Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Simon se aandelewenke
21 Junie 2018

Simon Brown is die stigter en direkteur van die beleggingswebwerf JustOneLap.com en ’n kenner van die aandelemarkte. In dié rubriek deel hy sy insigte in van die onlangse groot gebeure op die markte.

Tongaat Hulett: Smaak effens soeter

Tongaat Hulett se resultate was deels flou en deels vreesaanjaend. Grondverkope en die styselafdeling was oninteressant, soos verwag is, met ’n beskeie wins vir albei. Maar suiker was die probleem, en hoewel die maatskappy se produksie gestyg het van 1,056 miljoen ton tot 1,171 miljoen ton, het winste skerp gedaal weens ’n daling in die suikerprys en hoë invoer.

Slegs Zimbabwe kon wins verhoog. Die probleem plaaslik was die vertraagde inwerkingstelling van die invoerbelasting. As gevolg hiervan sien ek baie afgraderings van Tongaat se teikenprys en selfs versoeke om ’n nuwe bestuur. Maar noudat die reën weer begin en suikerproduksie gesond lyk, behoort die invoerbeskermingstariewe beter wins in die volgende finansiële jaar tot die einde van Maart volgende jaar te verseker, en teen minder as 8 000 sent per aandeel stel ek weer belang in hierdie aandeel.

Ek moet erken ek was heeltemal verkeerd met hierdie een toe ek teen ongeveer R114 gekoop het en toe weer verkoop het, want nadat die reën weer begin het, het dit nie die winste gelewer wat ek verwag het nie.

JSE: Beskeie veranderinge

Die JSE het die indeksveranderinge vir hierdie kwartaal, wat op Vrydag 15 Junie in werking tree, aangekondig. Reinet en Imperial verlaat die Top40, terwyl Clicks en Netcare bygevoeg word. Sibanye-Stillwater verlaat die Resi10 en word vervang deur Anglo American Platinum. Fortress A & B is uit die Fini15, terwyl PSG in- kom. En daar is geen verandering in die Indi25 nie.

Star word tot die MidCap-indeks bygevoeg sonder enige verwydering. Algemeen gesproke is hierdie veranderinge beskeie, met slegs die Fini15 s’n noemenswaardig, met eiendom wat vertrek en ’n beheermaatskappy (PSG) wat arriveer en net ’n klein gewigsverandering heel aan die einde van die indeks.

ArcelorMittal se staalwerke in Vanderbijlpark.

ArcelorMittal SA: Verligting van skuldlas

ArcelorMittal SA (Amsa) het aangekondig hy verlaat die gesamentlike onderneming met Macsteel waarin elk 50% besit. Dit behoort ’n netto wins van sowat $220 miljoen vir Amsa te wees, wat sowat R2,75 miljard is. Die maatskappy sit tans op markkapitalisasie van sowat R2,8 miljard. Maar in die jongste resultate aan die einde van Desember verlede jaar het die maatskappy netto lenings (skuld minus kontant) van meer as R3 miljard gehad en was hy verliesmakend. Hoewel die transaksie met Macsteel dus potensieel aantreklik is, bly die maatskappy in ’n baie moeilike en verliesmakende situasie.

Die kontant sal die skuldlas help. Dit verander egter nie die basiese winsgewendheid van die maatskappy nie.

MTN: Aandeelhouers is ongelukkig, maar lui

By MTN se algemene jaarvergadering op 24 Mei het 31,83% van die aanwesige aandeelhouers teen die maatskappy se vergoedingsinwerkingstellingsverslag gestem, en MTN moes dus hieroor in gesprek tree met aandeelhouers. Die stemming is nie bindend nie, maar ’n groot teenstem is nietemin insiggewend. Maar toe MTN daarna ’n telefoniese konferensie vir ontevrede aandeelhouers gehou het, het slegs 0,001% ingeskakel.

Wat het dan met die ander byna 32% ongelukkige aandeelhouers gebeur? Sommige stemme teen die verslag is moontlik protesstemme en klein aandeelhouers, maar jy kry nie meer as 30% teenstemme sonder groot ontevrede aandeelhouers nie; wat toe nie die moeite gedoen het om met die maatskappy in gesprek te tree nie. Dit is lui aktivisme.

Stadio Holdings: Regte-uitgifte waarskynlik

Stadio het die aankoop van amper agt hektaar in Durbanville, Wes-Kaap, aangekondig vir ’n nuwe kampus vir 4 000 tot 5 000 studente. Dit sal in 2021 open. Dit sal ’n duur proses wees en sal amper sekerlik ’n regte-uitgifte verg om die kampus te finansier, maar dit is te wagte, aangesien die maatskappy sy vermoë verhoog met verkrygings en nuwe geboue.

Buitelandse belegging: Wanneer om te verskuif

’n Dalende rand het weer eens my inkomende e-posse se lêer oorstroom met vrae oor die oorplasing van geld na die buiteland. Ek herinner mense dat die tyd om geld na die buiteland oor te plaas (direk of deur beursverhandelde notas [ETN’s] soos NEWUSD) is wanneer die rand goed lyk. Soos ek in die uitgawe van 1 Februarie gesê het, moet jy jou geld verskuif wanneer die rand sterk is en nie wanneer hy baie swak is nie.

Ek stel ook altyd voor dat jy vooraf ’n plan moet hê, sodat jy nie op skielike swakheid reageer nie. Plaas byvoorbeeld rande elke kwartaal oor in dollars, ongeag wisselkoersvlakke. Met ander woorde, moenie reageer nie, volg eerder ’n plan wat ’n verskeidenheid tariewe sal dek. Vermy ’n skielike refleksreaksie uit paniek teen die swakste wisselkoers.

Steinhoff Africa Retail: Oppas vir direksie se manewales

Steinhoff Africa Retail (Star) se resultate was uiteenlopend. Plaaslike handelsmerke Pep en Ackermans het groei van 3,5% in verkope in die ooreenstemmende tydperk behaal, terwyl die onbestendige JD Group se verkope met 7,3% gestyg het, ’n aanduiding dat die bestuur die afdeling reggeruk het.

Maar dit gaan hier meer oor die direksie, met Star as “borg van derdepartyskuld wat verband hou met ’n Pepkor-bestuursbeleggingsmaatskappy” wat R500 miljoen gekos het en ’n verdere R90 miljoen vir ’n kontantbehoudskema. Die stigter van Tekkie Town doen ook aansoek vir die nietigverklaring van die transaksie. Die direksie is ’n gemors. Vir my is dit genoeg rede om weg te bly.

Taste Holdings: Ommeswaai dringend nodig

Taste se resultate was presies so swak as wat die mark verwag het, en daar was feitlik geen kommentaar oor die resultate nie, wat ’n teleurstelling was. Die juweliersware-afdeling se verdienste voor rente, belasting, depresiasie en amortisasie (ebitda) het met meer as die helfte gedaal.

Enige moontlike verkope is dus twyfelagtig of waarskynlik teen ’n enorme afslag. Die vraag is of hulle nou winste kan begin genereer uit die voedselafdeling, hoofsaaklik Starbucks en Domino’s.

Met kontant voorhande af tot R96 miljoen, selfs ná twee regte-uitgiftes gedurende die jaar, moet winste vinnig terugkeer anders sal meer geld nodig wees. Ek dink steeds die meerderheidsaandeelhouers sal die maatskappy waarskynlik wil denoteer, en selfs as hulle dit nie doen nie, moet daar sterk tekens van ’n ommeswaai wees voordat die aandeel belangstelling sal trek.

AVENG: Op die randjie

Aveng het die besonderhede van sy regte-uitgifte aangekondig, en dit is angswekkend. Hy is van plan om R500 miljoen in te samel teen 10 sent per nuwe aandeel, met aandeelhouers wat 1 199,98772 regte per 100 aandele ontvang. Dit verhoog die aantal uitgereikte aandele van sowat 882 miljoen tot meer as 180 miljard. Dit is ’n yslike verdunning. Dit sal waarskynlik ná die regte-uitgifte ook ’n aandeelkonsolidasie beteken, iets wat altyd vir aandeelpryse negatief is.

Boonop word die regte-uitgifte nie onderskryf nie, hoewel aandeelhouers wat 49% van die aandele verteenwoordig hulle daartoe verbind het om hul regte op te neem. Maar daar is ’n werklike risiko dat baie van die oorblywende 51% van die aandeelhouers nie hul regte sal opneem nie, wat op ’n tekort sal uitloop. Maar selfs as Aveng die volle R500 miljoen kry, is dit ’n onderneming op die randjie, en ek sal nie hier ’n aandeelhouer wil wees nie. As dit ek was, sou ek beslis nie my regte opneem nie.

Astoria: Miskien is sluiting beste

Nadat hy ná die aanbod van RECM en Caliber tot ’n hoogtepunt van 1 279 sent herstel het, het Astoria weer tot onder 1 200 sent teruggesak, al is die rand aansienlik swakker. Die maatskappy het ’n Sens uitgereik waarin hy verklaar dat die netto batewaarde (NBW) $1,20 is, wat teen ’n wisselkoers van R13 gelyk is aan 1 560 sent, ’n aansienlike diskonto van meer as 23% op NBW.

Die Sens het gesê hy kyk na ’n “aantal meganismes om waarde vir Astoria-aandeelhouers te ontsluit”. Een manier sou die aanbod van RECM en Caliber wees, maar soos ek in die uitgawe van 24 Mei gesê het, beteken dit steeds ’n yslike diskonto op NBW, aangesien RECM en Caliber se ewigdurende voorkeuraandele teen ’n massiewe afslag van byna 30% verhandel, met baie min likiditeit.

Een manier om aandeelhouerswaarde te ontsluit, is om Astoria te sluit. Verkoop die onderliggende bates en gee die kontant aan aandeelhouers. Dit sal ná koste waarskynlik minstens 1 500 sent per aandeel oplewer.

*Stuur ’n e-pos aan terugvoer@finweek.co.za.

Foto's: Shutterstock; www.arcelormittalsa.com; www.ackermans.co.za

Meer oor:  Aveng  |  Steinhoff  |  Arcelormittal Sa  |  Aandelemening  |  Mtn  |  Finweek  |  Jse  |  Taste Holdings  |  Simon Brown  |  Aandele
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.