Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Simon se aandele-wenke
9 Mei 2019

Allied Electronics

Uitsondering op die reël

Ja, ’n ommekeer is gewoonlik stadig en misluk dikwels. ’n Uitsondering is egter Allied Electronics Corporation, met wesensverdienste per aandeel (WVPA) uit voortgesette werksaamhede na verwagting 43% tot 56% hoër. Ek sien selde ’n maatskappy se lot so vinnig en lonend omkeer; ek wag gretig op sy resultate.

MTN

Die opsie van Jumia

Jumia het ’n sterk notering op die NYSE gehad en die aandeel se waarde het meer as verdubbel, met MTN se 31,2%-aandeel by die skryf hiervan byna $1 miljard werd. MTN het aangedui hy sal die posisie behou – om so ’n groot aandeel van die hand te sit, sal boonop nie ’n eenvoudige proses wees nie. Die aandeel gee verseker aan MTN verskillende opsies.

Telko’s

Data sál val

MTN en Vodacom is albei onder die soeklig by die Mededingingskommissie oor hul pryse vir plaaslike selfoondata, veral vergeleke met hul datapryse in ander markte. Die twee telekommunikasiemaatskappye het hul redes verduidelik, maar min koop hul verskonings.

Die risiko hier is dat as hulle hul pryse nie vinnig en opmerklik verlaag nie, kan óf die Mededingingskommissie óf Okosa ingryp om die kwessie met wetgewing aan te spreek, soos gebeur het met ander uiterste bedrae wat die telekommunikasiemaatskappye gehef het, soos by die beëindiging van oproepe.

Dit haak by twee ander kwessies aan: wetgewende risiko enersyds en andersyds data as ’n nutsproduk, wat tans uitstekende groei toon maar op lang termyn ernstige prysdruk kan ervaar.

Uber

Geen winste?

Uber het pas ’n taamlike laatfase aanvanklike openbare aanbod (IPO) aangekondig. Hy wil $9 miljard insamel, vir ’n markkapitalisasie van sowat $90 miljard. Die belangrikste punt vir my hier is ’n reëltjie in sy IPO-dokument wat lui hy “sal moontlik nie winsgewendheid bereik nie”.

Noem my outyds, maar ek hou van sakeondernemings met ’n plan om wins te maak. Vir Uber is die probleem dat hy met elke rit geld verloor. Die langertermynplan was nog altyd selfbestuurmotors, wat met die bestuurderskoste sou wegdoen. Dit lê egter nog ver in die toekoms.

Uber beplan ’n insameling van $9mjd. vir ’n markkapitalisasie van sowat $90 mjd.

Die uitvoerende hoof van Ford het onlangs gesê hy vertrou steeds outonome motors sal kom, maar dit sal baie langer duur as wat aanvanklik verwag is – ’n monsteragtige leemte in die sakemodel vir Uber en Lyft.

Dié twee noterings gaan eintlik meer oor ’n makliker uitkoms vir die vroeë beleggers as winste vir nuwe beleggers. Die aandeelpryse kan dalk styg, maar totdat ons eendag outonome motors kry, sal hul waarskynlik ’n verlies maak.

Die wagtydperk sal dekades eerder as jare duur. Sal beleggers dekades lank geduldig wag terwyl hulle die verliese finansier? Ek twyfel.

Shoprite

Stemming oor stem-aandele

Shoprite* het ’n voorgestelde ooreenkoms aangekondig vir die nie-ekonomiese, maar stemdraende aandele wat Christo Wiese besit. Die aandele gee hom ’n 32,3%-stem sonder enige wins. Saam met sy gewone aandeelhouding gee dit hom egter beheer van die groep.

In Maart is aangekondig hy wil dié spesiale stemdraende aandele verkoop en ek het oor hul regte waarde gewonder. Op hul eie bied hulle negatiewe beheer, maar hoe waardeer mens hulle as hulle met geen aandeel in die wins nie gepaardgaan? Wel, Shoprite se direksie het besluit hulle is sowat 20 miljoen nuwe Shoprite-aandele ter waarde van meer as R3 miljard en sowat 4% van die huidige markkapitalisasie werd.

As aandeelhouer is dit myns insiens uiters vrygewig. Ja, dit ’n goeie ding is om van dié aandele ontslae te raak. Maar dis tans ’n kopers- mark, met geen ander betekenisvolle koopbod nie.

Dié aandele het ook bepalings wat hulle nutteloos kan maak as Wiese se aandeel tot onder 10% daal en hul waarde só verder verlaag. Ek gaan teen die aanbod stem.

Pick n Pay

Dis óf, óf 

Pick n Pay het sterk resultate voorgelê, met WVPA vir die 53 weke tot 3 Maart sowat 18,8% hoër danksy ’n styging van 4,8% in soort-vir- soort-omset. Dit was met deflasie van 0,3%. Die groep het ongetwyfeld markaandeel gewen, heel waarskynlik by Shoprite,* wat ontwrigtings in sy verspreidingsentrum en IT gehad het.

Pick n Pay se bedryfsmarge het van 2,3% tot 2,4% verbeter – die mikpunt is 3%. Ek het sowat 15 jaar gelede van Pick n Pay na Shoprite omgeskakel en het al voorheen hier geskryf dat dit miskien weer tyd is vir ’n omskakeling, dié keer van Shoprite af. ’n Kykie na relatiewe prestasie en in ag genome die jongste resultate, is my siening egter dat Pick n Pay nou op Shoprite se vlak is, met laasgenoemde effens duurder ná swak resultate in 2018.

Shoprite se bedryfswins bly egter baie beter. Sou ’n mens meen, soos wat ek doen, dat Shoprite se probleme – wat sy eie toedoen was – nie herhaal sal word nie, is albei ewe aantreklik. En daarom hou ek by Shoprite.

EOH

Harde werk lê voor

EOH se resultate vir die ses maande tot einde Januarie was so swak soos verwag is, met die nuwe bestuur wat als afskryf om by ’n lae grondslag uit te kom om mee te werk. Inkomste en koste het grootliks dieselfde gebly – een van die vernaamste kwessies by ’n maatskappy met ’n geskiedenis van +30%-groei.

Die nuwe EOH moet nou sonder verkrygings groei en dit gaan moeilik wees. Sowel die resultate as menige belegger in EOH loop te koop met die aandeelprys se diskonto op netto batewaarde (NBW), met die NBW op sowat 2 500 sent per aandeel.

Die aandeel was op sowat 1 000 sent toe die resultate uitgereik is. Dit bevat egter klandisiewaarde van meer as R3,1 miljard. Ek hou nie van klandisiewaarde op ’n balansstaat nie. (En hoeveel klandisiewaarde sal EOH tans hê?) Neem dit weg en NBW per aandeel is sowat 800 sent.

Die aandeel het ná die resultate meer as verdubbel, maar uitdagings bly en ek is nie opgewonde oor sy korttermynvooruitsigte nie. Nogtans behoort handelaars reeds in lang posisies te wees noudat die aandeelprys verdubbel het.

Purple group

Kliënte is kern

Hoewel steeds verliesmakend, het Purple Group (eienaar van Easy Equities) se resultate vir die ses maande tot 28 Februarie merkbaar verbeter. Easy Equities se voorbelaste verlies het dieselfde gebly, terwyl GT247 (die verhandelingsafdeling) se wins meer as vyfvoudig hoër was.

Emperor Assets het ook verbeter, maar steeds ’n effense verlies getoon. In die geheel beskou, ’n bemoedigende stel syfers, met kontant voor hande ’n stewige R82 miljoen.

In die geheel beskou ’n bemoedigende stel syfers, met die kontant voor hande ’n stewige R82 miljoen.

Easy Equities se gebruikersgrondslag en inkomste verder uitgebou word, terwyl koste bestuur word, bly die groep op koers om binne die volgende paar jaar winsgewend te wees. Vreemd genoeg meld hulle nie meer hoeveel gebruikers hulle het nie.

Dit kan strategies wees, of omdat die getal stilstaan. Ek hou egter van konsekwentheid in data. ’n Sterk bulmark sal hul posisie help, aangesien dit meer beleggers en hoër besteding sal bring.

Vir ernstige wins, moet Easy Equities egter baie kliënte hê. Die uitdaging bly om nuwe beleggers te vind.

Grand Parade

Die lewe ná kitskosavonture

Onlangse transaksies in Grand Parade suggereer Hassen Adams, stigter en voorsitter, het moontlik handdoek ingegooi; hy het sowat twee derdes van sy aandele verkoop aan Value Capital Partners Proprietary, wat nou 20,88% besit en daarmee die grootste aandeelhouer geword het.

Adams en Value Capital was onlangs haaks; laasgenoemde probeer waarde ontsluit in ’n aandeel wat op laer as NBW verhandel en geld op kitskos- avonture verkwis, met roomys en oliebolle wat nou laat vaar is.

Die aandeelprys het die afgelope maand met byna 20% gestyg en sedert die laagtepunte van Julie 2018 byna verdubbel.

Die vraag is hoe maklik (of moeilik) dit sal wees om die onderneming om te keer. Burger King benodig oor die volgende jare hope kapitaal terwyl hy nuwe winkels oopmaak.

Die aandeelprys het die afgelope maand met byna 20% gestyg en sedert die laagtepunte van Julie 2018 byna verdubbel. Met die NBW op sowat 450c behoort die stygpotensiaal steeds goed te wees, maar nie sonder risiko nie. Die NBW kan verlaag en ’n onderneming se ommekeer is gewoonlik ’n moeilike en langsame proses.

A2X

Verhandelings moet baie hoër

Die marksyfers soos deur A2X voorgelê, wys die nuwe beurs het in Maart nagenoeg R110 miljoen se waarde verhandel. Nie sleg nie, maar eintlik nog effentjies.

Die JSE, daarteenoor, verhandel sowat R15 miljard per dag. Die A2X kry beslis noterings by, maar nie tot dusver die verhandelingsbedrywighede nie.

Wescoal

Nog nie die regte tyd nie

Foto: Shutterstock

Verlore produksie by Wescoal se Vangatfonteinmyn (ná ’n gewelddadige en ombeskermde staking) kan in dié boekjaar tot 20% bedra. Die myn is vir sowat die helfte van Wescoal se produksie verantwoordelik en dit kan die WVPA vir die huidige boekjaar met tot 15% laat krimp. Dis nogal betekenisvol.

Op ’n prys-verdienste-verhouding (PV) van onder 3 keer en ’n dividendopbrengs van meer as 5% is Wescoal se aandele egter uiters goedkoop – en die Sens-aankondiging het die aandeelprys nie laat roer nie.

Wescoal is waarskynlik die beste en goedkoopste mynmaatskappy op die JSE. Om verskeie redes koop die mark hom egter nie. Junior myners het heeltemal in onguns verval, selfs meer as klein- en middelkapitalisasie-aandele.

Om steenkool te myn, bring boonop allerlei vrese oor Eskom mee. Eendag sal dié aandeel ’n gawe kopie wees, maar nie nou al nie.

Wescoal is waarskynlik die beste en goedkoopste mynmaatskappy op die JSE.

Oceana

Moenie slegte nuus wegsteek

Simon Brown is die stigter en direkteur van die beleggingswebwerf JustOneLap.com en ’n kenner van die aandeelmarkte. In dié rubriek deel hy sy insigte in van die onlangse groot gebeure op die markte.

Oceana se handelsverklaring vir die ses maande tot einde Maart is ’n les in esse en draaie. Die tweede paragraaf lui dat wins voor belasting tussen 26% en 30% hoër sal wees.

Teen die laaste paragraaf staan daar egter WVPA sal 18% tot 22% laer wees. Die rede wat aangegee word, is veranderings aan Amerikaanse belastingkoerse, wat winste verlede jaar opgestoot het, maar nie vanjaar dieselfde uitwerking sal hê nie. Dit klink redelik, maar hoekom die skynbare poging om dit te verdoesel?

Meer oor:  Finweek  |  Simon Se Wenke
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.