Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Stimulusmaatreëls gee aandele energie
25 Junie 2020

Ná hul ineenstorting in Maart het markte plaaslik én wêreldwyd verstewig. Aan die voorpunt was die Nasdaq met ’n styging tot nagenoeg sy hoogste vlakke ooit, terwyl die S&P 500 terug is op bokant 3 100, goed op pad na sy allerhoogste vlak van 3 386.

Foto: Shutterstock

Albei indekse het in Februarie rekordhoogtepunte aangeteken. Die plaaslike FTSE/JSE top-40-indeks verhandel by die skryf hiervan net onderkant 49 000, teenoor 51 500 begin vanjaar.

Die top-40 se allerhoogste vlak was kort onderkant 54 000 in November 2017. ’n Kykie na dié vlakke kan ’n mens met reg laat vra: watter pandemie? Waardasies is tot op rekordvlakke oorspanne.

Die verwagte prys-verdienste-verhouding (p/v) van die S&P 500 is duurder as ooit tevore, op twee uitsonderings ná: tydens die dotcom-oplewing van 2001 en die krisis van 2008. Eersgenoemde het ’n jare lange treurmare afgegee, terwyl laasgenoemde die langste en sterkste bulmark in die geskiedenis van Amerikaanse markte ingelui het danksy die Amerikaanse Federale Reserweraad (Fed) se stimulusmaatreëls. ’n P/V is ’n historiese syfer.

Om dit te bereken, word die huidige aandeel- of indeksprys geneem en dié vlak word dan deur die jongste jaarlikse verdienstesyfer gedeel om die waarde te kry. ’n Verwagte p/v word bereken deur die verwagte verdienstesyfer vir die volgende jaar deur die huidige prys te deel.

Die verwagte (“forward”) p/v is ’n beter manier om waarde te meet, maar ook moeiliker, want ons moet probeer uitwerk wat die volgende jaar se verdienste sal wees. Vir die S&P 500 staan die huidige historiese p/v op 22,4 keer – dis alreeds ’n absolute hoogtepunt, behalwe vir 2008 en 2001.

Maar wat sal die verdienstesyfer vir die volgende jaar wees? Sal dit minstens 20% laer wees?

Dan kan ons daardie historiese p/v opwaarts aanpas met 20% om ons ’n verwagte p/v van minstens 26,9 keer te gee. Plaaslik is die top-40 se p/v tans 16,1 keer en ’n 20%-afname in verdienste laat dit tot 19,3 keer styg. Nie so sleg soos die S&P 500 nie, maar steeds duur. ’n Verdienstesyfer van 20% laer is waarskynlik egter ’n bestegeval-scenario; dinge kan erger wees.

Daar is egter ’n eenvoudige verklaring hiervoor: die stimuluspakkette wat regerings oral ter wêreld aangekondig het en in werking stel, vernaamlik die Fed. Op grootliks dieselfde wyse as ná die wêreldwye finansiële krisis van 2008-’09 pomp sentrale banke op groot skaal geld in die stelsel in om likiditeit te skep en markte kop bo water te laat hou.

Ek bly egter op my hoede vir individuele aandele en wag eerder om resultate te sien wat handelstoestande tydens die pandemie insluit, sodat ek ’n duideliker prentjie kan vorm.

Dit plaas enorme hoeveelhede kontant in sirkulasie en weens lae rentekoerse vloei dié kontant na aandelemarkte toe. Dit het in Amerika begin, maar ons sien toenemend hoe dit na ontluikende markte soos ons s’n vloei. Markwaarnemers kan dink dis malligheid en dat absolute hoogtepunte en oorspanne waardasies tydens ’n pandemie gek is. ’n Ou waarheid is egter, “moenie teen die Fed baklei nie”. Wanneer die Fed met mag en krag tot die redding galop, wil niemand in sy pad staan nie en markte sal verstewig. Ons moet egter ook besef die mark gee te kenne dat die ergste verby is.

Die aankopebestuurders-indeks vir Mei toon verseker ’n sterk styging vanaf April se rekord- lae vlakke – hoewel die indeks steeds onder die vlak van 50 is, wat op ’n inkrimping dui. Ons kan ons kop in ongeloof skud, maar ons kan dié geveg nie wen nie, dus gaan ek soos altyd voort om elke maand ETF’s te koop.

Ek bly egter op my hoede vir individuele aandele en wag eerder om resultate te sien wat handelstoestande tydens die pandemie insluit, sodat ek ’n duideliker prentjie kan vorm. Dit beteken wel ek loop ’n bietjie van die stygaksie mis, maar ek slaap snags beter terwyl ek op die kantlyn wag. Daar sal wenners (tegnologie-aandele) en verloorders (aandele in die sektor vir ontspanning en vermaak) ná die pandemie wees en party is ooglopend, maar talle sal ons verras. Waaksaamheid bly dus die wagwoord.


Meer oor:  Finweek  |  Aandele
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.