Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Gesondheid
‘Deernistoegang’ tot ivermektien teen Covid-19 kom in SA

Die regering se reguleringsowerheid vir gesondheidsprodukte (Sahpra) gaan eersdaags begin met ’n program wat “beheerde en gekontroleerde deernistoegang” tot ivermektien vir die behandeling teen Covid-19 moontlik maak.

Dr. Boitumelo (Tumi) Semete-Makokotlela, Sahpra-hoof, het Woensdag volgehou dat reguleerders wêreldwyd saamstem dat daar onvoldoende inligting bestaan vir ’n medisynereguleerder om ’n “ingeligte besluit” oor ivermektien vir die behandeling van Covid-19 te neem.

“Dit (die nuwe ontwikkelinge) beteken dus nie Sahpra se posisie oor ivermektien verander nie, maar as ’n reguleerder verstaan ons die konteks waarin ons is met beperkte moontlikhede (vir behandeling). En dit is op hiérdie gronde dat ons die besluit geneem het. Dit sal ons in staat stel om die proses fyn dop te hou. Dit sal in samewerking met gesondheidswerkers gedoen word en ons sal binnekort met hulle daaroor praat.”

Volgens Sahpra en ander buitelandse owerhede vir medisyneregulering is daar nie genoeg en betroubare data oor ivermektien beskikbaar wat die suksesvolle behandeling van Covid-19 betref nie. Daar is ook nog tot op hede geen klinkklare bewyse dat dit veilig vir mense met Covid-19 is nie.

In hierdie stadium word ivermektien in Suid-Afrika net vir die behandeling van parasiete in vee aangewend.

Sahpra sou egter soms op ’n geval-tot-geval-grondslag ’n art. 21-permit aan ’n mediese dokter en/of apteker toestaan om ivermektien (as ’n ongeregistreerde produk) voor te skryf om toestande soos brandsiekte en kopluise by mense te behandel.

Die formule wat Sahpra vir sy spesiale program wil gebruik, sal nié die dieremiddel wees wat tans in Suid-Afrika beskikbaar is nie.

Volgens Semete-Makokotlela sal die middel vir menslike gebruik, wat oorsee in byvoorbeeld tabletvorm is, waarskynlik ingevoer word.

“Dit sal egter maatskappye moet wees wat deur Sahpra gelisensieer is en moet aan ons vereistes vir veiligheid voldoen.”

Prof. Helen Rees, voorsitter van die Sahpra-raad, deskundige raadgewer van die Wêreldgesondheidsorganisasie (WGO), die Gavi-entstofverbond, die Koalisie vir Epidemiologiese Gereedheid en Innovering (Cepi) en ander WGO-komitees oor aansteeklike siektes, het egter benadruk dat Sahpra as reguleerder nie 'n middel kan invoer nie.

'n Verskaffer moet aansoek doen, het sy gesê.

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.