Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Algemeen
Eugene de Kock uit tehuis ná werkers se beswaar
’n Onlangse foto van ’n siek Eugene de Kock. Foto: Anemari Jansen

Eugene de Kock (68), voormalige Vlakplaas-bevelvoerder, is “veilig” en “rustig” nadat hy vroeër die week uit ’n ouetehuis in Pretoria verwyder is.

De Kock was vir sowat twee weke ’n inwoner van die Ons Tuis-tehuis in Riviera, Pretoria, voordat versorgers en hulpverpleërs teen sy intrek kapsie gemaak het.

“Dis eintlik jammer, want dit sou vir sy menswees goed gewees het,” sê ds. Dries Beukes, waarnemende bestuurder van die Ons Tuis- en Monument-tehuis.

Anemari Jansen, vertroueling en skrywer van die boek oor De Kock, Assassin for the State, het Vrydagmiddag by navraag slegs gesê De Kock is op ’n veilige plek.

“Ek kan nie regtig nou kommentaar lewer nie, maar hopelik sal die storie ’n beter einde hê.”

Beukes sê hy het eers ’n week nadat De Kock in Ons Tuis ingeneem is, daarvan gehoor.

“Ons is ’n diensorganisasie. Ons evalueer ’n persoon of hy geskik is vir ’n tehuis al dan nie.”

Eugene de KockFoto: Verskaf

Beukes sê die evalueringsproses is vertroulik waar maatskaplike werkers hul eie oordeel gebruik.

“Hy is siek. Iewers moes hulle ’n heenkome vir hom soek.”

Rapport het einde Junie berig dat ’n uitgeteerde De Kock in ’n bedenklike toestand in ’n senuweekliniek in Pretoria behandel word.

Jansen het destyds gesê hy het in Desember ’n algehele fisieke en geestelike ineenstorting gehad.

Volgens haar het hy aanvanklik weens ’n longembolisme by die dood omgedraai.

“Dit was sy liggaam se reaksie nadat hy reeds erg depressief was.”

Jansen het toe ook gesê dat De Kock geen vaste heenkome het nie.

“Hy word van een veilige huis na die volgende geskuif. Hy het nêrens wat hy sy eie kan noem om sy voete in die samelewing te vind nie.

“Hy is in sy kop nog nooit werklik uit die tronk vrygelaat nie, want hy is steeds ’n gevangene van sy omstandighede,” het sy aan Rapport gesê.

Volgens Beukes het ’n “jong maatskaplike werker” De Kock laat opneem sonder dat sy eens besef het wie hy is.

“Dis ’n mens. Ons tref nie onderskeid tussen mense nie. Ons het vir niemand nog ’n misdaadnavraag gedoen nie. Hierdie persoon het ’n wettige parool.”

Hy sê De Kock het skade aan niks en niemand berokken nie.

Volgens Beukes was sowat 30 versorgers en hulpverpleërs teen De Kock se intrek gekant.

Hy sê hulle was bang en het vir hul lewe gevrees.

“Ek het hulle gevra waarvoor. Hy het nie ’n wapen nie. Toe het hulle ook gesê dat hulle nooit ingelig is dat hy ’n inwoner daar sou wees nie, maar ons lig hulle eintlik nooit oor enigiemand in nie.”

Die Sowetan het berig ’n vrouewerker het gesê: “Hy het baie mense doodgemaak. As daar ander mense is wat hom wil dood hê, is ons in gevaar.”

Hulle dink ons ken nie ons geskiedenis nie. Hulle dink ons is dom.
Tehuiswerker

Nog ’n werker het aan die koerant gesê: “Hulle dink ons ken nie ons geskiedenis nie. Hulle dink ons is dom.”

Beukes het benadruk dat De Kock nie ’n kluisenaar in die tehuis was nie en nie net in sy kamer gebly het soos van die werkers beweer het nie.

“Daar was instruksies op sy kamerdeur, maar hy het in die eetsaal geëet.”

De Kock is in 2015 met streng paroolvoorwaardes vrygelaat nadat hy 20 jaar in C-Max, die maksimumsekerheidsafdeling van die Kgosi Mampuru-tronk in Pretoria, opgesluit was.

Hy is daarna steeds deur beamptes van vermoedelik staatsveiligheid bewaak en waar hy gebly het, was ’n geheim.

De Kock het Ons Tuis Woensdag omstreeks 14:00 glo vergesel deur ses mans in drie voertuie verlaat.

Oudgenl. Johan van der Merwe, voorsitter van die polisie se liefdadigheidstrust, het in Junie aan Rapport gesê ’n aftreeoord met versorging is een van die moontlikhede om De Kock te vestig nadat sy siekefondsvoordele vir behandeling by die senukliniek uitgeput is.

Dié trust werk saam met Jansen om geld in te samel om De Kock te help met sy uitgawes en ’n plek te kry waar hy permanent kan intrek.

De Kock, wat die polisie destyds met ’n skeidingspakket verlaat het, kry geen pensioen nie.

Meer oor:  Eugene De Kock  |  Verwyder
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.