Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Simon se aandele-wenke
21 Mei 2020

Simon Brown is die stigter en direkteur van die beleggingswebwerf JustOneLap.com en ’n kenner van die aandeelmarkte. In dié rubriek deel hy sy insigte in van die onlangse groot gebeure op die markte.


Phumelela Gaming and Leisure

Gered deur die Oppenheimers

Phumelela Gaming and Leisure het reeds voor die Covid-19-pandemie probleme begin ondervind weens die regering se 50%-belasting op perdewedrenne – dis aan ongeveer die helfte van hul winste gelyk.

Die inperking het die bedryf natuurlik tot stilstand gebring, en die swak resultate is vinnig gevolg deur die aankondiging dat die maatskappy in sakeredding gaan. ’n Herstel het onwaarskynlik gelyk, maar Mary Oppenheimer Daughters het ’n finansieringsooreenkoms vir ná die herbegin aangebied wat die bedryf en moontlik die maatskappy sal kan red.

Soos altyd met ’n sakeredding of ’n bankrotskap, is dit natuurlik die aandeelhouers wat die eerstes is om regte te verloor, aangesien hulle die opwaartse potensiaal van ’n suksesvolle onderneming geniet, maar ook die afwaartse potensiaal as die onderneming misluk. Selfs as die mislukking slegs gedeeltelik is en die onderneming terugkeer na bedrywighede word aandeelhouers se belang dikwels erg verwater of met nuwe aandeelhouers vervang wat skuld omgeskakel of meer kapitaal toegevoeg het.

Metrofile

Uitkoop uitgestel

Metrofile* het die mark onlangs ingelig oor sy voorgestelde denotering en gesê die kopers is steeds verbind tot die ooreenkoms, maar hy kan nie voortgaan voordat die inperkings in Suid-Afrika verby is en internasionale reisbeperkings opgehef is nie.

Volgens die verklaring sal die kopers drie maande van normale besigheid en hersiene vooruitskattings en skuldvlakke moet sien. Met ander woorde, die transaksie is op die beste uitgestel tot einde vanjaar, en kan ook dalk glad nie plaasvind nie, veral as die inperkings dalk in die een of ander vorm tot volgende jaar voortduur.

Die aandeelprys het as gevolg hiervan tot 220c daal, heelwat onder die aanbodprys van 330c. Maar ek hou van hom en gaan voort om hom te hou. Net soos potensiële kopers, wil ek egter handelsaktiwiteit sien sodra die Covid-19-inperkings opgehef word. Hierdie markaktiwiteit sal minder wees omdat ekonomiese aktiwiteit minder is en baie kliënte bedrywighede tydens die inperkingstydperk gestaak het.

SA effekte

Kritici stil oor skuldherstel

SA effekte se uitstekende begin aan Mei, met die tienjaar-effek wat afwaarts tot 9,29% verhandel het, terwyl kortertermyneffekte onder 8% was, was goeie nuus. Dit was net ’n week nadat ons die Citi-wêreldstaatseffekte-indeks verlaat het en bietjie meer as ’n maand sedert ons ekonomie tot volle rommelstatus afgegradeer is.

Dit het opbrengste tot meer as 11% laat styg. Dié herstel is nie ’n verrassing nie; selfs teen ongeveer 9,3% het ons een van die hoogste opbrengste ter wêreld, en baie beleggers aanvaar geredelik die gepaardgaande risiko’s van wanbetaling (waarvoor hulle versekering kan koop), om ’n stewige opbrengs vas te maak.

Wêreldbeleggers gee nie om oor ons politiek nie, net oor opbrengste.

Amerikaanse markte

Werkverliese pla Nasdaq nie

Al het Amerikaanse werkloosheid volgens die data vir middel April ’n syfer van 14,7% bereik (dit is die ergste vlak sedert die Groot Depressie), met waarskynlik ’n verdere styging tot 25% teen einde Mei, het die Nasdaq sedert die begin van die jaar positief verhandel. Dit is ’n duidelike herinnering aan twee dinge.

Eerstens weerspieël markte nie soseer vandag se situasie nie, maar kyk eerder na die toekoms. En die Nasdaq met sy groot lading tegnologiese aandele sê volgende jaar sal goed wees, selfs uitstekend, vir die aandele in sy indeks. Daar is ook die optimisme dat tot 70% van die jongste werklose mense verwag dat hulle hul werk vinnig sal terugkry. Die mark kan natuurlik verkeerd wees en werkgeleenthede kan teen ’n stadige tempo terugkeer, wat sal lei tot afverkope, maar die markte is tans positief en hoër.

Die tweede belangrike punt is: Moenie teen die Federale Reserweraad (Fed) veg nie. Hy pomp biljoene dollars in die stelsel in, en dit verhoog die vertroue en die aandeelpryse. Dit is die spreekwoordelike muur van geld wat onstuitbaar is, totdat dit opraak. Maar met die Fed wat die drukpers besit, kan dit lank voortduur.

Kaap Agri

Bekommernis oor skuld

Kaap Agri se tussentydse resultate vir die periode geëindig 30 Maart was ’n positiewe verrassing omdat die omset en wins toegeneem het. Sy besteding aan die kleinhandelbrandstofbesigheid bereik egter nie die winsvlak wat die besteding vereis nie.

Die maatskappy het skuld van R1,7 miljard, terwyl sy markkapitalisasie net meer as R1,6 miljard is. Die besigheid genereer kontant, wat lei tot skuld wat hanteerbaar is.

Die bestuur moet egter die skuldlas probeer verminder. Hulle het aan my gesê dat kapitaalinsameling om skuld te verminder, nie deel uitmaak van hul planne nie. Die werklikheid bly egter dat die vlak van skuld ’n risiko vir die onderneming is, veral tydens ’n pandemie.

Comair

Sal dié redding slaag?

’n Onlangse Comair-verslag het baie somber geklink; die maatskappy het aangedui dat hy eers in Oktober of November weer sal begin sake doen. Toe, net ’n week later, het ’n nuwe verslag verskyn waarin gesê is dat die maatskappy met sakereddingsverrigtinge begin het. Volgens die Comair-direksie is die plan dat ’n “terugkeer na bedrywighede moontlik sal wees sodra inperkings opgehef word”.

Dit is die teorie agter sakeredding; ondernemings wat dit aangaan, word geherstruktureer en skuld word verminder. Aandeelhouers kry die swaarste, maar die maatskappy kan ná die sakeredding weer begin werk. Die realiteit is dat dit nie altyd die geval is nie, want ek dink die meeste ondernemings begin te laat met sakeredding.

Comair het waarskynlik nie te laat begin nie en kan moontlik gered word.

Anheuser-Busch InBev

Kuiersluitings knel verkope

Anheuser-Busch InBev se resultate is gewoonlik nogal oninteressant. Dit bestaan uit plat tot baie beskeie volumegroei, met verdienste wat aangedryf word deur ’n fokus op die winsgewende premiumhandelsmerke met hul hoër pryse.

Dié situasie is normaal vir ’n internasionale onderneming in ’n sektor sonder groei (en wie drink nie bier nie – behalwe natuurlik ingeperkte Suid-Afrikaners?). Maar sy jongste resultate wys dat Maart se volumes jaar-tot-jaar 9,3% laer is, terwyl April s’n met 32% van verlede jaar se volumes getuimel het. Dit is ’n enorme daling vir dié soort volwasse bedryf.

AB InBev se resultate toon dat Maart se volumes jaar-tot-jaar 9,3% laer is, terwyl April s’n met 32% van verlede jaar se volumes getuimel het. Dit is ’n enorme daling vir dié soort volwasse bedryf.

Die syfers toon ook dat 58,9% van die bier in kroeë en restaurante gedrink word. Net meer as 40% word gekoop om by die huis en elders te drink. Met wêreldwye inperkings wat kroeë en restaurante gesluit hou, word daar nou baie min in kroeë en ander drinkplekke gedrink, en totale verkope het drasties gedaal. Dit sal natuurlik verbeter wanneer inperkings opgehef word, maar daarna sal dit nog ’n tydjie duur voordat die normale verkope weer hervat word.

PSG

Maak geld uit verwronge waardasies

In finweek se uitgawe van 7 Mei het ek ’n berig geskryf oor die PSG-groep se omsigtigheidsaankondiging wat verwys het na sy waarskynlike voorneme om sy belang in Capitec* te onknoop. Die groep het dit nou bevestig. Hy het nie besonderhede verstrek nie en hou moontlik deel daarvan. Maar as hy die hele belang ontknoop, sal PSG-aandeelhouers een Capitec-aandeel kry vir elke 6,5 PSG-aandele wat hulle besit.

Dit beteken die res van PSG is gewaardeer teen omtrent niks nie. Dit is een van die belangrikste redes vir die voorgestelde ontknoping. Die transaksie behoort te wees om PSG te koop en Capitec te verkoop en die res van PSG se waarde gratis te kry. Op die dag wat die voorgestelde ontknoping aangekondig is, was PSG egter plat en het Capitec 10% tot sy aandeelwaarde toegevoeg.

Vivo Energy

Inperking maak dalk minder seer

Vivo Energy se kwartaallikse handelsverslag toon hoe onkonvensioneel Covid-19 is. Vivo besit meer as 2 200 vulstasies in 23 Afrikalande. Brandstof word gewoonlik as onelasties beskou omdat die vraag redelik stabiel is en aan BBP-groei gekoppel is.

In Afrika is dit miskien effens voor BBP-groei, want ons sien ’n groeiende middelklas. Maar Covid-19 het dié onelastisiteit omvergewerp met inperkings wat gelei het tot veel minder rondryery en dus minder brandstofverbruik. Uiteindelik kan Vivo ’n kleiner impak sien, afhangende van die vlak van inperking in hul markte; let daarop dat hulle nie in Suid-Afrika bedrywig is nie.

Dit wys dat noukeurig beplande beleggingstrategieë nooit die moontlikheid van ’n wêreld met inperkings oorweeg het nie.

Meer oor:  Finweek  |  Simon Se Wenke
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.