Vanuit Saoedi-Arabië probeer De Wet Hugo kinders aan die sidder en lees kry met sy nuwe reeks ‘Grilgrypers’-boeke, het hy in Kaapstad aan Johan van Zyl gesê.
Vir ’n kêrel wat nege- tot 12-jarige kinders én hul verbeelding skrik op die lyf ja met woorde, is De Wet Hugo ongehoord goedig – die ene gulhartige teddiebeer.
Sondae tot Donderdae, die amptelike skoolweek in Saoedi-Arabië, werk hy van 07:30 tot 14:30 as laerskoolonderwyser en graadhoof vir jaar vyf (gr. 4 in Suid-Afrika) by die Jeddah Prep and Grammar School, ’n Britse internasionale skool waar die leerlinge meestal uit baie gegoede Pakistanse of Indiese huise kom.
