’n Eis van die spelersorganisasie MyPlayers dat spelers en afrigters ná die aanvaarding van ’n salarisvermindering die opsie gegun moet word om hul kontrakte te kan kanselleer, kan SA Rugby se geld-onderhandelinge oor die Covid-19-krisis in chaos dompel.
Die konsep-klousule sal spelers en afrigters 60 dae gee om uit hul kontrakte te kom as hulle ’n aanbod van ’n ander span kry. Drie hooggeplaastes in rugbykringe het aan Rapport gesê dit kan die prosesse laat ontspoor waarmee SA Rugby besig is om ’n geskikte middeweg vir die betrokke partye te vind.
Dit blyk ook dat daar weerstand van die spelers se kant is om ’n salarisvermindering te aanvaar en dat daar selfs sprake van ’n rebellie onder ’n groep spelers was. Dit is in kontras met sommige ander sektore van die sportwêreld wat sonder slag of stoot ingestem het om salarisse te sny.
