Twee mans wat verbind word met die aanval op die Thula-Thula-toevlugsoord vir weesrenosters in die noorde van KwaZulu-Natal sal Vrydag in die hof in Ermelo verskyn op aanklag van die besit van ’n ongelisensieerde vuurwapen en ammunisie.
Kapt. Carla Prinsloo, polisiewoordvoerder, sê die twee mans van onderskeidelik 36 en 33 jaar oud is Dinsdag laatmiddag op die pad tussen Piet Retief en Ermelo in hegtenis geneem.
’n .458-jaggeweer is onder die enjinkap van die Toyota-dubbelkajuitbakkie gekry. Hulle was vermoedelik op pad na Gauteng.
