Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Algemeen
VS-boer versprei strokiesboek-Bybel in tronke, skole

’n Vrystaatse boer wil ’n miljoen boeke in Indië laat druk om evangelie uit te dra en lees in tronke en skole in Suid-Afrika te bevorder.

En dit is maar net die begin.

Ook die Matla Secondary School in Krugersdorp het met groot blydskap die boeke ontvang.

Dries Delport, ’n boer van die Boshoff-distrik, en tallle vrywilligers het ’n paar weke gelede meer as 5 000 Bybels in strokiesprent-formaat by tronke en skole in die Vrystaat begin uitdeel nadat hy dié boeke spotgoedkoop by Cum-boeke teëgekom het.

Hy sê hulle verbaas oor hoe goed dit ontvang is, veral in tronke.

“Baie van die gevangenes kan nie lees nie en dié boeke wakker ’n hongerte by hulle aan vir die Woord en lees in die algemeen.”

Delport het The Ultimate Comic Book Action Bible vir die eerste keer in 2012 in Malawi gesien en besluit om dit daar by die tronke uit te deel, veral toe dit van R60 afgemerk is tot R20.

Hy kon sy oë nie glo toe hy die vertaalde weergawes, in Sotho en Tswana, in Cum-boeke teëkom teen R5 stuk nie.

Hy en Daleen, sy vrou, het almal opgeraap, insluitende die 5 000 wat nog in die kettinggroep se pakhuis was.

Hulle het dit eers by Boshoff se informele nedersettings uitgedeel en was stomgeslaan oor hoe goed dit ontvang is.

Daarna het hulle die boeke by verskeie skole in Boshoff, Hoopstad, Bloemhof en Bloemfontein aan die gr. 6-leerlinge uitgedeel.

Skoolkinders vind dikwels die Bybel intimiderend, sê hy. Dié boek maak dit toegankliker.

Die Bybel in strokiesprent-formaat word tans in tronke en skole in die Vrystaat uitgedeel nadat ’n plaaslike boer dit by Cum-boeke opgekoop het.
Cum-boeke het die Engelse strokiesprentboek in Afrikaans, Sotho en Tswana vertaal.
Die strokiesprentboek is oorspronklik in Amerika geskryf en vervaardig. ’n Boer van die Vrystaat wil dit nou in grootmaat laat druk sodat groot dele van Afrika toegang daartoe kan hê.

Sy visie is nou om ’n miljoen hiervan te laat druk – in Indië, waar dit die goedkoopste sal wees – R15 per eksemplaar, aflewering ingesluit.

Cum Boeke sal wel van die boeke vertaal. Dit is reeds in Afrikaans beskikbaar en hy beplan om dit by skole in Kimberley en die Wes-Kaap uit te deel. 

“Maar ons het gevind die groot vraag is na Engelse boeke.”

Hul langtermyndroom is om 55 miljoen boeke in Engels te laat druk en dit “op in Afrika” – na lande soos Malawi, Zambië en Uganda – te versprei.

Cassie Maree (60), ’n boer van Boshoff wat een keer gehelp het om die boeke uit te deel, sê “nie eens die honde in die nedersettings” het vir hulle geblaf nie.

“Daar was nul teenkanting. Die kinders smag daarna.”

Hy sê dit is hartseer om net die boeke vir die een graad in ’n skool te kan gee, want al die kinders wil een hê.

Meer oor:  Vrystaat  |  Bybel
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.