Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Só werk waardebelegging
13 September 2018
Foto: Shutterstock

In die 30 Augustus-uitgawe van finweek het ek geskryf oor die gebruik van ’n momentumstrategie en hoe om die uitgangsprys te vergroot.

Tipies is momentum meer ’n handelstrategie, maar dit kan goed werk in ’n portefeulje as ’n verskillende styl. In dié uitgawe kyk ek hoe ’n mens munt kan slaan uit ’n waardebeleggingstrategie. Waarde is wat die meeste beleggers soek wanneer hulle koop (met die uitsondering van momentumhandelaars), maar wat verskil, is hoe ons waarde definieer.

Verskillende beleggers sal dit verskillend omskryf. Die belegger en ekonoom Benjamin Graham se benadering tot waardebelegging word as klassieke waardebelegging beskou – en hy word beskou as die vader van waardebelegging. Ek gaan fokus op hoe waardebelegging werk om wins te skep en wanneer om uit te klim.

Die eerste truuk is om ’n aandeel te vind wat aan die kriteria van waarde voldoen. Ek kan ook gehalte byvoeg, en hier fokus ek op my tweedevlak-portefeulje, wat bestaan uit gehalte klein- en middelkapitaalaandele wat ek hou vir so lank as wat die waarde voortduur. Dit kan dikwels jare duur, en partykeer ’n dekade of meer.

Ek gaan Santova* as my voorbeeld gebruik. Toe ek die aandeel die eerste keer ontdek het, het dit verhandel teen sowat 90 sent per aandeel, met ’n wesensverdienste per aandeel (WVPA) van 18 sent van die vorige jaar. Dit het ’n prys-tot-verdiensteverhouding (p/v) van 5 keer (’n baie eenvoudige waardemetriek) beteken.

Ek het van die maatskappy gehou en was gelukkig daarmee dat dit ’n gehaltemaatskappy was, met gehaltebestuur en bedrywig was in ’n sektor met groot groeipotensiaal. Dié drie vereistes is belangrik, omdat ’n mens prys- en winsaandrywers nodig het.

Waarde is wat die meeste beleggers soek wanneer hulle koop (met die uitsondering van momentumhandelaars), maar wat verskil is hoe ons waarde definieer.

Nadat ek so bietjie ondersoek ingestel het, het ek besluit dat ’n billikewaarde-p/v vir Santova nader aan 13 keer sal wees en ’n wilde waarde hier by die 20 keer rond. Die billike p/v is waarteen die sektor gewoonlik in normale toestande verhandel, terwyl die wilde p/v bereik kan word wanneer die mark blom en algehele waardasies gerek word. Nie een van dié p/v-syfers is suiwer wetenskap nie, maar gee tog ’n algemene idee en neem plaaslike én internasionale eweknieë in ag.

Wanneer ’n mens na internasionale aandele kyk, moet jy versigtig wees omdat Suid-Afrika ’n ander mark is, en internasionale aandele oor die algemeen hoër waardasies het – maar hulle help om ’n algemene syfer te voorsien. Dus, om suiwer wiskunde te gebruik, as die aandeelprys ’n p/v kon bereik van 20 keer teen ’n WVPA van 18 sent, sou dit jou ’n prys van 360 sent per aandeel gee.

Maar dit hang af van hoe lank dit gaan neem om daardie p/v te bereik en wat op pad daarheen gebeur. Dit lei dan tot die volgende deel, waar ek myself afvra of die WVPA kan verdubbel in drie tot vyf jaar. Dit beteken geannualiseerde groei van 15% tot 25% om seker te maak dat die verdubbeling in daardie tydraamwerk geskied.

Dié deel is belangrik omdat daar nou twee hefbome is wat op die prys inwerk – lae p/v (waarde) wat hoër beweeg en die onderliggende WVPA wat verbeter – en albei voer ’n hoë aandeelprys. In die geval van Santova was ek gelukkig omdat hy sy verdienste betyds verdubbel het, met ’n verdubbeling van WVPA tot 36 sent en ’n p/v van 13 keer, wat my ’n aandeelprys van 468 sent gegee het. Ek hou die WVPA noukeurig dop, want as dit nie vining genoeg groei nie, sal ek verkoop en na die volgende aandeel begin soek.

Santova se WVPA het in die jongste resultate gestyg tot 44 sent per aandeel, en teen die huidige aandeelprys van 403 sent, is hy op ’n p/v van net meer as 9 keer. Ek hou dus (en het aangevul) omdat ek meen hy kan weer sy WVPA in die volgende drie tot vyf jaar verdubbel en dan tot ’n p/v van minstens 13 styg – wat op ’n aandeelprys van 1 144 sent sou dui.

En as hy ’n p/v van 20 kan bereik, dan beteken dit ’n selfs beter prys van 1 760 sent. Ek sal verkoop as die WVPA-groei verswak, of teen ’n p/v van 20 keer. Tot dan, solank as wat Santova aan my gehaltevereistes voldoen, behou ek dit en pas my verwagtings aan.

* Stuur 'n boodskap aan terugvoer@finweek.co.za

* Die skrywer besit Santova-aandele.

Meer oor:  Momentum-Strategie  |  Finweek  |  Santova  |  Beleggingsraad  |  Simon Brown
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.