Aarde-uur, of dan Earth Hour, die jaarlikse projek van die Wêreldnatuurfonds (WWF) waar almal aangemoedig word om hul ligte vir ’n uur af te skakel, word vanjaar op sy kop gekeer met die versoek dat ondersteuners die die fokus plaas op die kwessie van die dag - hoe om die ligte aan te hou op 'n wyse wat goed is vir die mensdom sowel as die planeet.
Dr. Morné du Plessis, uitvoerende hoof van die WWF in Suid-Afrika, sê mense word wêreldwyd gevra om op ’n bepaalde dag (vanjaar op Saterdag 28 Maart tussen 20:30 en 21:30) hul ligte vir ’n uur af te skakel, maar in in Suid-Afrika, "waar Eskom die ligte namens ons afskakel, sal dit meer gepas wees om hierdie simboliese oomblik te gebruik om as't ware 'n lig te laat skyn op die kragkrisis in die land en klem te plaas op die verband tussen die wêreldwye klimaatskrisis en ons verslawing aan steenkool".
Du Plessis sê volgens klimatoloë kan Suidelike-Afrika teen twee keer die pas warmer temperature begin beleef as die res van die wêreld.
