Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Simon se wenke
25 Junie 2020

Simon Brown is die stigter en direkteur van die beleggingswebwerf JustOneLap.com en ’n kenner van die aandeelmarkte. In dié rubriek deel hy sy insigte in van die onlangse groot gebeure op die markte.

RAUBEX

Hy bly bou

Raubex is een van die min oorblywende konstruksieaandele op die JSE. Hy het einde Mei behoorlike resultate vir die jaar tot 29 Februarie gepubliseer, en het gesê hy het die laaste paar maande ’n toename in tenderaktiwiteit ondervind.

Raubex is ook goed geposisioneer om voordeel te trek uit die 2019- geïntegreerde hulpbronplan, wat die kabinet in Oktober verlede jaar goedgekeur het, maar waarvoor tenders nog nie aangevra is nie. Nog ’n geleentheid is die infrastruktuurbesteding wat die regering waarskynlik beplan om die ekonomiese uitwerking van die pandemie te versag.

Gevolglik kan daar weer ’n bietjie werk in die sektor wees. Die probleem is egter dat daar ná jare van min aktiwiteit in die kontruksiebedryf beslis ’n ooraanbod van potensiële bieërs vir enige werk is, en dit beteken hoogs mededingende bieëry wat uiteindelik oor prys gaan – en dis ’n risiko.

Daar was al plaaslike konstruksiemaatskappye met verliesgewende projekte. Terwyl dit doelbewus kan wees in ’n poging om toerusting en vaardighede te behou, word winsgewende projekte vanselfsprekend verkies.

INDEKSE

Redefine val uit indekse

Daar is bevestig dat veranderinge aan die JSE se indekse op 19 Junie sou plaasvind. Redefine val uit die FTSE/JSE se top-40-indeks én die FTSE/JSE se indeks van 15 finansiële aandele (Fini) en word deur onderskeidelik Exxaro en Quilter vervang.

Dit herinner my altyd daaraan dat die Fini baie genoteerde eiendom bevat, nie net bankaandele nie. Geen verandering is vir die FTSE/JSE se indeks van tien hulpbronaandele aangekondig nie.

HYPROP

Bietjie hoop vir winkelsentrums

’n Verklaring deur Hyprop Investments in die tweede week van Junie bevestig die tendens waarop Liberty Two Degrees ’n paar weke gelede gedui het. Gemiddeld 80% van winkels in sentrums is tans oop, terwyl die koers by winkelsentrums met meer sit-restaurante laer is omdat die restaurantsektor nog grootliks gesluit is.

Die voetverkeer neem ook toe, en in die eerste week van Junie (net nadat Suid-Afrika na inperkingvlak drie oorgeskakel het), het dit tot 76% toegeneem. Huurgeldinvordering verbeter ook, maar daar is tekens dat verskeie winkels eenvoudig nie die aanvanklike fases van die inperking oorleef het nie, en dit gaan moeilik wees om die leë spasie te vul.

Die JSE se indeks van genoteerde eiendom het vroeg in Junie met 25% gestyg, maar weer teruggesak omdat toestande moeilik bly en waardasies onmoontlik is om te bepaal.

VALUE GROUP

Op lang termyn

Value Group se resultate was werklik uitstekend, selfs al is dit vir die jaar tot Februarie. Dié nywerheidslogistiekmaatskappy se wesensverdienste per aandeel het met 22% tot 92,2c gestyg, wat ’n p/v van vyf beteken. Hy het ’n finale dividend van 24c per aandeel verklaar, wat ’n dividend van 40c vir die jaar beteken en hom ’n dividendopbrengskoers van net meer as 9% gee.

Sy netto batewaarde is 564,6c per aandeel, waarvan sowat 150c kontant is. Dis waar dat logistiek tydens die inperking en in ’n ekonomie wat al jare lank sukkel op ’n baie moeilike plek is. Die feit dat die groep dié resultate behaal het tydens die resessie in SA voordat die pandemie toegeslaan het, dui op sy sterk bedryfsvermoë. Die punt hier is dat Value Group lankal op uiters aantreklike waardasievlakke verhandel, en daarom vra ek altyd wat die situasie kan verander. Dalk sal die verandering hier denotering wees – óf ’n bestuursuitkoop óf dalk deur Lougot Property, die meerderheidsaandeelhouer.

Met dié dat Lougot meer as 50% hou, sal hy beslis enige denotering moet goedkeur, en dit kan ’n derdepartyaanbod beperk, tensy dit met ’n werklik sappige premie gepaard gaan.

Met dié dat Lougot meer as 50% hou, sal hy beslis enige denotering moet goedkeur, en dit kan ’n derdepartyaanbod beperk, tensy dit met ’n werklik sappige premie gepaard gaan. Die werklike probleem is egter dat die huidige handelstoestande tydens die pandemie moeilik is in ’n ekonomie onder voortgesette druk. Dapper beleggers moet hom egter beslis as ’n lagtermyn-opsie en ook as ’n moontlike denoteringsteiken oorweeg.

OCEANA

Laat dié een maar wegkom

Oceana is ’n aandeel wat ek lankal dophou, maar die aandeelprys het die afgelope vyf jaar meestal gedaal. Hy verhandel selfs ná die lang daaltydperk teen ’n prys-verdienste-verhouding (p/v) van sowat 13, wat omtrent billike waarde is. In die resultate vir die ses maande tot einde Maart – wat begin Junie uitgereik is – was die inkomste en wesensverdienste per aandeel onveranderd.

Geblikte vis (waaronder Lucky Star) is een van sy hoofbedrywighede en ’n bron van proteïen vir baie Suid-Afrikaners. Terwyl verbruikers onder die ekonomiese uitwerking van die koronaviruspandemie worstel, kan die vraag daarna toeneem.

Die probleem is egter dat die maatskappy vis moet koop om te blik omdat die toegelate sardynvangs min bly. Dit knou die marges. Voeg daarby dat Amerikaanse bedrywighede vangste op historiese laagtepunte verklaar het, en die beleggingsargument vir die aandeel bly swak. Ek hou steeds van die bedryf as ’n beleggingsidee, maar staatskwotas en lae vangstekoerse maak die waardasieproses in die sektor ingewikkelder. Gevolglik bly ek net weg.

CAPITAL APPRECIATION

Speler in finteg om dop te hou

Capital Appreciation, ’n maatskappy in finansiële tegnologie, word nie juis deur beleggers raakgesien nie, maar fantastiese resultate vir die volle jaar wat begin Junie gepubliseer is, het die belangstelling in die aandeel hernu.

Die maatskappy woel in wolkdienste vir finansiëledienste-maatskappye. Daar is ’n vraag daarna omdat die sektor van die huis af werk. Hy bied ook betaalnetwerkinfrastruktuur aan die bedryf en terminale aan kleinhandelaars.

SA het finansiëledienste-infrastruktuur van wêreldstandaard, maar dit raak verouderd, en Capital Appreciation het nuwe tegnologie wat by die groot finansiëledienste-spelers posvat. Hou hom dop, veral omdat die bestuur genoeg vertroue gehad het om die dividenduitkering met 17,6% te vergroot.

TSOGO SUN GAMING

Bedryf in skuldslaggat

Tsogo Sun Gaming se resultate vir die jaar tot Maart wys nie veel meer as ’n skuldlas van R11,2 miljard nie. Dis amper dubbel sy markkapitalisasie, selfs nadat die aandeel in die weke voor die uitreiking van die resultate met meer as 300% gestyg het.

Die dobbelbedryf se probleem is dat dit nog heeltemal ingeperk word en nog lank nie gaan heropen nie. Hy het aansoek gedoen om vroeër as die huidige verwagting van vlak een te heropen, maar selfs as toestemming gegee word (wat ek dink onwaarskynlik is), bly die probleem sosiale afstandhouding en dobbelmasjiene in casinokroeë – wat beteken dat casino’s teen laer kapasiteit sal werk.\

Die dobbelbedryf se probleem is dat dit nog heeltemal ingeperk word en nog lank nie gaan heropen nie.

Dis waar dat enige inkomste beter as niks is, maar die kwaai druk op die bedryf (en eintlik die hele ontspanningsbedryf) duur voort en skuldlaste is ’n baie werklike risiko. Uitleners sien af van skuldooreenkomste en herstruktureer skuld, maar die skuld gaan nie weg nie en sal uiteindelik terugbetaal moet word. Selfs met uitleners se hulp sal die skuldlaste daarom die verdienste nog baie jare lank aansienlik belemmer nadat bedrywighede weer begin is.

MEDICLINIC

Regering se ooreenkoms is dalk te min

Mediclinic International se resultate vir die volle jaar tot einde Maart sê weer vir ons min te midde van die koronaviruspandemie. Die kommentaar wat saam met die resultate vir die inperkingtydperk uitgereik is, wys dat terwyl hospitale dalk tydens ’n pandemie na ’n goeie plek vir beleggers lyk, dit in werklikheid nie is nie. Voor die verwagte toename in Covid-19-hospitaalgevalle ondervind hy min bednagte omdat nienoodsaaklike chirurgie uitgestel word en traumagevalle grootliks verminder is weens die inperking wat die regering ingestel het (en die verbod op alkoholverkope tot einde Mei).

Luidens onlangse berigte het die regering met die hospitaalgroepe ooreengekom op ’n prys vir pasiënte in die openbare sektor wat in private hospitale opgeneem word. Dié ekstra vraag na bednagte sal egter waarskynlik voorkom wanneer die vraag gewoonlik ’n hoogtepunt bereik, en sal daarom nie bykomende bednagte bydra nie omdat die hospitale die bykomende vraag van pasiënte in die private sektor sou kry.

Twee aandele in die mediese omgewing wat aanhou goed vaar, is Aspen Pharmacare en Adcock Ingram – en albei het behoorlike verwagte waardasies, selfs nadat hul aandeelpryse die laaste maande gestyg het.

Meer oor:  Finweek  |  Aandele  |  Simon Se Wenke
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.