Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Tegnologie-aandele: Al weer borrelpraatjies
10 September 2020
Foto: Shutterstock

Die Nasdaq en S&P 500 wat opnuut rekordhoogtepunte aanteken, laat vrese ontstaan oor ’n markborrel wat deur die realiteit van ongunstige ekonomiese toestande geprik kan word.

Die Amerikaanse markte lyk uit pas uit met die ekonomiese werklikhede van ’n internasionale pandemie wat uiters aktief bly, plus swak maatskappyverdienstes en gedempte ekonomiese data – selfs die Amerikaanse Federale Reserweraad (Fed) waarsku dat meer onsekerheid voorlê.

Tog is alle markverliese sedert Maart ingehaal en die Nasdaq het sedert Januarie met meer as 25% opgeskiet. Die miljardêr-belegger George Soros is onder dié wat waarsku ’n borrel kan binnekort bars, soos met die internet-borrel in 2000.

Batebestuurders waarsku die Amerikaanse ekonomie sal moontlik nie in die verlangde V-vorm herstel soos verwag nie, maar eerder ’n K-vorm aanneem waar party maatskappye herstel en ander steeds die wind van voor kry.

Anders as met die skerp styging in tegnologie-aandele is aandele op die S&P 500 gemiddeld sowat 30% onderkant hul hoogtepunte, wat maak dat sommiges die indeks herdoop het tot die ‘S&P 5’ om die ongesonde markoorheersing van die suksesvolle tegnologiemaatskappye te weerspieël. Data wys dat daar nog nooit so ’n konsentrasie van tegnologie-aandele op die S&P 500 was soos die afgelope tyd nie.

Twintig jaar gelede het die vyf topaandele in die indeks ’n markkapitalisasie van sowat $2 duisend miljard gehad om net minder as 5% van die totale markkapitalisasie uit te maak. Nou het die markkapitalisasie van die topvyf – Amazon, Microsoft, Apple, Alphabet (Google se eienaar) en Facebook – tot meer as $6 000 miljard gestyg om meer as 21% van die totale markkapitalisasie uit te maak, die hoogste in 30 jaar. Apple het op 19 Augustus ’n rekord-markkapitalisasie van $2 000 miljard bereik.

Aangesien dit grootliks te wagte was, is die eintlike storie miskien dat Apple net enkele dae later nog $130 miljard daarby gevoeg het, ’n styging vergelykbaar met die totale batewaarde van die Chinese tegnologiegroep Huawei.

Dis net die begin, sê markkenners. Die bekendstelling van die nuwe generasie iPhone 12 in die komende maande dui op verdere opwaartse momentum vir Apple, met ’n latere markkapitalisasie van $3 000 miljard in sig. Op ’n prys-verdienste-verhouding (PV) van 37 keer lyk Apple oorspanne, maar nie so oorspanne soos Amazon wat op ’n p/v van 140 keer verhandel nie.

Of Tesla op ’n verbluffende 1 000 keer nie. Dit lyk heel billik om van ’n markborrel en ’n dreigende korreksie te praat, maar dit sal van ’n katalisator van die een of ander aard afhang. In die internet-borrel van 2000 het tegnologiemaatskappye se kontant opgeraak voor die uittog begin het.

In 2008 was dit hoër rentekoerse wat gemaak het dat huiseienaars agterstallig geraak het met hul verbandpaaiemente en dit bepaalde finansiële instrumente negatief beïnvloed het – meesal in die subprima-kategorieë. Dit is onwaarskynlik dat dié twee kwessies ’n huidige tegnologieborrel sal laat bars.

Die groot tegnologiemaatskappye het deesdae groter hope kontant. Apple sit met $200 miljard, Microsoft met $136 miljard, Alphabet met $120 miljard en Amazon met ’n meer beskeie $40 miljard. ’n Mens kan jou kwalik voorstel dat ’n borrel wat bars maatskappye met groot kontantbronne negatief sal raak, veral nie terwyl die Fed tot sy beleid van lae rentekoerse verbind bly en met rentekoerse wat vir ’n aansienlike tydperk nog naastenby op nul sal bly staan nie. Wat dit ook meer onwaarskynlik maak, is dat fundamentele faktore blykbaar nie meer tel nie.

Nou het die markkapitalisasie van die topvyf – Amazon, Microsoft, Apple, Alphabet (Google se eienaar) en Facebook – tot meer as $6 biljoen gestyg om meer as 21% van die totale markkapitalisasie uit te maak, die hoogste in 30 jaar.

’n Hoë p/v is klaarblyklik nie meer iets wat beleggers afskrik om in ’n maatskappy te belê nie. Ook nie ’n oënskynlik oorwaardeerde markkapitalisasie of selfs groter markkonsentrasies nie, met Facebook en Google wat die Amerikaanse reklamemark nou met ’n markaandeel van meer as 50% oorheers. Normaalweg sou dit mededingers aantrek om die mark te betree.

Die mark word egter dermate deur die groot vyf oorheers dat ’n ontluikende mededinger gou teen ’n oornamebod te staan kom. Dit was onder meer die geval met Facebook wat Instagram en WhatsApp gekoop het en Microsoft wat LinkedIn by sy portefeulje gevoeg het. Dat die verwagte p/v vir die S&P 500 oor die volgende 12 maande tot 28 keer gestyg het, die hoogste sedert die internet-borrel in 2000 gebars het, is skrikwekkend. Weer kon dit egter nie ’n demper plaas op voorspellings dat die markkonsentrasie in die indeks binnekort verder kan toeneem nie.

Al is dit verleidelik om te dink ’n korreksie sal nie gebeur nie, baie soos die hoog-laag-konjunktuursiklusse van die verlede wat blykbaar soos mis voor die son verdwyn het, sal ’n infleksiepunt waarskynlik in ’n stadium ontwikkel. Dit is egter moeilik om te dink wat dit sal kan wees. Die opbrengs op die Amerikaanse tienjaar-staatseffek het vanweë die Fed se nuwe standpunt om inflasie te teiken effens verstewig van sowat 0,6% tot bokant 0,7%. Belegging in veilige bates is oënskynlik nie teenstrydig met die besit van riskante tegnologie-aandele nie.

Maarten Mittner is ’n vryskut- finansiële joernalis en markkundige.

Al sou effekte-opbrengste opskiet, kan dit die onderpresterende aandele op die S&P 500 negatiewer beïnvloed as die groot tegnologie-aandele. Goud het tot bokant $2 000 per ons gestyg, maar is nog verreweg nie op vlakke wat sou aandui beleggers is besorg dat inflasie binnekort sal styg of marktoestande erg onbestendig raak nie.

Nie eens ’n swartswaangebeurtenis soos die koronaviruspandemie het die groot tegnologiemaatskappye beduidend beïnvloed nie. Trouens, dit het hulle bevoordeel. Daar is eenvoudig bitter min wat dui op ’n tegnologieborrel wat binnekort sal afblaas.

* Stuur 'n boodskap aan terugvoer@finweek.co.za

* Maarten Mittner is ’n vryskut- finansiële joernalis en markkundige.


Meer oor:  Finweek  |  Tegnologie-Aandele
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.