Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Algemeen
Discovery wil mors van geld nou vasvat

Die Discovery Health Mediese Fonds (DHMS) gaan binnekort verpleegkundiges by 52 groot hospitale aanstel om wag te hou oor onnodige hospitaalopnames en vermorste koste.

Dr. Nozipho Sangweni, hoofbeampte van die land se grootste mediese fonds, het die afgelope week ná die bekendstelling van hul 2018-resultate aan Rapport gesê hulle het die afgelope drie jaar reeds R350 miljoen bespaar deur soortgelyke ingrypings, al het hulle nie oë en ore op die grond gehad nie. Die fisieke teenwoordigheid van Discovery-werknemers is die volgende stap.

Fonds het in 3 jaar R350 m. bespaar deur soortgelyke ingrypings.

Sangweni sê DHMS is deeglik bewus dat hul nuwe inisiatief ontwrigtend vir sommige dokters en hospitale kan wees. Dokters beskuldig siekefondse dikwels daarvan dat hulle in werklikheid behandeling vir pasiënte voorskryf en die dokter beperk.

Maar Sangweni sê hulle sal fokus op “ ’n klein groepie dokters wat aanhoudend en herhaaldelik ’n patroon wys van onnodige opnames” en nie onnodig inmeng in die behandeling van hul lede nie.

Sy sê die Discovery-verteenwoordigers wat ’n wakende oog gaan hou, is hoogs gekwalifiseerde, senior, professionele ver­pleërs met jare verpleegondervinding. Hulle word bygestaan deur Discovery Health se mediese adviesspan.

DHMS skryf hul goeie finansiële prestasie van die laaste twee jaar gedeeltelik toe aan gesondheidsbestuursdienste. In die praktyk behels dit hoofsaaklik stelsels en protokolle wat bepaal watter medisyne ten volle gedek moet word vir chroniese toestande en watter nie, wanneer ’n prosedure goedgekeur sal word of nie en hoe om seker te maak hul lede is vir so kort as moontlik in ’n hospitaal.

DHMS het in 2018 weer ’n surplus van R816 miljoen getoon – weliswaar aansienlik minder as die R2,45 miljard surplus van 2017.

Discovery-lede se premies was nie in 2018 genoeg om al hul uitgawes te dek nie, maar ’n groter beleggingsinkomste van R1,47 miljard het die fonds weer ver in die groen laat eindig.

DHMS se solvensievlak is nou 27,3% (2017: 27,44%). Dit beteken die fonds het R17,6 miljard in reserwes vir hul lede se eise.

Dr. Jonathan Broomberg, uitvoerende hoof van die siekefondsadministrateur Discovery Health, sê 87,9% van DHMS-bydraes is in die boekjaar gebruik om voordele uit te betaal, 10,1% aan sy maatskappy vir administrasie en gesondheidsbestuursdienste, en sowat 2% vir makelaars en fonds-uitgawes.

Die vorige jaar het kenners Discovery gekritiseer vir sy massiewe surplus en hoë solvensievlak terwyl lede sukkel om die premies te bekostig, maar Broomberg sê dit is uiters moeilik om die nodige siekefondspremies akkuraat te voorspel. Hy sê vanweë die hoë solvensievlak kon die fonds verlede jaar die uitwerking van die BTW-verhoging (sedert 1 April 2018) absorbeer sonder om ’n tussentydse premieverhoging aan lede deur te gee.

“Dit is verkeerd om te sê DHMS moes meer of hoër voordele uitbetaal het bloot omdat die solvensievlak bo die vereiste minimum vlak is.

As ’n siekefonds verwagte voordele uit oortollige reserwes betaal, wys dit lede se bydraes is nie genoeg om verwagte eise te dek nie. Bydraes moet dan aangepas word deur groter stygings en stel lede bloot wat betref bekostigbaarheid en sekuriteit (’n laer solvensievlak).”

Luidens die 2018-verslag het DHMS R58,4 miljard in eise uitbetaal vir sy meer as 2,8 miljoen lede en hul afhanklikes.

Begunstigdes het gemiddeld R1 532 per maand vir die risikopoel ontvang. Dis bydraes tot mediese spaarrekeninge uitgesluit.

16,3% van begunstigdes het meer as hul by­draes geëis. Van die totale eise uitbetaal, was:

* R28,9 miljard (49%) vir hospitaalopnames;

* R21,4 miljard vir dag-tot-dagvoordele wat 24,8 miljoen voorskrifte en 6,8 miljoen doktersbesoeke insluit;

* R3,4 miljard vir onkologie;

* R3,2 miljard vir chronies; en

* R1,5 miljard in kraamvoordele. Volgens Broomberg was die grootste enkele eis verlede jaar R5,6 miljoen. Dit was vir ’n 68-jarige lid op die Essential Saver-plan wat op lang termyn aan ’n ventilator gekoppel was weens infeksie.

Hoewel vyf van DHMS se voordeelplanne nie selfonderhoudend is wat ledetal en finansies betref nie en meer uitbetaal as wat in bydraes ontvang word, hoef die lede nie bekommerd te wees nie omdat DHMS se algehele finansies baie goed lyk, sê Broomberg. Dié planne is Executive, Classic Comprehensive, Coastal Saver, Coastal Core en KeyCare Plus. Die gewildste voordeelplan van DHMS teen Desember 2018 was Classic Saver (663 032 begunstigdes), Coastal Saver (417 639) en Key-Care Plus (406 661).

Die kleinste planne is Classic Comprehensive sonder ’n spaarrekening (1 990), KeyCare Access (6 573) en Essen­tial Priority (13 017).

DHMS se lede is nie geneig om planne te verwissel nie. Luidens die jaarverslag het 94,2% hul keuse onveranderd gelaat. Sowat 2,5% het goedkoper planne gekies en sowat 3,2% het na duurder en meer omvattende planne beweeg.

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.