Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Veldbrande en bankrotskap kan nuwe begin wees
30 Julie 2020
Petri Redelinghuys is ’n handelaar en stigter van Herenya Capital Advisors.

Ons langtermynaandeelkeuse is ’n maatskappy in Kalifornië wat pas bankrotskap net-net vermy het. Die maatskappy was in bankrotskapbeskerming omdat hy verantwoordelik gehou is vir veldbrande in Kalifornië weens kragdrade wat nie onderhou is nie en die dood van 85 mense veroorsaak het. Die hof het die nutsmaatskappy gelas om $25 miljard te betaal.

Die maatskappy is PG&E (PCG), en sy planne om uit bankrotskapbeskerming te kom, is onlangs goedgekeur. PG&E werk in ’n gereguleerde omgewing, en die meeste van sy inkomste word deur Kalifornië se kommissie vir openbare nutsmaatskappye beheer. Die kommissie bepaal die prys wat PG&E vra. Die koers wat die maatskappy tans op sy ekwiteit mag verdien, is 10,25%.

Hierdie ooreenkoms verval in 2022, met ander woorde die maatskappy het gewaarborgde gebruikers, aangesien die elektrisiteitsverbruik stabiel is, en hy het ’n gewaarborgde opbrengs op sy bates.

Groot risiko's 

Die groot risiko’s lê in meer veldbrande en groter aanspreeklikheid, maar iets het verander. Nuwe wetgewing is goedgekeur waarvolgens ’n fonds tot stand gebring is om veldbrandeise te hanteer. Dit bring ’n einde aan die onbeperkte verliese wat nutsmaatskappye in die gesig staar. Die wet het ’n fonds van $21 miljard ingestel om vir veldbrandeise te betaal.

Die eerste $1 miljard van ’n eis word deur die betrokke nutsmaatskappy betaal, en as die nutsmaatskappy as nalatig beskou word, kan die bedrag tot $2,4 miljard styg, maar dit is die perk.

Die fonds word gedeeltelik deur die nutsmaatskappye gefinansier en $10,5 miljard word deur kliënte gefinansier. Dit word gedoen deur $2,50 by hul maandelikse rekening te voeg. Aan die ander kant het PG&E die bos en veld rondom sy kraglyne begin opruim, en hy installeer nuwe toerusting wat nie so maklik brande kan veroorsaak nie. Hoewel dit byna ’n dekade sal neem om dit te doen, sal dit die risiko van meer brande verminder.

Die eerste $1 miljard van ’n eis word deur die betrokke nutsmaatskappy betaal, en as die nutsmaatskappy as nalatig beskou word, kan die bedrag tot $2,4 miljard styg, maar dit is die perk.

Ons hou ook van die feit dat die maatskappy onlangs kapitaal ingesamel het teen $9,50 per aandeel vir ’n totaal van $5 miljard en ook sy skuld heringedeel het. Die aandeel word as ’n koop deur 53% van ontleders aanbeveel, met ’n eenjaarteikenprys van $13,23. Die prys-tot-verdienste-verhouding vir volgende jaar is net nege maal, wat minder as die helfte van die bedryfsgemiddelde is.

As deel van die bankrotskapbeskermingskikking mag geen dividende tot 2022 betaal word nie. Die aandeel verhandel dus teen ’n diskonto teenoor sy eweknieë, en gevolglik dink ons dat daar ’n goeie langtermyngeleentheid bestaan.

Om op te som: PG&E het gewaarborgde inkomste en verdien ’n vaste opbrengs op sy beleggings. Die risiko’s uit aanspreeklikheid weens veldbrande is heelwat verminder deur die nuwe wetgewing in Kalifornië.

Nutsmaatskappye is meer bewus van die brandrisiko en bestuur dit nou proaktief. Ons beveel dié aandeel as ’n koop aan teen enige prys onder $12 vir ’n langertermynteiken van $20.

  • Stuur 'n boodskap na terugvoer@finweek.co.za
  • Petri Redelinghuys is ’n handelaar en stigter van Herenya Capital Advisors.
Handelsterme: Hoe om wisselvalligheidsindekse (VIX’e) te verhandel

Die “VIX” is ’n term wat dikwels in die beleggingswêreld voorkom, hoewel sy betekenis dikwels nie ten volle verstaan word nie.

Daarom gaan ons kyk wat die VIX is. Ons sal dit weliswaar nie in te veel detail bespreek nie, want dit raak taamlik ingewikkeld. Sodra ons die basiese beginsels van die VIX verstaan, kan ons begin kyk hoe dit gebruik kan word om ’n portefeulje te beskerm of om dit regstreeks te verhandel as ’n instrument om voordeel uit te trek.

Die VIX is deel van ’n ingewikkelde formule wat gebruik word om die waarde van ’n opsie te bepaal. Die formule staan onder die name van sy skeppers bekend, naamlik die Black-Scholes-formule. Daar is verskillende komponente van die Black-Scholesformule, maar die een waarin ons belangstel, is die wisselvalligheidskomponent. Hoe hoër die verwagte wisselvalligheid, hoe meer moet jy vir ’n opsie betaal.

Dit kan vergelyk word met korttermynversekering op jou motor: hoe groter van ’n risiko jy is, hoe meer moet jy betaal om dit te verseker. Dus, hoe hoër die VIX, hoe wisselvalliger sal die mark na verwagting wees.

Die VIX wat ons die meeste hoor, is die verwagte wisselvalligheid van 30 dae op die S&P 500. Die VIX verhandel gewoonlik tussen laagtepunte van ongeveer 10 tot hoogtepunte van 20. In wisselvallige omgewings kan die VIX bo 20 styg; daar was onlangs gedurende die Covid-19-ineenstorting in Maart hoogtepunte van meer as 100.

Kom ons kyk nou hoe die VIX gebruik kan word om die waarskynlikheid van ’n bodem ná ’n verkoop te vind. Die normale termynstruktuur van die VIX is dat VIX-kontrakte met langer looptye duurder is as VIX-kontrakte met korter vervaldatums. Dit lei tot ’n opwaartse helling.

Die voorbeeld in grafiek 2 is van 2015 – die groen lyn lyk soos ’n normale termynstruktuur; dus het maande wat verder weg is ’n hoër VIX as maande nader in die toekoms.

Kontrakte met langer looptye het groter wisselvalligheid omdat hoe minder tyd daar oorbly, hoe minder risiko is daar, en hoe meer tyd verloop, hoe waarskynliker dat ’n onbekende gebeurtenis kan voorkom. As iets gebeur wat paniek saai, styg die kortertermyn-VIX baie vinniger as die langertermyn-VIX.

Die blou VIX-termyn in grafiek 1 word getoon as ten volle omgekeer oor alle punte sodra die piek van die ineenstorting gebeur het. Die omkering dui nie die presiese laagtepunt van die mark aan nie, maar dit help om die tydsberekening van die laagtepunt te bepaal.

Hierdie laagtepunt kan ’n mediumtermyn-laagtepunt wees, nie noodwendig ’n langtermyn-laagtepunt nie. In grafiek 3 sien ons ’n ekstreme omkering van die VIX-kromme tussen die voorste maand (naaste maand) en vier maande weg. In rooi is die tye wanneer hierdie verhouding onder nul val.

Hierdie tydperke was baie goed om die laagtepunte van die S&P 500 te bepaal, soos deur die laagtepunte in die blou kassies getoon word. Die tydsberekening is nie presies nie en sal ook nooit wees nie, maar dit verhoog die moontlikheid om ’n goeie intreepunt te vind ná ’n verkoop weens paniek.

Die strategie vir iemand wat in ’n paniektydperk in ’n mark wil koop, is dus om te wag totdat die termynstruktuur van die VIX-kromme ten volle omgekeer is en hul lang posisies tydens hierdie groot verkope te koop. 

Meer oor:  Finweek  |  Bankrotskap
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.