Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Simon se aandele-wenke
4 Junie 2020

Simon Brown is die stigter en direkteur van die beleggingswebwerf JustOneLap.com en ’n kenner van die aandeelmarkte. In dié rubriek deel hy sy insigte in van die onlangse groot gebeure op die markte.

GRAND PARADE INVESTMENTS

Onsekerheid oor Burger King

Grand Parade Investments het op 21 Mei gesê hy “heronderhandel oor die bepalings en voorwaardes” vir die verkoop van Burger King. Dus gesels hulle waarskynlik oor ’n laer verkoopprys vir die onderneming.

Ons gaan nog talle transaksies sien wat uitgestel of gekanselleer word, veral in die ontspanningsbedryf, want omset is ten gronde weens die ekonomiese inperking en dit bly onseker wanneer dinge na vlakke van voor die inperking sal terugkeer.

TENCENT

Dié indekse al spelend hoër

Tencent se resultate vir die eerste kwartaal van sy 2020-boekjaar toon ’n 19%-toename in intekenare op rekenaarspeletjies, terwyl die algehele groepinkomste 26% hoër was. Nie juis verbasend nie, ons het die oplewing in speletjies tydens die inperking gesien en die beweging in Tencent het Prosus en Naspers* tot nuwe hoogtepunte laat klim.

Aangesien dié twee aandele steeds meer as 25% van die top-40-indeks uitmaak en in die beperkte top-25-nywerheidsindeks van die FTSE/JSE byna 40% verteenwoordig, het dit albei indekse opgestoot. Dit gee ’n verdraaide voorstelling van hoe sterk plaaslik genoteerde aandele in die algemeen is, aangesien die onlangse opwaartse lopie grootliks danksy dié twee aandele en hul konsentrasie op speletjies in die algemeen en China in die besonder was.

ASPEN

Spotgoedkoop in grendeltyd

Aspen se wins gaan daal na hy R3 miljard van sy ontasbare bates afgeskryf het.

Die medisynevervaardiger Aspen Pharmacare het onlangs sy handelsverklaring van Maart herbevestig waarin hy aangedui het hy verwag sy genormaliseerde wesensverdienste per aandeel (WVPA) vir die voljaar tot einde Junie sal hoër wees as die R13,50 wat hy in 2019 aangeteken het. Ek het dit nie verwag nie, al is Aspen op die gesondheidsterrein werksaam.

Die private hospitaalgroep Life Healthcare se verdienste per aandeel (VPA) vir die ses maande tot einde Maart het byvoorbeeld met 12% opgeskiet, maar die maatskappy verwag voljaar-VPA van 20% laer. Dit wys hoe hospitaalgroepe onder die pandemie ly.

Gewis is medisynemiddels dus ’n beter terrein vir genoteerde maatskappye. En ofskoon Aspen se aandeelprys tot sowat R135 geklim het, is die verwagte p/v 10 keer op WVPA van 1 350c en bied die aandeel steeds waarde, veral in die wêreld van Covid-19 waar min aandele goedkoop lyk.

BARLOWORLD

Tongaat-kopie versuur

Barloworld, wat Tongaat Hulett se styselonderneming sou koop, probeer nou om uit die transaksie te onttrek en beweer die pandemie het ’n klousule oor iets “wesenlik nadelig” laat inskop, wat hom toelaat om die ooreenkoms te beëindig.

Tongaat verwerp die gedagte en sê die transaksie moet voortgaan – ek vermoed die hof sal moet besluit. Hoe dit ook al sy, die kanse dat transaksies tydens dié pandemie sal plaasvind is skraal, en dié wat voor die pandemie beklink is, sal waarskynlik nie deurgevoer word nie.

Ek stem saam dat daar wesenlik nadelige gebeure was weens die ekonomiese inperking as gevolg van die pandemie.

LIBERTY TWO DEGREES

Sentrums ly

Liberty Two Degrees (L2D) het ná sy algemene jaarvergadering van 20 Mei ’n handelsverklaring uitgereik met hope besonderhede oor hoe dit met die kleinhandelsbedryf gaan. Hy sê sowat 60% tot 70% van die winkels wat plek huur in sy sentrums is weer in bedryf; die uitsondering is hoofsaaklik restaurante, wat toe bly.

Volgens L2D is voetverkeer terug op sowat 60% van wat dit voor die inperking was. Huurinkomste sukkel egter, met slegs 38,2% huurgeld ten volle betaal vir April en tot dusver effens beter vir Mei op 43%. Dit suggereer dat talle van die winkels wat nou oop is, steeds nie huur betaal nie – ná vyf weke van geen verkope op vlak 5 nie, kan hulle dit eenvoudig nie betaal nie.

’n Baie lang pad terug lê vir winkelsentrums voor. Ja, die ekonomie gaan stadigaan weer oop, maar kleinhandelaars bly onder druk, talle gaan nie oorleef nie en dit sal baie moeilik gaan om nuwe winkels te vind terwyl verbruikersvertroue gekneus bly. Niemand wil onder sulke omstandighede ’n nuwe winkel open of ’n nuwe sakeonderneming begin nie.

RICHEMONT

Hou kontant styf vas

Richemont se resultate tot einde Maart toon ’n 18%-daling in verkope vir die vierde kwartaal, met verkope in Hongkong en China vir dié kwartaal 67% laer weens die staat van inperking wat vroeg in Februarie in China begin het. Dit gee nogal ’n aanduiding wat ons van Richemont se verkope in die res van die wêreld vir die drie maande tot einde Junie kan verwag, want ander lande se inperking het later as China s’n begin.

’n Belangrike aankondiging rakende die dividend lui dat ’n “moontlike lojaliteitskema op grond van aandeelhouersbelang” oorweeg word. Later het Richemont uitgespel dat dit moontlik ’n opsiebewys pleks van ’n dividendbetaling sal wees. ’n Opsiebewys is die reg om aandele teen ’n vooraf bepaalde prys en ’n vervaldatum te koop. Kom ons veronderstel die vervaldatum lê ver genoeg in die toekoms om nie ’n kwessie te wees nie.

Wat Richemont dan voorstel, is dat ’n aandeelhouer nog aandele koop en daarvoor betaal eerder as om ’n kontantdividend te ontvang of die opsie op die mark te verkoop. Neem jy die opsiebewysaandele op, is Richemont die verkoper van daardie aandele, wat dit in wese vir die maatskappy ’n kapitaalinsamelingsprojek maak.

Dit terwyl Richemont met kontant van €2,39 miljard sit. Vir ’n aandeelhouer behoort dit eenvoudig te wees: “Gee my die kontantdividend, as ek ’n opsiebewys wou gehad het, het ek dit gekoop.” Naas die aankondiging in sy resultate van ’n moontlike nie-kontantopsie vir sy dividend, het Richemont skuld van €2 miljard op die effektemark ingesamel. Met ’n reeds kontantryke balansstaat, maak die maatskappy hom duidelik gereed vir ’n klompie moeilike jare vorentoe.

HULPBRONNE

PGM-pryse is ’n raaisel

Die meeste hulpbronpryse het tydens die pandemie verbasend sterk gebly (met olie grootliks die uitsondering) en ek vermoed twee faktore speel ’n rol. Die eerste is dat myne oral ter wêreld meesal nie teen volle vermoë in bedryf is nie. Dit beteken minder voorraad kom op die mark, terwyl die vraag ook afgeneem het.

Tweedens gaan groot infrastruktuurprojekte sekerlik deel vorm van regerings se antwoord op die pandemie, wat die vraag na nywerheidshulpbronne sterk sal laat styg. Die risiko is natuurlik dat regerings ’n tekort aan geld gaan hê ná hul regstreekse hulp aan maatskappye en individue. Die veerkragtigheid van die platinumgroepmetale (PGM’e) slaan my egter dronk.

Wêreldwyd het voertuigverkope in duie gestort en verbruikersvertroue gaan lank vat om te herstel. Voeg hierby die hoofstuk 11-bankrotskap van die verhuringsreus Hertz, wat kan meebring dat sy vloot van 400 000 gebruikte motors die tweedehandse motormark oorstroom, en die PGM-vraag moet die laagste wees wat dit in jare was, met min vooruitsig dat dit gou sal herstel. So, óf die aanbod het in duie gestort (wat moontlik is) óf pryse berus op ’n vinnige herstel, wat ek as onwaarskynlik beskou op dié gebied.

NEDBANK

Nuwe lig op skuld

Ook Nedbank het ’n insiggewende handelsverklaring uitgereik, met die vernaamste indruk sy opmerking dat “vooruitskouings in die huidige omgewing is ingewikkeld en in ’n groter mate as gewoonlik aan voorspellingsrisiko onderhewig”.

Dis die belangrikste punt rakende werksaamhede tydens die eerste pandemie in langer as ’n eeu: onsekerheid voer die botoon. Nedbank sien nietemin dat waardedalings na die bopunt van sy teikenband beweeg, wat ’n gawe statistiek is want dis nog vroeg in die dag. Om waardedalings te hanteer, het die groep R81 miljard van korporatiewe en private skuld herskeduleer.

Nedbank het R81 miljard van korporatiewe en private skuld herskeduleer. Dis ’n groot syfer, gelykstaande met meer as 10% van sy totale lenings.

Dis ’n groot syfer, gelykstaande met meer as 10% van sy totale lenings en voorskotte ter waarde van R764 miljard. Selfs al is dit herskeduleer, kan baie van dié skuld steeds wanbetaal word namate individue en besighede onder groter finansiële druk kom.

DIS-CHEM

Geboortegolf?

Baby City gaan binnekort deel vorm van Dis-Chem.Foto: Skermgreep

Dis-Chem het op 15 Mei aangekondig hy het Baby City volledig oorgeneem teen R430 miljoen. Wins is nie bekendgemaak nie, maar inkomste vir die jaar geëindig Februarie was R855 miljoen.

Dis-Chem se nettowinsmarge is 24% en sou dit ook vir Baby City geld, beteken dit wins van meer as R20 miljoen en ’n prysverdienste-verhouding (p/v) van 21,5 keer. Dis duur, maar laer as Dis-Chem se p/v van meer as 30. Ek meen babaprodukte is uiters mededingend maar ook onelasties, met sowat 900 000 geboortes per jaar in Suid-Afrika. In die geheel is dit ’n aantreklike transaksie vir die groep.

Meer oor:  Finweek  |  Simon Se Wenke
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.