Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Algemeen
Pleks van dief vang polisievrou toe baba

’n Polisievrou wat eintlik skelms moet vang, moes al haar ander vaardighede inspan om dié keer eerder ’n baba te vang.

Sers. Debbie Alard van die polisiekantoor in Melkbosstrand het vinnig gedink toe Emily Lucas (29) omstreeks 23:00 na die polisiekantoor gebring is omdat die ambulansdiens nie bereik kon word nie.

Emily Lucas en haar pasgebore baba.Foto: Debbie Alard

Alard het besef die baba gaan enige oomblik kom en sê sy het Christa Kleynhans, ’n voedvrou van Melkbosstrand Community Medics, gebel om te help.

“Ons het die vrou, wat reeds in kraam was, na die traumakamer gebring omdat ek kon sien die baba is baie naby,” sê Alard.

Alard moes die ma en baba dophou en uiteindelik die naelstring knip.

“Dit was die grootste ding vir my! Terwyl Christa besig was met die ma, het ek seker gemaak die baba is warm.”

Die meisietjie, Lucas se derde kind, is om 23:20 gebore.

“Die ma en haar baba is albei piekfyn. Die kleinding het gedrink en dit is ’n goeie teken. Sy is perdfris en gesond.”

“In al die jare dat ek in die polisiediens is, was dit die beste ervaring. Daar is niks so mooi soos ’n baba se geboorte nie,” sê sy.

Sy sê hulle was paniekbevange en baie verlig toe die kleinding uiteindelik gebore is.

Sers. Debbie Alard en die baba wat sy in die lewe help bring het.Foto: Debbie Alard

Die ambulans het toe uiteindelik om 03:00 opgedaag en die ma en baba is na die Westfleur-hospitaal in Atlantis gebring. Albei is nog in die hospitaal.

Alard het die gemeenskap bedank vir klere en komberse wat aan die polisiekantoor geskenk word.

“Dit help baie in sulke noodgevalle. Die baba was die hele tyd snoesig en warm.”

Meer oor:  Melkbosstrand  |  Polisie  |  Baba
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.