Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Simon se wenke
21 November 2019

Taste Holdings

’n Billike prys?

Die jammerlike sage van Taste Holdings nader ’n einde noudat besluit is om voedsel vaarwel toe te roep en juweliersware, waaruit Taste twee jaar gelede probeer klim het, te behou. Die nuus is ook dat Starbucks vir R7 miljoen verkoop word. Net die toerusting en meubels in sy 13 winkels is sekerlik meer as dit werd? Natuurlik het ons geen idee watter skuld aan die plaaslike Starbucks verbonde is nie.

Taste het die lang pad na wins in Februarie uiteengesit in ’n Sens-verklaring, wat gelui het dat dit R700 miljoen sal neem om Starbucks en Domino’s Pizza te laat gelykspeel op verdienste voor inkomste, depresiasie, belasting en amortisasie (ebitda).

Taste verkry ’n “billikheidsmening van ’n onafhanklike kundige wat vir die JSE aanvaarbaar is”. Ek wed ’n koffie dié kundige sal die transaksie van R7 miljoen die groen lig gee. As ek ’n Taste-aandeelhouer was, het ek vasgeskop oor die prys – om minstens nog ’n nul by die koopprys gelas te kry.

...maar vir wie?

Die tweede ding van die Taste-transaksie is om die koper te bepaal. Die koper kry ’n winskoop, al is dit ’n winskoop in nood. Die Sens-verklaring noem ’n maatskappy K2019548958, wat die Kommissie vir Maatskappye en Intellektuele Eiendom (CIPC) wys net een direkteur het, naamlik Adrian John Maizey.

Aandeelhouers word nie op CIPC bekendgemaak nie. Maizey is ’n vennoot by Protea Asset Management LLC en dien as ’n nie-uitvoerende direkteur van Taste Holdings en Conduit Capital. Protea en Conduit besit saam 64,5% van Taste.

Taste het bevestig dat Maizey een van die voornemende kopers, Rand Group Limited, besit en beheer. Dit kom in effek daarop neer dat die voorgestelde transaksie van R7 miljoen behels dat iemand uit die binnekring Starbucks koop; hy is beslis ’n verwante party. Dit is daarom baie belangrik om die billikheidsmening met ’n arendsoog dop te hou.

Famous Brands

Die prentjie bly somber

Famous Brands se logistieke sentrum in Johannesburg.

Famous Brands* se resulte vir die ses maande tot 31 Augustus lyk steeds somber. Dit wil voorkom of die ergste agter die rug is vir Gourmet Burger Kitchen in Brittanje.

Wat my opval, is die bedryfswins op 11,3%. Op sy beste, was Famous Brands se bedryfsmarge meer as 20%. Dit beteken aandeelhouers ly nie net onder slegte transaksies en omset wat onder druk is nie, maar ook onder minder wins per rand se inkomste.

Tog, deel van die winsdruk is omdat pryse aktief laag gehou word om te sorg dat die aanloop van klante sal voortduur.

Basies gebruik hy winsmarges om sy markaandeel te beskerm.

Santova

Oulike besigheidjie

Santova* se resultate vir die ses maande tot einde Augustus toon ’n 21% sprong in inkomste, terwyl wesensverdienste per aandeel (WVPA) met 13,3% gedaal het. Plaaslike werksaamhede was 64% laer om nou slegs 13% van sy verdienste uit te maak.

Santova posisioneer hom nou al ’n tyd lank as ’n meer wêreldwye speler en verdiener van inkomste. Nou het dit gebeur, maar meer omrede die ineenstorting hier plaaslik as organiese groei in die buiteland.

Met ’n netto batewaarde (NBW) van meer as 320c hou ek my aandele in wat ek beskou as ’n uitstekende onderneming, goed geplaas in die buiteland en vir wanneer ons ekonomie begin verbeter.

Dis-chem

’n Duur aandeel

Dischem

Dis-Chem se resultate vir die ses maande tot einde Augustus is gangbaar – as ons elke eenmalige koste van altesame byna R200 miljoen uitstroop. Dit bygetel, is die WVPA effens hoër as in die vorige tydperk. Ja, dit is werklike koste, maar deur dit terug te plaas kry ons ’n idee van hoe die onderneming op ’n daaglikse grondslag presteer.

Dis-Chem ly ook onder die nuwe IFRS16-verslagdoeningstandaarde. Dit knou hom veral omdat die huurooreenkomste meesal nuut is en dus ’n duik in verdienste veroorsaak.

Die eintlike prentjie is egter dat die aandeel op ’n prys-verdienste-veelvoud (p/v) van byna 40 keer, of met die eenmalige koste uitgestroop sowat 30 keer, baie duur bly.

Ook belangrik is dat ons nie die snelle groei sien weens nuwe winkels wat open soos die maatskappy beloof het nie. Ek beskou Dis-Chem derhalwe nie as aantreklik nie, selfs nie op vlakke onderkant 2 500c nie.

Eiendoms-ETF’s

CoreShares gooi dié ETF’s saam

Houers van die twee beursverhandelde eiendomsfondse PTXTEN en PTXSPY sal sien dié twee ETF’s is deur ’n nuwe ETF, genaamd CSPROP*, vervang.

Dit is omdat CoreShares sy portefeulje opruim en die twee eiendom-ETF’s saamgesmelt het in ’n enkele eiendom-ETF wat op opbrengs konsentreer.

Drie jaar se historiese opbrengs word gebruik vir die gewigstoekenning in die ETF en maak 75% van die gewig uit.

Drie jaar se historiese opbrengs word gebruik vir die gewigstoekenning in die ETF en maak 75% van die gewig uit. Die oorblywende 25% kyk na die tradisionele markkapitalisasie van die aandeel. Ek hou steeds van eiendom, want waardasies is goedkoop ofskoon eiendom onder druk bly.

Ek hou ook van die fokus op opbrengs, want opbrengs is een van die belangrikste redes om eiendom te besit.

Neem kennis dat opbrengs op eiendom as rente en nie as dividende nie belas word, dus is dit uiters doeltreffend om ’n eiendoms-ETF in ’n belastingvrye spaarrekening te hê, tensy jou belastingkoers onder die belastingweerhoudingskoers van 20% op dividende is.

Naspers

Te groot vir sy indekse

Die JSE probeer ’n oplossing vind vir die kwessie van Naspers** en Prosus se indeksgewig. Dit is veral ter sprake binne indekse met ’n boperk, waar Naspers byvoorbeeld tot, gestel, 10% beperk is.

Maar nou bly Naspers op 10% en Prosus het op tussen 3% en 4% ingeglip. Dit beteken dié beperkte indekse het in effek nou meer blootstelling aan Naspers as voorheen. Oor die algemeen steun ek die gedagte om die kwessie op te los, maar ek hoop dit is nie veranderinge wat aan ’n bepaalde probleem gemaak word en dan later ander probleme skep nie.

Lees mens egter deur die voorgestelde veranderinge, lyk hulle robuus genoeg om mettertyd goed te werk.

Steinhoff

’n Sprankel hoop

’n Handelsverklaring deur Steinhoff bevestig dat die maatskappy dit oorweeg om Pepkor Europe, sy een werklik lewensvatbare sake-eenheid, afsonderlik te noteer.

Dit sal beteken nie veel bly oor nie, maar ’n afsonderlike notering weg van die probleme van die moedermaatskappy af sal darem aan bestaande aandeelhouers in Steinhoff ’n sprankie hoop gee.

Só sal Steinhoff met die 70%-aandeel in die plaaslik genoteerde Pepkor Holdings oorbly, die ander groot bate. Dié aandeel is egter ingewikkelder omdat dit slegs plaaslik verhandel.

Dié aandeel is egter ingewikkelder omdat dit slegs plaaslik verhandel.

Transaksie sal dus meebring dat die geld moontlik in Suid-Afrika vassit wanneer dit in Europa benodig word vir regseise... en koste.

Ook weggesteek in die verklaring is ’n erkenning dat Steinhoff moontlik ’n “aandele-uitreiking” sal doen om te help betaal vir die gedingvoering teen die maatskappy. Kortom, bedoel hy ’n regte-uitgifte en ek kan nie sien hoe aandeelhouers tevrede sal wees daarmee om geld te moet gee om regskwessies te besleg nie.

Astoria

’n Uitklimkans

RECM & Calibre, deur sy filiaal Livingstone, doen ’n verpligte aanbod aan Astoria se minderheidsaandeelhouers op 240 sent per aandeel. Dit word deur die wet vereis, want hulle besit reeds meer as 35% en 240 sent is die hoogste prys wat hulle vir die Astoria-aandele betaal het.

Die premie is eerlikwaar nul, maar met die uiters yl volumes wat verhandel kan dit ’n elegante manier wees om ontslae te raak van Astoria, ’n notering wat nooit aan verwagtinge voldoen het nie.

Aspen

Wag vir tekens van groei

Aspen sukkel steeds. Sy resultate vir die jaar tot einde Junie toon inkomste is ’n beskeie 1% hoër. WVPA is 11% laer. ’n Onlangse Sens-verklaring sê hy wil nog ’n onderneming in die Asië-Pasifiese streek verkoop om verder te probeer om so vinnig as moontlik sy skuld te delg. Delf mens in die resultate rond, lyk die skuld hanteerbaar as bates verkoop word.

Groei in WVPA oor die volgende paar jaar bly egter ’n kwelling. Die mark is nogtans opgewonde, want die aandeel het tot meer as R110 herstel ná ’n laagtepunt van 6 400c in Augustus. Op ’n p/v van onder tien keer lyk die aandeel goedkoop.

Sonder duidelike groei in die volgende klompie jare sal ek senuagtig wees om die aandeel te besit. Met ’n mate van groei, lyk die waardasies ordentlik. Ek wil egter eers tekens van groei sien. 

Stuur 'n boodskap na terugvoer@finweek.co.za 
Die skrywer besit aandele in Famous Brands, Santova en CSPROP.
*finweek is ’n publikasie van Media24, ’n filiaal van Naspers.


Meer oor:  Finweek  |  Aandele  |  Simon Se Wenke
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.