Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Algemeen
Daar’s hoop – gebreekte kabels binnekort herstel

Die Franse skip wat gebruik gaan word om twee ondersese kabels te herstel wat Suid-Afrika aan die internet verbind, sal Dinsdag in die Angolese hoofstad Luanda aankom en herstelwerk sal kan begin.

Die spoed waarteen internetgebruikers sedert 16 Januarie data kan aflaai van die internet – flieks, groot dokumente, e-pos – was by tye erg traag nadat nie een nie, maar twee uiters belangrike kabels gebreek het.

Een van hulle, die South Atlantic 3/West Africa Submarine Cable (SAT-3/WASC), het sy oorsprong in Portugal en Spanje en loop vir ’n verstommende 14 350 km op die seebodem tot in Melkbosstrand, met konneksies onderweg na onder meer Dakar in Senegal, Abidjan in die Ivoorkus, Lagos in Nigerië en Libreville in Gaboen.

Die ander kabel wat gebreek het, is die West Africa Cable System (Wacs), wat van Londen in Brittanje ondergronds loop tot aan die Engelse kus, en vandaar onder meer na Portugal, die Kanariese Eilande, Ghana, die Kongo, Angola, Swakopmund en uiteindelik Yzerfontein ’n uur noord van Kaapstad.

Kenners beskou dit as ’n frats dat twee van die vyf kabels wat al Suid-Afrika se internetverkeer gelei, gelyktydig gebreek het. Benewens die Wacs- en SAT-3/WASC-kabels verbind die EASSy- en Seacom-kabels die ooskus van Afrika met Europa. Die vyfde – Ace – strek van Frank­ryk tot in Yzerfontein.

Internetdiensverskaffers moes inderhaas ander planne maak deur bykomende dravermoë op ander kabels te bekom, of internetverkeer deur Johannesburg te herlei. Afrihost, Webafrica en Telkom se infrastruktuur-filiaal Openserve is almal benadeel, maar het intussen daarin geslaag om internetspoed te normaliseer.

Ondersese kabels word deur ’n konsortium van onder meer telekommunikasiemaatskappye besit. In Suid-Afrika se geval sluit dit Telkom, MTN en Vodacom in.

Lynette Wood, bestuurder by Tenet, ’n navorsingsnetwerk van tersiêre instellings, het aan Rapport gesê die Franse skip die Léon Thévenin sal gebruik word om die twee gebreekte verbindings te herstel. Die oorsaak van die skade aan die kabels is onbekend, maar ’n skip se anker kon aan een of albei die kabels gehaak het.

Business Insider South Africa berig dat dit ongeveer 48 uur sal neem om die kabels te herstel.

* Bykomende bronne: My Broadband, Netwerk24, submarinecablemap.com en teleography.com.

Meer oor:  Internet  |  Kabels
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.