Terwyl DA-LP’s in 2018 vir Markus Jooste in die parlement oor die kole gehaal het oor die honderde miljarde rande wat uitgewis is weens bedrog by Steinhoff, het Mmusi Maimane, die partyleier, in ’n motor rondgery wat ’n geskenk van Jooste was. Hy het boonop maande lank geweier om dit terug te gee, selfs nadat kollegas hom oor die moontlike skade aan sy en die party se reputasie gewaarsku het.
Jooste, wat tussen 2000 en Desember 2017 uitvoerende hoof van die Stellenbosch-gesetelde Steinhoff-konglomeraat was, het die wit Toyota Fortuner in 2016 beskikbaar gestel vir Maimane se gebruik in die aanloop tot die munisipale verkiesing op 3 Augustus daardie jaar.
Die DA het gister by monde van James Selfe, voorsitter van die party se federale raad, bevestig die Fortuner (registrasienommer CA 405-881) het die eiendom van ’n motorhuurmaatskappy gebly, maar Steinhoff het vir die huur betaal.
