende besighede aan sy verspreidingsnetwerk koppel en behoort vinnig wins te kan verdien.

Shoprite sal die winkelkettings waarskynlik mettertyd in bestaande Shoprite-handelsmerke opneem. Die transaksie sluit ook 43 aangrensende drankwinkels in. Die totale omset van die winkels was verlede jaar amper R11 miljard.

As ons aanvaar dat dit R600 miljoen sal kos om gelyk te breek met die verkryging (waarskynlik minder) en as Shoprite bedryfsmarges van sowat 4% kan behaal, sal hulle ongeveer R440 miljoen verdien, wat beteken dat Shoprite teen ’n prys-tot-verdienste-verhouding (p/v-verhouding) van net meer as drie maal koop – baie voordelig vir Shoprite.


SIBANYE-STILLWATER

Gesonde resultate

Sibanye-Stillwater* het op 26 Augustus halfjaarresultate tot 30 Junie gepubliseer wat so sterk was as wat verwag is. Die maatskappy het ’n dividend van 292c per aandeel (’n dividendopbrengs van ongeveer 10% op ’n jaargrondslag) verklaar, terwyl die wesensverdienste per aandeel (WVPA) van 843c die aandeel op ’n toekomstige p/v van minder as vier maal plaas.

Ek sou ’n groter dividendbetaling wou gesien het, maar die maatskappy het ná die einde van die finansiële tydperk R5 miljard se korporatiewe effekte teruggekoop en ’n aandeelterugkoopprogram van R9,6 miljard voortgesit. Die maatskappy bly my voorkeur-PGM-aandeel, en teen huidige pryse is hy baie goedkoop, al het PGM-pryse effens gedaal.


PURPLE GROUP

Serialong nou ’n beduidende aandeelhouer

In September 2018 het die Serialong Trust onder leiding van Bonang Mohale R25 miljoen aan Purple Group* geleen. Die voorwaardes was dat 30% van die rente betaal moet word terwyl die saldo gekapitaliseer moet word en voor einde Augustus vanjaar in Purple Group-aandele omgeskakel kan word teen 22,87c – die gemiddelde prys oor 30 dae voordat die lening uitgereik is.

Serialong het gekies dat die lening in aandele omgeskakel moet word en besit dus nou 11,46% van die Purple Group. Dit is ’n massiewe wins, aangesien die R25 miljoen nou R189 miljoen werd is. Serialong word nou saam met Firefly (wat in Junie byna die helfte van die stigter Mark Barnes se aandele gekoop het) twee belangrike nuwe aandeelhouers in die onderneming.


NASPERS

Omruiling afgehandel

Die Naspers-** en Prosus -aandeelomruiling is gesluit en is oorvolskryf. Dit beteken dat die volle 49% van Naspers-aandele verruil is vir nuwe Prosus-aandele. Dit het die JSE geknak omdat daar groot verkope deur passiewe houers teen marksluiting op Dinsdag, 17 Augustus, was.

Die waarde van verhandelde aandele was bykans R150 miljard, byna dubbel die vorige daaglikse rekord, en die beurs kon die transaksies nie betyds verwerk nie.

Die beurs het gevolglik op Woensdag eers om 14:30 geopen. Die plan hier was om Naspers se indekskonsentrasie op SA indekse te verminder, en dit het tot ’n mate gewerk. Naspers was 17,14% en Prosus onder 2% van die FTSE/JSE se top-40 einde Junie, en is nou onderskeidelik 7,93% en 8,93%, gesamentlik – af van byna 20% tot 16%. BHP* is nou die grootste aandeel met 13,3%, Richemont is volgende met 12,3%, gevolg deur Anglo American met 11,2%.


STEENKOOLMYNE

Resultate sterk te midde van klimaatverslag

Die Verenigde Nasies se klimaatsverslag, bied heelwat te denke en is op lang termyn belangrik vir verskeie van ons genoteerde entiteite – en hier is die steenkoolmyne Exxaro en Thungela Resources in die kollig. Maar in albei gevalle voer hulle uit na markte met betreklik nuwe steenkoolaangedrewe kragstasies en hoë ekonomiese groei.

Hoewel daar druk op hulle is, sal dit waarskynlik egter nog baie dekades wees voordat dié markte minder belangrik begin word. Intussen het albei maatskappye sterk resultate aangemeld, selfs al het probleme met Transnet se spoorlyn na die Richardsbaaise steenkooleindpunt (RBCT) hul vermoë om hul uitvoer uit die land te kry, belemmer.

Thungela verhandel nou teen meer as 6 000c per aandeel nadat hy net bo 2 000c per aandeel genoteer het. By die notering het ek van die waardasie gehou, maar hy is nou redelik duur, en ek sal nie op die huidige vlak nuwe aandele koop nie.


ARB HOLDINGS

Wins maak dit moeite werd

ARB Holdings se resultate vir die jaar geëindig Junie, wat op 19 Augustus vrygestel is, het WVPA van 82,49c behaal, hoër as verlede jaar, en ook 41,7% hoër as 2019, wat dit sy beste jaar ooit maak. Hy het wel sy beligtingsafdeling vergroot, wat die syfer in sy guns verdraai het, maar daar was ook ’n dividend van 32,5c per aandeel en ’n spesiale dividend van 10c, wat die aandeel op ’n dividendopbrengs van 8% geplaas het.

Hoër koperpryse het winsgewendheid effens benadeel, maar sy kabelbesigheid is goed geposisioneer, veral met die nuwe kragopwekking van 100 MW in die vooruitsig. Dis ’n aandeel van hoë gehalte, met uitstekende bestuur en die moeite werd om te oorweeg deur almal wat blootstelling wil hê aan SA aandele met die meeste van hul aktiwiteite plaaslik, veral in die infrastruktuur.


CURRO

Teleurstellende verslagkaart

Die grootste kommer is dat ouer skole, wat voller as nuwe skole is, slegs opbrengs van ongeveer 30% lewer.

Curro se finansiële resultate vir die ses maande geëindig Junie, wat op 18 Augustus bekendgemaak is, was ’n teleurstelling. Die regte-uitgifte van R1,5 miljard verlede jaar het die aantal aandele met 42% verhoog, maar Curro het steeds skuld van ongeveer R4,4 miljard. WVPA vir die tydperk het met 49% gedaal, terwyl die maatskappy 7% uit nuwe leerlinge bygevoeg het. Die maatskappy se inkomste het met 12% gestyg.

Die grootste kommer is dat ouer skole, wat voller as nuwe skole is, slegs opbrengs van ongeveer 30% lewer. Dit is deels te wyte aan die wanbetaling van gelde wat die maatskappy na verwagting vanjaar ongeveer R62 miljoen sal kos, terwyl Curro steeds afslag aan ouers bied. Ek besit ADvTECH*, en sy resultate op 31 Augustus sal waarskynlik baie beter wees ná ’n sterk handelsverslag wat verwag dat WVPA ongeveer 30% hoër sal wees.


METAIR

Energie kan ’n hupstoot gee

Metair het ook die beste ses maande ooit gehad, met WVPA tot einde Junie van 170c, vergeleke met ’n wesensverlies van 56c in die ooreenstemmende tydperk. Die resultate is op 19 Augustus bekendgemaak.

Hy sal baat vind by die toenemende vermoë in die uitvoermotorsektor, maar ek is bekommerd dat hy ’n agterstand in energieberging het. Hy het uitstekende aan/af-tegnologie in sy Europese bedrywighede, maar hy is agter in die litium-ioonbatterysektor, noudat elektriese voertuie meer verkoop word. Maar dit is nog ’n jong sektor, en as die maatskappy ’n goeie strategie vir litium-ioonenergieopberging kan kry, kan hy groot voordeel uit elektriese voertuie trek.


SASOL

Is hy weer winsgewend?

Sasol se jaarresultate tot 30 Junie, wat op 16 Augustus bekendgemaak is, toon ’n maatskappy wat ineenstorting vermy het. Skuld het aansienlik gedaal, maar nie genoeg vir die maatskappy om ’n dividend te verklaar nie. Die probleem hier is dat dit ’n baie kleiner maatskappy is omdat verskeie bates verkoop moes word.

Simon Brown is die stigter en direkteur van die beleggingswebwerf JustOneLap.com en ’n kenner van die aandeelmarkte. In dié rubriek deel hy sy insigte in van die onlangse groot gebeure op die markte.

Van hierdie voormalige eenhede sal nou produkte aan Sasol verkoop, wat laasgenoemde se marges verminder. Wat vir my die belangrikste is, is die onlangse VN-klimaatsverslag wat Sasol vierkantig in die visier het as ’n beduidende besoedelaar in SA. Ek is nie seker hoe dit gaan uitspeel nie, maar ek sal die situasie dophou as iemand wat nie ’n aandeelhouer is nie.

* terugvoer@finweek.co.za

* Die skrywer besit aandele in ADvTECH, BHP, Sibanye-Stillwater, Shoprite en Purple Group.

** finweek is ’n publikasie van Media24, ’n filiaal van Naspers.

* Foto’s: Argief | Gallo/Getty Images

Meer oor:  Finweek  |  Beleggings  |  Aandele
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.