Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Simon se wenke
20 Junie 2018

Simon Brown is die stigter en direkteur van die beleggingswebwerf JustOneLap.com en ’n kenner van die aandeelmarkte. In dié rubriek deel hy sy insigte in van die onlangse groot gebeure op die markte.

Stefanutti Stocks

Wag op die ekonomie

Afgryslike resultate van Stefanutti Stocks vir die jaar tot 28 Februarie terwyl die konstruksiebedryf ’n stadige dood sterf.

Die groep genereer inderdaad kontant en sit met kontant van R880 miljoen, teenoor R915 miljoen voorheen. Omset was slegs 5% laer, maar verwaterde wesensverdienste per aandeel (WVPA) het van ’n wins van 61,29c in ’n verlies van 70,12c omgesit. Boonop oorskry die lopende laste die lopende bates met R301 miljoen, wat eenvoudig beteken dat die groep binnekort kan ondergaan.

Tog het Stefanutti tot dusver staande gebly en ek het die aandeel op my dophoulysie vir wanneer ons eendag ’n wesenlike ekonomiese herstel in Suid-Afrika sien.

Die land gaan ’n tekort hê aan groot konstruksiemaatskappye en as Stefanutti oorleef, sal hy rekordwinste begin maak.

Ek beklemtoon egter: dophoulysie – nie koop nie. Hy kan nog bankrot speel. En dit lyk asof dit nog lank gaan wees voordat die ekonomie begin herstel.

Foto: Shhutterstock
Mr Price

Agteruit

Mr Price se resultate vir die 52 weke tot 30 Maart 2019 dui op ’n gehalte-onderneming wat swaarkry. Verwaterde WVPA was 6,2% hoër danksy ’n 4,4%-toename in kleinhandelverkope. Inkomste vir dieselfde winkels was slegs 1,6% hoër en met produkinflasie op 5,1% beteken dit hy het agteruit geboer.

Waarvoor ek waardering het, is die kommentaaroor oor “finansiële steun aan die werksaamhede in Australië” wat onttrek word. Dié avontuur was nie ’n sukses nie en hy beëindig dit vroeër eerder as later.

Ek het al dikwels geskryf oor groot waagstukke wat liederlik skeefloop, maar as die bestuur daarop aandring om na die buiteland te probeer uitbrei, erken minstens as dit ’n fout was en knip dit so gou moontlik kort.

Famous Brands

Bestuur toon vertroue, maar…

Famous Brands* se resultate vir die jaar tot einde Februarie wys dinge in sy Britse afdeling begin verbeter. Tog verloor hy steeds geld. Sy kenmerkende handelsmerke kry nou swaar en winsmarges is onder druk. Die tweede helfte van die boekjaar was moeiliker as die eerste.

Die bestuur sê wel handel het sedert Februarie se jaareinde verbeter, ofskoon langsamerhand. Wel noemenswaardig is dat die dividend heringestel is, al is dit op 100c maar beskeie. Ná die oorspronklike oorname van Gourmet Burger Kitchen in Brittanje is die dividend opgeskort om skuld vinniger af te betaal.

Famous Brands* se resultate vir die jaar tot einde Februarie wys dinge in sy Britse afdeling begin verbeter. Tog verloor hy steeds geld.

Die bestuur het voorheen gesê wanneer die “bruto skuld-tot-ebitda-verhouding (ebitda is verdienste voor rente, belasting, depresiasie en amortisasie)” onder twee keer is, sal hulle die dividend terugbring.

In dié resultate het dit 1,97 keer behaal. In teorie dui die dividend dus op bestuursvertroue, maar die gevaar is dat hulle hul in ’n hoek vasgeverf het met die beloftes.

Foto: Shhutterstock
Life Healthcare

Pyn is gewaarborg

Gereelde lesers weet ek hou weens regulatoriese prysdruk nie van mediese aandele nie. Nou knou dit Life Healthcare al weer, ook weer in sy Poolse bedrywighede.

Die aanvanklike onderneming is kort ná die 2015-boekjaar se verkryging aansienlik afgeskaal en nou wil die Poolse regering (die vernaamste kliënt van die Poolse onderneming) weer druk plaas op die prys wat Life Healthcare kan vra.

Dit hou regstreeks met twee van my temas verband: groot transaksies en die mediese sektor. Ek hou nie van een van die twee nie en albei kry nou seer.

Renergen

Klein, maar interessant

Renergen se aandeelprys neig hoër. Dié maatskappy het sy sekondêre notering op die Australiese aandelebeurs (ASX) afgehandel en (AUS)$10 miljoen daarmee ingesamel.

Sy onlangse resultate vir die jaar tot einde Februarie toon ’n baie klein onderneming in hernubare energie met min inkomste en hope korporatiewe aktiwiteit (verkoop van bates, notering op die ASX...).

Hy het egter geld ingesamel om helium en vloeibare aardgas te ontwikkel en dis uiters interessant.

Hy het egter geld ingesamel om helium en vloeibare aardgas te ontwikkel en dis uiters interessant.

Helium is ’n beperkte hulpbron en in Amerika ’n strategiese reserwe. Boonop is voorrade beperk en die Amerikaans genoteerde Party City het aangedui tekorte beïnvloed sy inkomste (minder heliumballonne word verkoop).

Styg die prys van helium egter verder (dit is die afgelope jaar reeds meer as 135% hoër), kan nog voorraad geproduseer word. Helium is ’n neweproduk by die ontginning van ander minerale en Renergen sal nie gou in produksie wees nie. Kleiner hulpbronaandele is natuurlik ’n hoë risiko.

Tog miskien die moeite werd om hierin te delf?

EKONOMIE

SA Ingelyf se herstel nog hangende

Die BBP-syfer vir die eerste kwartaal van vanjaar was skrikwekkend laag op -3,2%. Dit kan grotendeels toegeskryf word aan beurtkrag en die druk waaronder verbruikers verkeer. Om alles erger te maak, het die landbousektor met sowat 13,2% ingekrimp.

Landbou is dikwels ’n moeilike syfer wat deur droogte, of as die boere later of vroeër plant, beïnvloed kan word. Hoe jy ook al daarna kyk, is dit egter ’n ontstellende syfer wat beteken ons gaan sukkel om die BBP vir 2019 tot bokant 1% op te stoot – en dan moet ons boonop aanneem dat daar vir die res van vanjaar geen (of baie min) beurtkrag gaan wees.

So, ek het op SA Ingelyf se herstel gewag, maar dit gaan nie sommer vanjaar gebeur nie. Tensy die ekonomie aansienlik verbeter. En ek kan regtig nie sien hoe en waar nie. Maar om te belê, gaan oor die uitsoek van individuele aandele, waar gehalte en buitelandse verdienste tans die wagwoord is.

Pembury

Eina!

Pembury se aanvanklike openbare aanbod het rampspoedig verloop. Net meer as twee jaar gelede het hy op 100c begin, maar toe word die maatskappy se notering vir sowat sewe maande opgeskort en nou verhandel hy weens hope verdere slegte nuus op 6c.

Die finansiële hoof het bedank, geld wat uit die verkoop van Mellow Oaks Property verdien is, is deur die groep uitgegee pleks daarvan om dit aan die eiendomsverkoper te oorhandig en toe betaal hulle die lening vir die geld nie getrou terug nie.

Die finansiële hoof het bedank, geld wat uit die verkoop van Mellow Oaks Property verdien is, is deur die groep uitgegee pleks daarvan om dit aan die eiendomsverkoper te oorhandig en toe betaal hulle die lening vir die geld nie getrou terug nie.

In reaksie op Carte Blanche se versoek om met die uitvoerende hoof ’n onderhoud te voer, is ’n Sens-aankondiging uitgereik. Dit als binne drie dae, wat wys hoe diep in die moeilikheid hulle is. Ek het nooit van die besigheid gehou nie; as jy met aandele sit, beter jy verkoop terwyl jy kan.

Foto: Shhutterstock
Standard Bank

Trae groei

Standard Bank het met die proses begin om van sy takke toe te maak. Altesame 104 takke gaan toemaak. Daarna sal die bank sowat 525 takke oor hê, terwyl die ander groot takke elkeen meer as 600 het.

Ek vermoed ons gaan party van die ander groot banke ook sien takke toemaak om koste te probeer besnoei en kliënte na meer ekonomiese aanlyn kanale te probeer oorplaas. Dit help natuurlik met die kostegrondslag, ofskoon baie takke wat toemaak op die platteland is en dus wat personeelvoorsiening en huur betref goedkoper is om te bedryf.

Standard Bank gaan die takke almal ineens toemaak, maar die winsvoordeel sal beskeie wees terwyl ander koste styg en winste in lae, enkelsyfergroei vassteek. Nietemin is die groot banke tans goedkoop.

Terwyl BBP-groei egter beperk bly, is dit met dividende waaruit jy die meeste van jou opbrengs gaan verdien eerder as uit stygende aandeelpryse.

Shoprite

Aandeelhouers hét mag

Shoprite* het aangekondig aandeelhouers wat 15% van sy aandele verteenwoordig, uitgesonder dié wat aan Christo Wiese behoort, het beswaar aangeteken teen die voorgestelde transaksie om tot Wiese se redding te kom deur sy nie-ekonomiese maar stemkragtige aandele te koop.

Dié 15% was die kerf waarteen die direksie die voorstel sou onttrek, wat hulle nou gedoen het. Die transaksie sou aandeelhouers meer as R3 miljard gekos het.

Ek kan sien hoe dit Wiese sou bevoordeel het, maar vir bestaande aandeelhouers het dit geen voordele ingehou nie en ek is bly alles is van die baan. Hopelik is dit die einde van die storie.

Omnia

Verlies aan vertroue

Omnia se aandeel is verder op hol met dié dat sy voorsitter (en voormalige uitvoerende hoof) skielik weg is. Rod Humphris was 20 jaar lank lid van die direksie. Die onverwagse aankondiging van ’n regteuitgifte van R2 miljard (nadat in April beloof is dit sal nie nodig wees nie) was reeds vir die mark ’n skok.

Nou gaan Omnia die uitgifte sonder Humphris aanpak. Die aandeel verhandel tans teen 2006 se prysvlakke en ek voorsien verdere swakheid vorentoe, veral aangesien ons nog geen prysbesonderhede vir die regteuitgifte het nie en die mark boonop vertroue in die maatskappy verloor het.

Meer oor:  Finweek  |  Beleggings  |  Simon Se Wenke
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.