Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Gesondheid
J&J se entstof is veilig en effektief, sê FDA

Johnson & Johnson se enkeldosis-entstof, wat ook doeltreffend teen die Suid-Afrikaanse variant van die koronavirus is, blyk veilig en effektief te wees met die gebruik daarvan in proewe, sê amptenare van Amerika se voedsel-en-medisyne-owerheid (FDA).

Dit sal moontlik vandeesweek nog die weg baan vir goedkeuring vir noodgebruik, sê die FDA.

Die FDA se paneel van onafhanklike kenners vergader Vrydag om te besluit of die entstof finaal goedgekeur moet word.

Hoewel die FDA nie verplig is om die amptenare wat die groenlig gegee het, se aanbeveling te aanvaar nie, is dit wel wat hy gewoonlik doen.

Entstowwe wat deur Pfizer en Moderna vervaardig is, is op dieselfde basis deur die FDA goedgekeur.

J&J sê in dokumentasie wat aan die FDA voorgelê is dat sy entstof doeltreffend is om asimptomatiese infeksies te voorkom.

Volgens J&J dui voorlopige ontledings van die toetse daarop dat daar 16 gevalle van asimptomatiese gevalle in die kontrolegroep was, vergeleke met net twee in die groep wat die inenting gekry het.

Dit dui op ’n doeltreffendheid van 88%.

Asimptomatiese infeksies
johnson & johnson
Foto ter illustrasie deur Reuters

Hoewel die voorkoming van asimptomatiese infeksies nie die hoofdoel van die proewe was nie, dui die vermindering in asimptomatiese gevalle daarop dat dit ook die verspreiding van die virus kan beperk.

J&J het in Januarie gesê sy entstof is 66% doeltreffend teen verskeie variante van die koronavirus. Bykans 44 000 mense het aan sy proewe deelgeneem.

Die entstof se doeltreffendheid het gewissel van 72% in Amerika tot 66% in Latyns-Amerika en 57% in Suid-Afrika.

85% doeltreffend teen ernstige gevalle 

covid-19

Die entstof was egter 85% doeltreffend om ernstige gevalle van Covid-19 te voorkom.

Die entstof was effektief om die risiko van Covid-19 te verminder en het vir minstens 14 dae ná inenting voorkom dat mense positief vir die virus toets.

Net twee mense het 14 dae nadat hulle ingeënt is, die virus opgedoen en moes mediese behandeling kry, vergeleke met 14 mense in die kontrolegroep.

Ná 28 dae het nie een van die mense wat ingeënt is die virussiekte erg genoeg gekry dat hulle mediese ingryping nodig gehad het nie, terwyl sewe in die kontrolegroep wel hulp moes kry.

Newe-effekte

Drie mense het ernstige newe-effekte tydens die proewe getoon wat waarskynlik met die entstof verbind kon word, maar die FDA sê sy ontleding het nie op enige gesondheidsgevare gedui wat noodgebruik sou uitsluit nie.

Volgens die FDA is van die algemene newe-effekte pyn op die plek waar mens ingespuit word (48,6%), hoofpyn (39%), moegheid (38,2%) en spierpyn (33,2%).

Van die ander newe-effekte was dat 9% van mense ’n koors ontwikkel het, maar net 0,2% se koors was baie hoog.

Een geval van ’n harttoestand kan moontlik met die entstof verbind word.

Dit is onwaarskynlik dat gevalle van Guillain-Barre-sindroom met die entstof verbind kan word, maar daar is te min data beskikbaar om ’n gevolgtrekking te maak.

Dit is die eerste keer dat J&J meer data as net die syfers van doeltreffendheid bekend maak.


Meer oor:  Fda  |  Koronavirus  |  Entstof  |  Pandemie  |  Inentings  |  Covid-19  |  Johnson & Johnson
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.