Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Vermy slegte gewoontes met beleggings só
21 Februarie 2019

Winston Churchill het dit dalk die beste gesê: “Moenie ’n goeie krisis verlore laat gaan nie”. Dalende markte toets ons, maar dit is ook ’n geleentheid vir ons om te leer. Ja, ’n stormende bulmark is gaaf. Baie gaaf. Jy word ryker en voel slim.

Die klem hier is op die bulmark wat jou slim laat voel. ’n Mark wat blom, leer beleggers niks nie. Omtrent enigiets wat jy koop styg, jou vaardighede ten spyt en dikwels is enigiets wat jy wel leer, bloot ’n slegte gewoonte.

Dis ’n slegte gewoonte om enige prys te betaal, waardasies ten spyt. Dan is daar die slegte gewoonte om swak gehalte te koop. Of die slegte gewoonte om jouself te veel bloot te stel aan individuele aandele of sektore. Alle lesse word skynbaar vergeet in ’n bulmark, waar alles styg.

Diegene wat by hulle beleggingsreëls hou, voel soms asof hulle agterbly omdat die swakgehalte-, oorprysde aandele aanhou om verregaande opbrengste te lewer, terwyl die sorgvuldig uitgesoekte aandele baie goed doen, maar nie só wonderlik nie. Maar die slegte gewoontes sal uiteindelik terugkom om by beleggers te spook wanneer die bulmark verdwyn en hulle hul in ’n dalende mark bevind. Plaaslik het 2019 met ’n groen Januarie afgeskop – nie baie groen nie, maar dit voel lekker.

So ’n bietjie meer as 50% van my portefeulje is in passiewe beursverhandelde fondse (ETF’s) sodat as my aandelekeuses geslag word, is minstens die helfte van my portefeulje nog in pas met die mark.

Dit volg op die afverkope van 2018 en amper vyf jaar van nul-opbrengste op die algemene indeks. Dit was regtig die clichématige skool van harde stampe gewees. As jy ’n aandeel van swak gehalte gekoop het, het die prys waarskynlik in duie gestort. As jy te duur vir ’n aandeel betaal het, het die prys waarskynlik ook in duie gestort, en sommige sektore is deur die verkopers afgemaai. En die woord hier is regtig afgemaai.

Dit is nie ’n mark waarin aandele 10% of selfs 25% se waarde verloor het nie. Gunstelingaandele het tot soveel as 50% van hul hoogtepunte af geval – in sommige gevalle self meer. Wat nou gedaan? Wel, een antwoord is dalk dat ’n suiwer passiewe portefeulje ’n beter opsie is.

Om aandele uit te soek, is nie net moeilik nie, dit kan mens ook emosioneel dreineer as jou poging beloon word met net nog ’n afverkope. So ’n bietjie meer as 50% van my portefeulje is in passiewe beursverhandelde fondse (ETF’s) sodat as my aandelekeuses geslag word, is minstens die helfte van my portefeulje nog in pas met die mark. En ek is besig om daardie 50% te verhoog om ’n teiken van 65% in die volgende drie tot vyf jaar te bereik.

Maar die ander antwoord is om vas te byt en die lesse te leer. Laat verlede jaar het ek in die uitgawe van 20 Desember (Tyd om bestekopname te doen) geskryf oor hoe om ’n jaarlikse hersiening van jou portefeulje te doen. Ek het gevra oor wat jy oor jou beleggings oor die jaar wat verby is, geleer het.

Het jy eenvoudig aandele gekoop sonder om deeglike huiswerk oor die maatskappy en sy sektor te doen? Het jy enige prys betaal sonder om ’n waardasie van die aandeel te bekyk? Ek het my jaarlikse hersiening gedoen en terwyl sommige van my posisies in die groep van 50%-verloorders is, is ek gemaklik met my proses. Dit was pynlik, maar dit is onwaarskynlik dat ’n belegger in individuele aandele sonder enige ernstige stampe ontsnap het.

Dit beteken nie jou proses is verkeerd nie, dit beteken net dat markte ons partykeer seermaak. My lys van kern- langtermynaandele is grootliks onveranderd oor die afgelope vyf jaar of meer en ek moet myself afvra of ek nuwe neigings en sektore miskyk. Ek het ADvTECH* in die afgelope paar jaar as ’n nuwe sektor in my portefeulje bygevoeg.

Maar ek is van plan om vanjaar meer tyd daaraan te bestee om meer sektore en aandele te hersien vir my langtermynportefeulje. Die goeie nuus is dat die nuwe bulmark uiteindelik aankom. In Die tussentyd, moet ons vasbyt, ons prosesse hersien en by hulle bly. Dan is die uitdaging natuurlik om nie die slegte gewoontes weer te laat insluip nie.

* Stuur 'n boodskap aan terugvoer@finweek.co.za

* Die skrywer besit aandele in ADvTECH.


Meer oor:  Finweek  |  Beleggings  |  Aandele
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.