Annelie Wessels (23) het in trane vertel van haar ma se beserings nadat vier mans haar ouers, Tool en Liezel Wessels (albei 55), vroeg Maandagaand op hul plaas naby Bonnievale aangeval en haar pa vermoor het.
“Ek wil nie die besonderhede weet nie. Ek het vir almal gevra om nie vir my te sê nie,” het Annelie Dinsdag gesê.
Sy en haar suster, Jana (20), wat albei aan die Universiteit Stellenbosch onderskeidelik aan ’n M-graad in BCom werk en BRek studeer, het later die aand van Stellenbosch na Worcester gery nadat hul ma van ’n hospitaal in Robertson na Worcester oorgeplaas is.
