Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Gesondheid
Danie Gerber: Só gaan dit met oud-Bokke wat saam op reünie was

Al die ander oud-Bokke wat verlede week saam met Danie Gerber op die 1981-reünie was, is nog gesond en pas hulself mooi by hul huise op.

Dit is volgens Henning van Aswegen, die oud-loskopstut en organiseerder van die 1981-reünie-gholftoernooi, wat op 20 en 21 Maart in Jan Kempdorp, Noord-Kaap, plaasgevind het.

“Danie het my in die week gebel en gesê dat hy siek voel.

“Nadat ons uitgevind het hy het positief getoets vir die virus het ons almal wat by die reünie was op ons WhatsApp-groep laat weet.”

Volgens Van Aswegen is almal in die groep nog perdfris en gesond.

Danie Gerber verlede Saterdag by die 1981-reünie in Jan Kempdorp. Foto: Charné Kemp

Die groep het by die Border-hotel, waarvan Van Aswegen mede-eienaar is, in Jan Kempdorp tuisgegaan.

Dit is dieselfde hotel waar die egpaar Henk en Berna Kruger op 14 Maart ’n troue bygewoon het.

Berna het aan Netwerk24 bevestig dat sy en haar man ’n troue daar bygewoon het.

Die egpaar het voor die troue op 10 en 11 Maart ontbytsessies wat by die Divine Restoration Ministries-sentrum in Bloemfontein aangebied is, bygewoon. Vyf buitelandse sprekers het ook dié sessies bygewoon.

Nadat pres. Cyril Ramaphosa die ramptoestand afgekondig het en gevra het dat alle buitelanders wat onlangs die land binnegekom het moes aanmeld vir toetse, het dié buitelanders positief vir die virus getoets.

Die kerk het al die gaste wat die ontbytsessies bygewoon het gekontak en hulle gevra om hulself te laat toets.

Berna Kruger het haarself op 20 Maart laat toets en het haar uitslae op 22 Maart ontvang. Sy was positief. Haar man, Henk, het later die week sy uitslae ontvang en was ook positief.

Bennie Liebenberg, mede-eienaar van die hotel, het bevestig dat geen ander inwoners tydens die reünie in die hotel gebly het nie.

Die oud-Bokke saam met die organiseerders en almal wat verlede Saterdag aan die Legends-gholftoernooi in Jan-Kempdorp deelgeneem het. Foto: Charné Kemp

Liebenberg sê hulle het die hotel Dinsdag gesluit en alle werknemers huis toe gestuur.

“Ons is daagliks in kontak met die werkers en hulle is almal nog gesond en by hul huise.”

Van Aswegen is onseker oor waar Danie met die virus besmet kon word.

“Dit kon enige plek gewees het, want Danie word nogal gereeld na praatjies en geleenthede genooi.

“Hy het self gesê hy was op ses vlugte voordat hy by die reünie aangekom het.”

Die reünie slaan twee vlieë met een klap.

“Dit is eintlik ’n geldinsameling vir die gholfklub, maar dien dan ook as ’n geleentheid vir ons om as vriende weer ’n bietjie by mekaar uit te kom.

“Ons klok daagliks by mekaar in op die groepie om seker te maak dat almal nog gesond is,” sê Van Aswegen.

“Dit is ’n ernstige ding dié.

“Alle Suid-Afrikaners moet hul deel doen om van hier af veilig en gesond te bly.”

Meer oor:  Danie Gerber  |  Covid-19  |  Coronavirus  |  Koronavirus
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.