Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Simon se wenke
8 November 2018

Pick n Pay Stores

Bedryfsmarge bly kwel

Pick n Pay se halfjaarresultate vir die 26 weke tot 26 Augustus is baie deur verlede jaar se vrywillige afdankingsprogram bevoordeel. Selfs al word dit weggelaat, het die groep se groei by dieselfde winkels ná inflasie met 3,5% gestyg – wat daarop dui dat hy markaandeel by mededingers wen.

Dis sy eerste styging in markaandeel in ’n lang tyd, maar my kommer bly die bedryfswins (die handelswins, soos hulle dit noem) wat onder 2% vassteek. Dis my sleutelmaatstaf vir voedselkleinhandelaars, en totdat Pick n Pay dit tot bo 2% en uiteindelik tot sowat 3% kan laat styg, is hy nie op my lys van belêbare aandele nie.

Vivo Energy

Wag maar eers

Vivo het ’n handelsverklaring met twee belangrike stukke inligting uitgereik. Hy het die Engen-transaksie afgehandel, maar sonder die deel van die onderneming in die Demokratiese Republiek van die Kongo (dit was die probleemaspek van die transaksie).

Dit gee Vivo nog 225 handelsmerkvulstasies in agt nuwe Afrika-lande (en Kenia, waar hy reeds bedrywig is). Maar daar is nog geen nuus oor die Marokko-reguleringkwessies nie.

Vivo het gesê hy ondervind margedruk daar, maar die mark wag dat die Marokkaanse koning ’n uitspraak oor die saak lewer. Totdat dit gebeur, ervaar die maatskappy ernstige onsekerheid in sy grootste mark. Selfs al het die aandeelprys tot sowat R22,50 sent gedaal, wag ek eerder as om te koop.

Dis-Chem

Nog te duur

Dis-Chem Pharmacies het ’n stel stewige halfjaarresultate (vir die tydperk tot 31 Augustus) behaal. Sy wesensverdienste vir die tydperk het met 10,5% gestyg dansky groei by dieselfde winkels van 3,5% en reële groei ná inflasie van 2,3%.

Die styging in die enkelverkoopprys op 1 Maart vanjaar is op net 1,26% vasgestel, wat die groei geknou het omdat dit omtrent ’n derde van sy kleinhandelverkope beïnvloed.

Met ’n wesensverdienste per aandeel van 51,7 sent – en as ’n mens aanvaar dat dit vir die volle jaar tot 103 sent verdubbel kan word – is dit ’n verwagte p/v van sowat 27 – en duur. Dis omtrent dieselfde as Clicks se p/v – wat ek eerder verkies. Die bestuur het gesê dat die verkope in Augustus en September beter was – wat daarop dui dat verbruikersvertroue stadigaan herstel.

Dit kan die wesensverdienste per aandeel vir die volle jaar verbeter, maar ek stel steeds voor dat mens wag dat dit goedkoper word as jy Dis-Chem wil besit.

Famous Brands

Brittanje brou die burger

Famous Brands* het Gourmet Burger King (GBK) in ’n “vrywillige maatskappyreëling” geplaas, 'n proses uniek aan Brittanje. Dit is soos ons plaaslike sakeredding, maar is blykbaar meer op huurooreenkomste ingestel.

GBK sal eiendomseienaars nou probeer oorreed om die huurgeld van winkels wat onder druk is te verminder, of hulle kan die huurooreenkoms laat vaar. Dis goeie nuus, maar nie die soort wat aandeelhouers hoegenaamd gelukkiger oor die saak sal maak nie.

Eerstens vermoed ek dat Famous Brand GBK dalk probeer verkoop het, en nie ’n koper kon kry teen ’n prys waarvan hy hou nie. Dit wys verder hoe ’n gemors die aankoop was. Dit los nie die groter kwessie op nie – naamlik dat Brittanje geweldig oorverhandel is met lekkerbekburgers – volgens berigte is daar tot 150 fynproewer-burgerhandelsmerke in die mark.

Die resultate vir die ses maande tot Augustus wys hoe erg die GBK-probleem is, met ’n styging in bedryfswins voor die GBK-kwessies van 3,9%. Dis nie opwindend nie, maar aanvaarbaar in die moeilike omstandighede.

Coronation

Hy is steeds wêreldklas

Coronation se bates onder bestuur bly krimp – op R587 miljard einde September, teenoor R614 miljard in die ooreenstemmende tydperk. Dit is ’n daling van sowat 4,4%, terwyl die plaaslike mark grootliks onveranderd was.

Coronation se bates onder bestuur behoort minstens markveranderinge te volg, en behoort te groei wanneer dit goed gaan en daar nuwe invloei is. Hy bly ’n wêreldklas-onderneming en teen die huidige prys van sowat 4 500 sent is die dividend-opbrengskoers byna 10%. Selfs al daal dit met, sê, 20%, sal die opbrengskoers steeds 8% wees – ’n uitstekende posisie om te wees terwyl aandeelhouers wag dat die wins herstel.

Die winsoplewing mag dalk nie só groot as tevore wees nie, grootliks omdat die bates onder bestuur dit moeiliker maak om buitengewoon te presteer en tariefmededinging kwaai is. Maar as markte weer begin styg, sal hy beter vaar.

Speletjiebedryf

Dié bedryf gaan meer en meer pret word

Red Dead Redemption 2 (RDR2) is op 26 Oktober uitgereik. Dis die jongste speletjie van Rockstar Studios (vervaardiger van Grand Theft Auto).

Die eerste naweek se verkope van RDR2 sou na verwagting sowat $500 miljoen gewees het – wat die speletjie in dieselfde liga as ’n groot rolprentuitreiking plaas. Die verskil is die lang volgeffek van verkope, want dié belangrike A-lysspeletjies hou jare lank aan om groot inkomste op te lewer. Ander speletjie-ateljees sluit in Activision Blizzard en Nintendo.

Boaan die lys is Tencent, waarvan Naspers ’n beduidende belang besit. Tencent ondervind sekere probleme, met die Chinese owerheid wat nuwe speletjies beperk vanweë kommer oor die uitwerking op kinders wat dit elke dag ure lank speel.

Dit sal egter mettertyd uitgeklaar word. Die speletjiegroei en gevolglike speletjieverkope is die gevolg van die kinders van die 1980’s wat op rekenaars begin speel het. Hulle is nou volwassenes, met besteebare inkomste en baie speel steeds. Dié bedryf gaan net groter word, veral met verbeterde tegnologie wat ongelooflike speletjie-ervarings bied (en ja, ek is mal oor RDR2).

Clicks

Geen rede tot paniek vir die wat hou nie

Clicks se resultate vir die jaar tot einde Augustus wys weer dat hy verreweg die beste bedryfsmaatskappy op die JSE is, met ’n omsetstyging van 9,1%, die wesensverdienste per aandeel 15,1% meer, en die dividend 18% groter. Dis ’n perfekte voorbeeld van bedryfshefboomwerking deur ’n topbestuurspan.

David Kneale, sedert 2005 die uitvoerende hoof, verlaat die maatskappy aan die einde van die jaar. Hy word dan vervang deur Vikesh Ramsunder, bedryfshoof, wat in beheer was van UDP, Clicks se farmaseutiese afdeling, toe dit die verspreidingstrategie ingestel het. Hy is blykbaar ’n uitstekende keuse.

Die vertrek van uitstekende uitvoerende hoofde laat egter altyd vrae ontstaan oor of die sukses aan hulle te danke was of eerder aan die span wat hulle opgebou het.

Clicks-aandeelhouers hoop dis laasgenoemde, veral omdat die aandeel steeds teen ’n hoë prys-verdiensteverhouding (p/v) van 28 verhandel, teenoor diep in die 30 in April vanjaar. Die mark is nie nou juis vergewensgesind nie, en enige verdiensteprobleem sal baie sleg wees vir die aandeelprys. Dié wat hou, moet egter nie paniekerig word nie, maar moet die hefboomwerking en resultate dophou.

JSE

Veranderinge aan die Top40

Die JSE het ’n paar indeksveranderinge aangekondig, met die Top40 wat Goldfields verloor en Reinet Investments bykry. Die Indi25, Resi10 en Fini15 verander nie, maar die Middelkapitalisasie-indeks het ’n paar aandele verloor – mees opmerklik Blue Label en EOH, wat sy tegnologiekomponent verklein.

CMH

Bied nog goeie waarde

Combined Motor Holdings (CMH) het ’n moeilike stel halfjaarresultate uitgereik, met die inkomste 8,8% groter maar die wesensverdienste per aandeel net 0,2% meer op 128,7 sent.

Taai voertuigpryse veroorsaak dat die pryse van tweedehandse voertuie daal, en dit beïnvloed inruilwaardes. Gevolglik hou baie klante motors langer. CMH is ook in die huurmotormark bedrywig – waar sy vloot se waarde laer is. Hy verminder daarom tariewe en hou voertuie ook langer. Die bestuur het gesê dat groei in die wesensverdienste per aandeel van nul vir die volle jaar as “goeie prestasie” beskou sal word.

Die aandeel self het sedert die hoogtepunte vroeër vanjaar met byna 30% gedaal – ek het in my destydse Eie mening-artikel (“Volspoed vorentoe” in finweek, 10 Mei vanjaar) gesê dit was die verkeerde tyd om te koop.

Maar die aandeel verhandel nou teen sowel ’n p/v as dividend-opbrengskoers van sowat sewe en bied uitstekende waarde. Hy kan self ’n potensiële teiken vir denotering wees. 

*terugvoer@finweek.co.za

*Die skrywer besit aandele in Famous Brands.                                                                                                           

*finweek is ’n publikasie van Media24, ’n filiaal van Naspers

Meer oor:  Pick-N-Pay  |  Dis-Chem  |  Clicks  |  Coronation  |  Voertuigpryse  |  Famousbrands  |  Jse  |  Huurmotormark
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.