Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Simon se aandele-wenke
30 Julie 2020

RICHEMONT

Dowwe vooruitsig vir glansgoed

Richemont se handelsverklaring vir die kwartaal tot Junie het die volle streng inperking wêreldwyd gedek, en soos verwag, was dit flou. De Beers se diamantverkope het ook basies in die eerste helfte van die jaar ineengestort, soos Anglo American aangekondig het.

Richemont wys daarop dat baie van sy verkope aan toeriste is, en die inperking en huidige verbod op reis beteken geen toeriste nie en daarom ’n ineenstorting van verkope. Wanneer lande en grense weer oopgestel word, kan ’n mens verwag dat die verkope van luukse goedere sal toeneem. Dit sal egter stadig wees, terwyl ekonomieë en verbruikers finansieel bly sukkel, en verbruikersvertroue sal laag wees.

Die groot vraag is wat die langtermyn-uitwerking op die verkope van luukse artikels sal wees, al sal hulle beslis oorleef. Ek wonder egter of een van die uitkomste van die inperking ’n begeerte na meer menslike ervarings eerder as die besit van materiële dinge sal wees. Een van die gevolge van die inperking is dat, selfs al word ons deur ons besittings omring, ons werklik ervarings mis – of dit nou besoeke deur vriende, uitstappies, vakansies of selfs net wandelinge in die park is. Sal dit ná die inperking deels voortduur?

TFG

Kry ’n winskoop

TFG, vroeër The Foschini Group, het 371 lewensvatbare Jet-winkels vir R480 miljoen by Edcon gekoop. Dit sluit R800 miljoen se voorraad en huuraanspreeklikhede van sowat R1 miljard in.

Dit plaas TFG stewig in die waardesegment van die kleremark – ’n terrein waarop hy nie vantevore bedrywig was nie. Die koopprys vir Jet lyk goed, al moet hy nou die voorraad verkoop en die onderneming mettertyd van Edcon se betaalpunt- en voorraadstelsel ontkoppel.

TFG het ’n regte-uitgifte van R3,95 miljard aangekondig wat deur RMB, Standard Bank en Absa onderskryf word. TFG sal só meer as die helfte van sy skuld kan terugbetaal wat hom in ’n sterk posisie laat. Die regte-uitgifte van 40 nuwe aandele vir elke 100 wat besit word, is egter baie verwaterend vir aandeelhouers en word teen TFG se laagste aandeelprys in ’n dekade gedoen.

OMNIA

Vinnige omswaai

Omnia se resultate vir die volle jaar tot Maart toon ’n sterk omswaai van ’n maatskappy wat net ’n jaar gelede baie behoeftig gelyk het toe dit ’n regte-uitgifte van R2 miljard gedoen het.

Die meeste omswaaie neem langer as verwag, met Altron die enigste ander onlangse uitsondering. Die nuwe bestuur moet krediet kry omdat hy die nuwe kapitaal goed gebruik het en nie nog meer sal benodig nie. Omnia is egter steeds in ’n baie moeilike mark, en al sal ek die maatskappy fyn dophou, bly die risiko’s werklik, en ek dink nie dis dit werd om op dié punt van ons bedrukte ekonomie te koop nie.

GENOTEERDE EIENDOM

Uitkerings krimp

Handelsverklarings deur Liberty Two Degrees (L2D) en Growthpoint was basies soos verwag, al het laasgenoemde veel minder besonderhede bevat. Growthpoint se uitkeerbare inkomste per aandeel sal minstens 15% minder wees, terwyl L2D veel meer besonderhede verkaf het en skat dat eiendomswaardasies met tussen 10% en 20% sal daal, en dit sal lening-tot-waarde- verhoudings knou namate eiendomme se waardasies val (sien ook bl.34).

Maar soos ek al geskryf het, gaan uitleners nie lenings tydens ’n pandemie oproep nie, want hulle wil nie die eiendomme besit nie.

L2D het gesê hy verwag dat sy uitkeerbare verdienste per aandeel tussen 40% en 55% laer sal wees.

L2D het ook gesê hy verwag dat sy uitkeerbare verdienste per aandeel tussen 40% en 55% laer sal wees. Let daarop dat dié twee maatskappye verskillende maatstawwe gebruik: Growthpoint verwys na inkomste, terwyl L2D na verdienste verwys.

Inkomste is die syfer voordat koste afgetrek word, terwyl verdienste die syfer is nadat uitgawes afgetrek is en wat beskikbaar is om aan aandeelhouers uit te keer. Al lyk die verskil groot, sal hul volle resultate daarom waarskynlik baie ooreenstem.

QUANTUM FOODS

Knuppel in die hoenderhok

Quantum Foods het op die JSE verskyn toe dit laat in 2014 uit Pioneer Foods ontknoop is, maar daar was nie werklik ’n ophef of opgewondenheid oor die nuwe aandeel nie. Dis ’n hoëgehalte- maar sikliese eieronderneming, en die aandeel het tot onlangs toe tussen 250c en 450c per aandeel verhandel.

Toe, middel Junie, het Zeder sy belang van 30,8% verkoop wat hy geërf het toe Pioneer die aandeel ontknoop het, en dit lyk of almal nou ’n deel van Quantum wil hê. Country Bird Holdings het die Zeder-belang gekoop en wou blykbaar aanvanklik die hele onderneming oorneem, maar het toe daarteen besluit.

Middel Junie, het Zeder sy belang van 30,8% verkoop wat hy geërf het toe Pioneer die aandeel ontknoop het, en dit lyk nou of almal ’n deel van die onderneming wil hê.

SilverStreet Capital van Luxemburg (wat ook ’n belang in Crookes Brothers* besit), het die maatskappy laat weet dat hy deur ’n filiaal ’n belang van 32% by ’n onbekende ver- koper sou koop.

Direkteure het ’n paar aandele gekoop, en uiteindelik het Astral 6,4% verkry om die voortsetting van sy langtermyn-ooreenkoms vir die voorsiening van braaikuikens te verseker. Die aandeel het tot 1 157c opgeskiet, maar was by die skryf hiervan terug net bo 700c omdat beleggers besef het daar is ’n dooie punt, met geen oornamebod wat kan slaag nie, weens al die beduidende blokkerende belange.

Ek besit nie enige van die aandele nie, maar as ek het, sou ek wou verkoop teen die beste prys wat ek kon kry.

Geen verdere korporatiewe bedrywighede sal waarskynlik voorkom nie, en daarom sal die prys beslis terugkeer na die vlakke waar dit voor al die opwinding was. Dis die geval, selfs al is die verklaarde netto batewaarde net minder as 920c per aandeel. Al wat die prys verander het, was die moontlike uitkoop van minderhede, nie ’n grondliggende heraanslag van die maatskappy nie.

AANDELEBEURSE

Nuwe regulasie oor uitvoering

Die Gedragsowerheid vir die Finansiële Sektor het ’n nuwe voorgestelde wet oor beste uitvoering aangekondig. Dit beteken dat wanneer jy ’n aandeel deur jou aandelemakelaar koop, hulle nie net kan aanbied om op die JSE te verhandel nie. As die wet ingestel word, sal hulle ook ander plaaslike beurse waarop die aandeel genoteer is (dit sal meestal A2X wees) moet nagaan, en as die prys op die ander beurs beter is, sal hulle daarteen moet verhandel.

Dit het reuse-gevolge vir beleggers, wat soms beter pryse sal kry wanneer hulle koop of verkoop. Die aandelemakelaars sal hul stelsels moet opgradeer om verhandeling op verskeie beurse moontlik te maak. En die JSE sal natuurlik druk ondervind en beslis verhandelingsvolume verloor omdat A2X dikwels danksy laer tariewe beter pryse het.

Die wet sal eers in die eerste helfte van aanstaande jaar van krag word, en ek reken baie mense was waarskynlik daarteen gekant in die opmerkingstydperk, wat onlangs gesluit het. Uiteindelik is dit egter in die beste belang van die mark en beleggers.

TASTE

Pas op vir prysbepaling

Taste Holdings het vroeg in Julie gesê hy sal sy naam na Luxe Holdings verander omdat sy oorblywende bates twee juwelierswareondernemings sal wees nadat hy hom aan voedselbedrywighede onttrek het. Hy het ook ’n 100:1-aandeelkonsolidasie aangekondig.

As jy 100 aandele hou, sal jy dus ná die konsolidasie net een oorhê. Dit is om met ware prysbepaling te help – wat onmoontlik is as ’n aandeel teen net ’n paar sent verhandel. Dit beteken egter ook dat die aandeelprys sal daal – dalk noemenswaardig – as dit veel laer as die huidige prys vasgestel word.

PAN AFRICAN RESOURCES

Barberton kry goud!

Pan African is die beste klein goudmynmaatskappy, self al is dié lys eerlikwaar kort, met DRDGOLD die enigste ander klein speler. Pan African se bedryfsverklaring vir die jaar tot 30 Junie – wat op 10 Julie uitgereik is – bevat besonderhede van sy New Consort-myn naby Barberton – waar die graad soms só hoog is dat jy die goud met die blote oog kan sien.

Sommige gebiede het na berig word 300 gram per ton (g/t), met gemiddeld 25 g/t. Oor die algemeen word 10 g/t as uitstekende hoëgraad-inhoud beskou, met baie myne wat minder as 5 g/t kry. Selfs teen 25 g/t is dit dus ’n buitengewone ertsliggaam wat Pan African gaan ontgin, en teen 25 g/t kan dit ’n mynmaatskappy met reeds lae koste help om sy koste selfs verder te verlaag.


Meer oor:  Finweek  |  Simon Se Wenke
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.