Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Algemeen
‘Boet’ tot in die 3de, 4de geslag... sommige meen dis te erg

Die tweede van die tien gebooie in die Bybel waarin kinders die sondes van hul vaders tot in die derde en vierde geslag toegereken word, kan in die nuwe Nederlandse vertaling van die Bybel gewysig word.

Die tweede gebod verbied die aanbidding van afgodsbeelde. Dan volg Eksodus 20:5: “Ek reken kinders die sondes van hulle vaders toe, selfs tot in die derde en vierde verslag van dié wat My haat . . .”

Dis dié woorde waaroor die vertalers van die Nederlandse Bybelgenootskap nou herbesin.

Dr. Matthijs de Jong, hoof van die afdeling vir vertaalwerk by die Nederlandse Bybelgenootskap (NBG), sê talle teoloë in Nederland het gevra dat hulle weer na die vertaling kyk, spesifiek die woorde “laten boeten” – weens die onverbiddelikheid daarvan.

Vertalers neem Bybelse gebod onder oë.

’n Moontlike alternatief vir die frase sou kon wees “ter verantwoording roep”, meen die vertalers.

Volgens De Jong gaan dit nie daaroor om die Bybel se bewoording te versag of om die Bybel te moderniseer nie, maar eerder om dit in ooreenstemming te bring met ander tekste wat iets heeltemal anders beskryf.

Opregte twyfel bestaan oor of die betekenis van Eksodus 20:5 reg verstaan is in die nuwe Bybelvertaling, sê hy.

De Jong sê hulle wil nie die teks verander omdat mense daarvoor vra nie, want dit is nie hoe die Bybelvereniging werk nie. “Waarmee ons te doen het, is ’n belangrike, tog moeilike vertalingsvraag, nie ’n wens om die Bybel te verander nie.”

Prof. Sias Meyer, senior lektor in die departement van Ou-Testamentiese studies aan die Universiteit van Pretoria, sê hy hou ook baie meer van die frase “ter verantwoording roep”, maar hy weet nie of dit God minder onverbiddelik laat klink nie. “Dit bly nog steeds onregverdig dat kinders tot verantwoording geroep word vir hul ouers se sonde en die skrywer van Esegiël 18 sou heelhartig saamstem.”

Meyer sê die teks gaan oor skuld tussen generasies. Vir ons is die hele idee meestal totaal onregverdig. “Hoewel die Tien Gebooie (Eks. 20, 34 en Deut 5) die idee ondersteun, is daar ook ’n ander stem in die Ou Testament wat met ons sou saamstem.”

Hy sê hoewel onregverdig is dit die realiteit dat kinders betaal vir hul ouers se foute.

Dr. Chris Jones, verbonde aan die Eenheid vir Morele Leierskap by die fakulteit teologie by die Universiteit Stellenbosch, sê hy sal ook hou “van ’n verandering in bewoording wat die gebod betref. Ek verkies om genade en liefde te omarm bó oordeel en straf. God se genade bly groter as sy oordeel. Jesus het dit kom bevestig.”

Jones sê met die alternatiewe voorgestelde vertaling van hierdie teksvers word die “God van wraak” nie uit die Bybel geskryf nie, maar die teks word bloot versag, wat meer in ooreenstemming is met die lewe en boodskap van Jesus. Hy sê die bewoording van Bybeltekste kan aangepas word waar nodig. Gregorius die Grote het eenmaal gesê: Die Skrif ontwikkel saam met hulle wat dit lees.”

Die afgelope week het pous Franciscus ’n verandering in die Onse Vader-gebed goedgekeur.

Die sin “en lei ons nie in versoeking nie” gaan verander word na “en laat ons nie in versoeking verval nie”.

Jones sê die pous en baie ander mense glo nie dat God nie die mens in versoeking lei nie, maar eerder help om dit te weerstaan, vandaar die verandering. Hy sê die betekenis van gedeeltes in die Bybel kan nie verander word omdat mense beswaar maak nie, en vertaling moet te alle tye getrou wees aan die bronteks.

De Jong sê as mens na verskillende vertalings van die Bybel, Hebreeuse woordeboeke en die gespesialiseerde Bybelkommentare wêreldwyd kyk, is dit duidelik dat die frase op verskillende maniere verskillend vertaal kan word. “Sommige vertalings kies “straf”, ander “besoek” en die Afrikaanse vertaling “toegereken”.

Meer oor:  Bybel  |  Straf
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.