Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Finweek
Wanneer prysbepalingsmag afneem
7 Februarie 2019
Tesla Motors se monteeraanleg in Tilburg, Nederland.

Prysbepalingsmag – die mate waarin ’n maatskappy pryse kan verhoog sonder dat dit die vraag na sy produkte verlaag – is ’n enorme voordeel.

Die maatskappy se prysbepalingsmag kan met verloop van tyd egter verander. Ek het al voorheen hieroor geskryf en ’n klompie goeie voorbeelde van prysbepalingsmag (of die gebrek daaraan) het die afgelope weke uit Amerika gekom. Ek wil hulle en ook plaaslike voorbeelde van nader bekyk.

Tesla beplan om sowat 7% van sy personeel af te lê om sy elektriese motors goedkoper te probeer maak.

Kom ons begin by ’n maatskappy met geen werklike prysbepalingsmag nie: Tesla. Tesla beplan om sowat 7% van sy personeel af te lê om sy elektriese motors goedkoper te probeer maak. Tesla trek voordeel uit ’n staatsubsidie op elektriese motors, maar dit word vanjaar uitgefaseer. Dit gaan die reeds hoë pryse verder laat styg.

Die maatskappy kry ook toenemend mededinging van ander voertuigvervaardigers wat ook elektriese motors begin vervaardig. Hoewel dit vir marges en winste gaaf is om ’n duur produk te hê, beteken dit verbruikers kyk goed rond voor hulle koop.

Tesla het ’n bepaalde status wat hom aanvanklik prysbepalingsmag gegee het, maar namate hy met sy laer geprysde Model 3 na die massamark beweeg, het hy meer as net status nodig. Dit gaan vir die maatskappy ’n uitdaging wees om koste en dus sy verkoopprys te verlaag ten einde met ander elektriese motors mee te ding terwyl hy volgehoue winste probeer genereer.

Aan die ander kant van die vergelyking het ons Netflix. Netflix het die opperste prysbepalingsmag. Die maatskappy het ’n prysverhoging van $1 tot $2 vir sy 58 miljoen Amerikaanse intekenare aangekondig en tot dusver lyk dit of hy baie min kliënte as gevolg daarvan gaan verloor.

’n Beeldskerm van die Netflix-app.

Dié prysverhoging bring vir Netflix bykomende inkomste van ruweg $100 miljoen per maand in (meer as $1 miljard per jaar) en sy kostegrondslag neem nie regstreeks toe nie, dus sal hy dit als beskikbaar hê om aan nuwe programme te bestee (sy eintlike onkoste).

Mettertyd sal hy ook ’n prysplafon bereik, maar voorlopig het hy prysbepalingsmag en gebruik hy dit om sy inkomste te verhoog. Midde van die prysbepalingsmagstryd staan Apple. Hy het sy vlagskip iPhones se topklasprys tot tussen $1 099 en $1 449 verhoog, met die toetreevlak XR op $750. Dit maak hom duur.

Soos ek in die vorige uitgawe van finweek geskryf het, ("Verstaan Apple se lewensiklus"), neem sy verkoopsgroei af. Hy het sy prysbepalingsmag gebruik om pryse tot so hoog hy kon op te stoot en my gevoel is dat hy die prysplafon getref het. Maar wat ’n plafon! Apple is vir die oorgrote meerderheid van die winste in die selfoonmark verantwoordelik, al verkoop hy minder selfone as sy mededingers – wat almal veel kleiner winsmarges het.

MultiChoice verskaf inhoud aan verbruikers in 49 Afrika-lande.

Die prysbepalingsmag by Apple het getaan, maar nie voordat hy dit tot die maksimum benut het nie. Kom ons bekyk ons plaaslike mark. MultiChoice, wat aan Naspers* behoort en laat in Februarie vanjaar noteer, is ’n voorbeeld van prysbepalingsmag wat weggekalwe word.

Sy toppakket, teen byna R1 000 per maand, is duur. En nadat hy jare lank nie werklik mededinging gehad het nie (behalwe van sy eie laer geprysde pakkette), het ons nou aanlynstroming as mededinging. Ná dekades van absolute prysbepalingsmag, is al wat MutiChoice eintlik oor het sy sportprogramme, wat maak dat ’n groot getal gebruikers steeds die hoë pryse betaal. Die risiko hier is dat hy sy sportaanbod kan verloor.

Ons begin dit in Amerika sien, met ESPN wat ’n toepassing het en ander Amerikaanse sportverenigings wat oplossings regstreeks aan verbruikers bied. Voorlopig het hy dus redelike goeie prysbepalingsmag, maar sport is die achilleshiel. So, nie alleen is die vlak van prysbepalingsmag belangrik nie, die vraag is ook waar daardie mag lê en wanneer dit sal begin taan.

My gedagte is dat prysbepalingsmag altyd mettertyd afneem. Die vraag wat ’n belegger moet vra, is in watter fase van prysbepalingsmag ’n maatskappy is en dan die trajek daarvan bepaal.

* Stuur 'n boodskap aan terugvoer@finweek.co.za

* finweek is ’n publikasie van Media24, ’n filiaal van Naspers.

* Foto: Gallo/Getty Images

Meer oor:  Finweek  |  Prysbepalingsmag  |  Simon Brown
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.