Die familie en vriende van die vermoorde Hannah Cornelius sal vandeesweek uitsluitsel kry oor of die mans wat van haar moord aangekla is, skuldig bevind word.
Regter Rosheni Allie sal Woensdag haar uitspraak lewer in die saak teen Vernon Witbooi, Geraldo Parsons en Eben van Niekerk. Hulle staan tereg op aanklag van die moord en verkragting op Cornelius. Hulle staan ook tereg op vier aanklagte van roof met verswarende omstandighede, drie aanklagte van menseroof en een aanklag van poging tot moord. Hulle ontken skuld op al die aanklagte.
Die vierde beskuldigde, Nashville Julius, staan net tereg op twee aanklagte van menseroof en twee aanklagte van roof met verswarende omstandighede. Hy ontken skuld op al die aanklagte teen hom.
