Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Vind beleggingswenners ook só
7 Februarie 2019

Ek het onlangs ’n opmerking oor die tegniese ontleding van aandele op sosiale media gesien. Die persoon meen dat tegniese ontleding te veel aandag op sosiale media kry en reken ’n “aaklige” tegniese-ontledingstelsel sal, saam met ’n uitstekende risiko-en-portefeuljebestuurstelsel, maklik beter vaar as ’n uitstekende tegniese-ontledingstelsel wat met ’n swak risiko-en-portefeuljebestuurstelsel gekombineer word.

Ek beweer beslis nie dat ek ’n spekulatiewe aandeelverhandelaar is nie, en ook nie dat ek ’n kenner van tegniese ontleding is nie. Ek sê ook nié dat dié persoon se menings verkeerd is nie. Ek dink wel dis belangrik om die sielkunde te verstaan van die vraag hoekom tegniese ontleding só gewild is op verskeie mediaplatforms.

Ek dink nie tegniese ontleding is ’n óf-óf-situasie nie, maar eerder ’n én-situasie. Hoekom moet ’n gebalanseerde beleggingbestuurstelsel uit net een belegginginstrument bestaan?

Deur tegniese ontleding met fundamentele ontleding te kombineer, beteken nie dat jy geen slegte beleggings sal kry nie, maar dit kan jou kans vergroot om sukses te behaal. Baie mense kan daarop wys dat fundamentele ontleding ingewikkeld is en in die meeste gevalle die gebruik van sekere baie duur datastelsels vereis, en daarom beveel ek aan dat jy ’n kenner raadpleeg as jy onseker is.

Jy sal immers nie die beste rekenmeester in die land raadpleeg om ’n breinoperasie te doen nie. Dit maak nie die rekenmeester minder bevoeg nie; dit beteken net dat die persoon nie ’n kenner van breinsjirurgie is nie. Ek weet daar is baie lesers wat my passie vir aandele deel en ’n alternatiewe strategie sal wil voorstel vir dié wat tegniese ontleding verkies:

Identifiseer maatskappye met eienskappe van hoër gehalte

Ek begin altyd ’n ontleding deur maatskappye te identifiseer wat groei van hoër gehalte toon. Daar is verskeie verhoudings om te bekyk, maar volgens die meeste navorsingsverslae is die opbrengs op eienaarsbelang blykbaar die gewildste. Groeimaatskappye is gewoonlik maatskappye wat ook hoër opbrengs op eienaarsbelang het.

Die meeste aandelemakelaars se aanlyn stelsels bied filters waarmee jy maatskappye volgens verskeie verhoudings, waaronder die opbrengs op eienaarsbelang, kan rangskik. Ek het ’n aanlyn soektog gedoen en ’n hele paar filters gekry wat die opbrengs op eienaarsbelang van hoog tot laag kan rangskik. (Wees egter versigtig, want party se resultate het verskil, en daarom beveel ek aan dat jy altyd die resultate op verskeie dataverskaffers se stelsels toets.)

Ek verkies groter, meer gevestigde maatskappye, en daarom het ek die 80 grootste maatskappye op die JSE gekies en hulle volgens die opbrengs op eienaarsbelang van hoog tot laag gerangskik. Daarna het ek net die 40 hoogstes deur die volgende filter gestuur. Soek waarde Ek het die 40 aandele wat deurgedring het, van hoog tot laag volgens die prys-verdienste-verhouding (p/v) gerangskik.

Die rede is dat die p/v, ten opsigte van meetgehalte, baie soos die opbrengs op eienaarsbelang waarskynlik die gewildste waardasie-instrument is.

Nadat ek dié filter gebruik het, het ek die 20 finale aandele gekry wat op grond van bogenoemde kriteria tans blykbaar die beste waarde bied (bronne gebruik: Iress, PSG Wealth Old Oak, Thomson Reuters, Tradeview.com):

1. British American Tobacco plc

2. Assore

3. Kumba Iron Ore

4. Sappi

5. Standard Bank Group

6. BHP

7. RMB Holdings

8. Remgro

9. FirstRand

10. RMI Holdings

11. Mondi plc

12. Mondi Ltd

13. Vodacom Group

14. Sanlam

15. Bidvest Group

16. Mr Price Group

17. Shoprite Holdings

18. Bid Corporation

19. Capitec Bank Holdings*

20. Clicks Group

Soek tendense

Schalk Louw is ’n portefeuljebestuurder by PSG Wealth.

Deur op die laaste 20 aandele te konsentreer, beteken dit dat die maatskappye waarvoor jy tegniese ontleding doen, relatief gesproke waarskynlik gesonder firmas is. Mense sal verskil oor die aanwysers wat gebruik word.

Sommige beleggers volg belegging volgens sterk tendense en gee nie om as dit al hoe duurder word nie. Solank hulle goeie momentum het, sal daardie aandele gewild bly.

Assore se aandeel het byvoorbeeld die afgelope drie jaar baie stygings en dalings beleef. Tegnies is die langtermyn-tendens egter opwaarts, wat tendensvolgers geïnteresseerd hou.

Ander beleggers verkies om aandele te koop wanneer hulle tegnies oorverkoop lyk. Daar is verskeie instrumente of aanwysers wat jy kan gebruik om dit te bepaal, maar die gewildstes is blykbaar die indeks van relatiewe sterkte (IRS) en die stogastiese ossillator.

’n Goeie voorbeeld is ’n aandeel soos Standard Bank, wat in Oktober verlede jaar oorverkoop gelyk het, maar intussen versterk het en nog nie oorkoop lyk nie.

Daar is goeie redes hoekom aandeelpryse styg en daal, en ek wil beleggers waarsku om altyd hul huiswerk te doen voordat hulle ’n aandeel koop of verkoop. Uiteindelik is tegniese ontleding (nes fundamentele ontleding) op historiese data gegrond wat nie enige toekomstige prestasie waarborg nie.

’n Ekstra instrument of twee in jou beleggingstrategie sal jou beslis nie swakker maak nie.

* Stuur 'n boodskap aan terugvoer@finweek.co.za

* Schalk Louw is ’n portefeuljebestuurder by PSG Wealth.

* Capitec word deels besit deur PSG Group, wat ook ’n meerderheidsbelang het in PSG Konsult, waarvan PSG Wealth ’n afdeling is.

Meer oor:  Finweek  |  Beleggings  |  Schalk Louw  |  Aandele
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.