Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Simon se aandelewenke
16 Augustus 2018

Verwag ’n goeie dividend later

BHP

BHP* het sy binnelandse Amerikaanse olie- en gasbates vir $10,2 miljard verkoop nadat hy dit in 2011 vir ongeveer $12 miljard gekoop het. Dit is dus nog ’n slegte transaksie, maar dié keer is dit nie ’n algehele ramp nie.

Die maatskappy sê dat sy netto skuld aan die onderpunt van sy teikenstrek is, dus is ’n spesiale dividend moontlik uit die opbrengs van die verkoopstransaksie, wat effens minder as $5 per aandeel verteenwoordig. Ek glo nie ons gaan ’n groot spesiale dividend sien nie, maar ons kan beslis ’n goeie dividend later vanjaar verwag.

- www.bhp.com

Fayetteville-skalie, Arkansas, VSA.

Beste in sy klas

Anglo American Platinum

Anglo American Platinum se resultate het weer eens getoon dat die maatskappy verreweg die beste platinummynfirma is. Hy het laekostebates, is netto kontantpositief en hy verklaar deurlopend dividendbetalings.

Dividende is hervat met die 2017 jaareinde-resultate (nadat hy tussen 2013 en 2017 geen dividende verklaar het nie). Die probleem hier is steeds die platinumprys – totdat ons sien dat die prys van platinumgroepmetale (PGM’s) deurlopend styg, moet die sektor vermy word.

Maar wanneer die PGM’s wel begin styg, sal Amplats ’n maklike keuse wees. Ander aandele bied miskien ’n groter beloning, maar gaan met hoër risiko gepaard.

- www.angloamericanplatinum.com

Die Mogalakwena-myn in Limpopo.

Wag vir die styg-tendens

Intu Properties

Intu Properties se resultate toon ’n verlies van net meer as £500 miljoen, weens eiendomswaardasies wat met £650 miljoen, of 5,6%, op ’n gelykmatige grondslag gedaal het. Die afwaartse herwaardasie word aangedryf deur swakker sentiment in die Britse eiendomsmark.

Die resultate toon wel aanvaarbare huurinkomste van 1,3% en ’n besettingsyfer van 97%. Met ’n genormaliseerde netto batewaarde (GNBW) van £3,09, wat 5 300 sent verteenwoordig en die aandeel wat teen minder as 3 000 sent verhandel, is die diskonto enorm en aantreklik.

Maar wat moet gebeur voor die aandeelprys begin styg en die diskonto tot GNBW begin vernou? Tans nie veel nie. Beleggers moet dus eerder ’n wag-en-sien-benadering volg en begin koop as die tendens stewig hoër is.

Met ’n genormaliseerde netto batewaarde (GNBW) van £3,09, wat 5 300 sent verteenwoordig en die aandeel wat teen minder as 3 000 sent verhandel, is die diskonto enorm en aantreklik.

Kuberkraking hys rooi vlae

Liberty Holdings

Liberty se resultate het nie veel gebied nie, maar dit toon wel dat die daling oor die afgelope paar jaar gestuit is. Die uitdaging is nou om die onderneming te laat groei in ’n uiters mededingende mark waar verbruikers onder druk verkeer en nie juis langtermynversekering koop nie.

Die maatskappy het nie die onlangse kuberkraking genoem nie, wat gebeur het in die tydperk wat die resultate dek. Aandeelhouers en kliënte verdien beter. Ek weet Liberty benadruk aanhoudend dat dit net e-posse en miskien aanhegsels was wat met die binnedringing gesteel is, maar dink net aan die vertroulike persoonlike inligting wat kliënte per e-pos aan ’n langtermynversekeraar stuur.

Dit is nie ’n risikovrye situasie vir kliënte wat geraak is nie – selfs al is geen fondse regstreeks in gevaar gestel nie, is identiteitsbedrog werklik ’n moontlikheid en Liberty behoort aandag daaraan te skenk. In plaas daarvan lyk dit of die maatskappy probeer voorgee dat dit nooit gebeur het nie. Vir my is dit genoeg om van die aandeel weg te bly.

Geleenthede wink

Hulamin

Hulamin

Hulamin het in sy resultate gesê dat met verrekenings wat nou gevestig is, is Chinese uitvoer na Amerika kwaai gekortwiek en is daar beter verkoopsgeleenthede vir Hulamin.

Terselfdertyd kan die maatskappy ook teen beter pryse verkoop omdat dit nie aan tariewe onderworpe is nie. Of dit beduidend vir die maatskappy gaan wees, sal ons metteryd uitvind. Maar selfs dié moontlike goeie nuus sal my nie hier laat belê nie. Koste en valuta is groter kwessies wat teen die maatskappy werk.

Heel oortuigend

Apple

Foto: Shutterstock

Aan die begin van Augustus, het Apple die eerste biljoendollar-aandeel in die wêreld geword. Wat dit selfs merkwaardiger maak, is dat Apple dit teen ’n prys/verdienste-veelvoud (p/v) van ongeveer 18 gedoen het. Amazon het byvoorbeeld ’n p/v van meer as 100 keer.

Dit beteken dat as Apple dieselfde waardasie gehad het, sou hy ’n maatskappy van vyf biljoen dollar gewees het. Ek hou van albei maatskappye, maar Apple bied tans ’n veel beter waardasie, en die jongste stel resultate – in wat tradisioneel ’n stil kwartaal is omdat hy nie nou nuwe produkte het nie – toon hoe sterk die maatskappy is.

Apple het die eerste biljoendollar-aandeel in die wêreld geword.

Goeie resultate, maar mark bly afsydig

Ellies

Ellies se resultate toon wesensverdienste per aandeel (WVPA) van ongeveer 8 sent terwyl die aandeel teen om en by 30 sent verhandel. Dit plaas die maatskappy op ’n p/v van 4 keer.

Die resultate toon dat die maatskappy deur die ergste is, hoewel daar steeds risiko’s en uitdagings is. Toe die maatskappy sy handelsverklaring uitgereik het, het ek voorgestel dat dit die moeite werd was om hom te oorweeg, maar dat resultate belangrik sou wees.

As jy op soek is na ’n spekulatiewe aandeel om te koop, kan dit Ellies wees, maar prysbewegings na die resultate toon dat die mark nie juis belangstel nie. Dit sal dalk nog lank wees voor werklike opwaartse beweging begin, met die volgende resultate wat nog stygings kan ontketen.

Die voorkeurweg

Capital & Counties Property

Capital & Counties Property (Capco) se resultate toon ’n netto batewaarde (NBW) van £3,34, of ongeveer 5 780 sent, terwyl die aandeel laer teen ongeveer 4 700 sent is. Dit het ’n veel kleiner diskonto tot NBW as Intu, met planne om die maatskappy in twee te verdeel om te probeer om waarde te ontsluit.

Wat ons onlangs begin sien het, is dat plaaslik genoteerde eiendomsmaatskappye teen ’n premie op hul NBW verhandel. Hoewel Intu se diskonto veel groter is, is Capco se bates van ’n veel beter gehalte en dit sal die voorkeurtoetrede tot die Britse genoteerde eiendomsmark wees.

Stadig na nêrens op pad

Coronation Fund Managers

Coronation se bestuurde bates (AUM) stagneer steeds. Aan die einde van Junie was sy AUM R602 miljard. Dit is al sedert die 2014 finansiële jaar om en by die R600 miljard-kerf, met ’n hoogtepunt van R617 miljard vir die finansiële jaar geëindig 2017. Die plaaslike mark het oor die tydperk ongeveer dieselfde gevaar – dit gaan stadig nêrens nie. Maar aktiewe bestuurders behoort die mark te klop (dit is hul rede waarom hulle bestaan).

Óf Coronation klop nie die mark nie, óf hy ervaar steeds uitvloeiings van AUM. Per slot van rekening, is die maatskappy ’n vooraanstaande batebestuurder in ontluikende markte met ’n dividend-opbrengs van meer as 7%. Maar hy sal markkloppende opbrengste moet begin lewer en sy AUM moet groei.

Goeie aandeel, maar besonder illikied

Vivo Energy

Vivo Energy offices

Vivo Energy is ’n aandeel wat ek al dophou sedert hy sy sekondêre notering in Mei op die JSE gedoen het. Die maatskappy besit ongeveer 1 800 Shell-brandstofvulstasies in 15 Afrika-lande.

Brandstof is ’n goeie onelastiese produk, en Vivo het ook ’n smeermiddel-onderneming asook die moontlikheid van voorpleinvoedsel- en geriefsverkope op sy persele. Die maatskappy is ook in die finale stadium van ’n transaksie om 300 Engen-vulstasies in nege bykomende lande van Engen Holdings (Vivo sal steeds geen persele in Suid-Afrika besit nie) te koop.

Die transaksie wag op goedkeuring van die Demokratiese Republiek van die Kongo en as dit goedgekeur word, sal dit ’n goeie opening vir die maatskappy wees. ’n Werklike risiko is Marokko, sy grootste mark wat brandstofverkope van bykans een kwart verteenwoordig.

’n Paar jaar gelede het die Marokkaanse regering die brandstofprys gedereguleer en ook subsidies verwyder. Dit het gelei tot pryse wat skerp gestyg het en nou beplan die regering om prysplafonne in te stel. Dit sal in werklikheid ’n gereguleerde prys beteken, wat bestaan in die meeste lande waar Vivo bedrywig is, maar die vraag is op watter vlak die prys bepaal sal word. Ek hou van die aandeel, maar dis uiters illikied.

Ek sal ook ’n prys van nader aan 2 200 sent verkies. Ek wag dat die Marokkaanse en Engen-kwessies eers opgelos is. Miskien beteken dit ’n beter prys, maar ek sal gewillig meer betaal as daar meer sekerheid was.

www.vivoenergy.com

* Stuur jou e-pos na terugvoer@finweek.co.za

* Die skrywer besit aandele in BHP.

Meer oor:  Aandelemening  |  Finweek  |  Apple  |  Simon Brown  |  Coronation  |  Aandele
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.