Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Gesondheid
NGV: Staat begin siekfondse inperk

Die Raad op Mediese Skemas (RMS) se besluit dat sekere hospitaalplanne binnekort onwettig gaan wees, sal beteken dat talle mense met mediese versekering voortaan na staatshospitale sal moet gaan omdat hul hospitaalplanne nie meer wettig gaan wees nie.

Dr. Sipho Kabane, uitvoerende hoof van die RMS.
Dr. Sipho Kabane, uitvoerende hoof van die RMS.

Volgens die maatreëls wat Woensdag aangekondig is, sal talle hospitaalplanne oor ’n bietjie meer as ’n jaar van nou af onwettig wees. Maar omdat die regering se droom van ’n omvattende Nasionale Gesondheidsversekering (NGV), wat eenvormige gesondheidsorg aan al die land se inwoners beloof, eers in 2026 in werking gaan tree, sal dié mense uitgelewer wees aan die swakste mediese sorg denkbaar. Syfers van die Vryemarkstigting dui daarop dat twee miljoen mense tans van sulke hospitaalplanne gebruik maak.

Die RMS se aankondiging – wat heeltemal uit die bloute gekom het – trek ook ’n streep deur ’n dekade lange projek van mediese fondse om bekostigbare private gesondheidsorg vir tot 8 miljoen laerinkomstehuishoudings moontlik te maak. Mediese fondse en die RMS was saam besig met die ontwikkeling van dié planne. Dit sou dit moontlik maak vir huishoudings wat onderskeidelik minder as R16 000 en R6 000 per maand verdien om ook na privaat hospitale te gaan.

Die grootste skok was egter die feit dat die RMS – ’n liggaam wat wetlik verplig is om die belange van mediesefondslede op die hart te dra – twee bestaande mediese versekeringsprodukte sonder enige oorlegpleging verbied het.

Die gevolg is dat net die kleiner-wordende groep rykes en siekes aan mediese fondse behoort.

Die eerste is alle soort hospitaal-kontantpolisse wat deur instellings soos Hollard en Clientèle verkoop word. Dit vergoed polishouers vir sommige hospitaaluitgawes, maar is nie ’n mediese fonds nie.

Die tweede soort is dag-tot-dag-gesondheidsplanne wat veral werkgewers gebruik om vir laerinkomstewerkers die geleentheid te bied om private algemene praktisyns, apteke, tandartse en oogartse te besoek.

Bekende voorbeelde hiervan is  Discovery se Primary Care-planne en Momentum se DomestiCare, wat op huiswerkers gerig is.
Dié produkte moet teen Maart 2021 afgeskaf wees, terwyl die NGV eers in 2026 gaan begin om enige dienste te lewer – ’n datum wat baie meen reeds ambisieus is.

Dr. Sipho Kabane, uitvoerende hoof van die RMS, het in die skrywe bloot gesê die laekosteprojek en die bestaande laekosteprodukte sal die NGV, wat amptelike regeringsbeleid is, ondermyn. Hy sê ook mense word uitgebuit deur opportunistiese produkverskaffers.

Dr. Jonathan Broomberg, uitvoerende hoof van Disc
Dr. Jonathan Broomberg, uitvoerende hoof van Discovery Health.

Hoewel die RMS kragtens wet bestaan met die uitdruklike doel om lede van mediese fondse se belange te bevorder, het die RMS nou al by herhaling sy seën vir en samewerking met die NGV-projek benadruk. Die RMS se direksie word deur die minister van gesondheid aangestel.

Die NGV-wetsontwerp, wat saam met ’n wetsontwerp oor mediese fondse gepubliseer is, lui dat mediese fondse ná die inwerkingstelling van die NGV net aanvullende dienste wat die NGV nie doen nie, sal mag lewer.

Rapport het vroeër berig die tesourie het beswaar gemaak teen die beperkings op mediese fondse in ’n vorige weergawe van die wetsontwerp omdat dit onnodige paniek sou veroorsaak. Die regering het intussen gepaai dat mediese fondse eers beperk sal word nadat die NGV behoorlik funksioneer.

Die mediese bedryf is egter onkant gevang deur die wyse waarop die RMS blykbaar nou ingesleep word om te help met die aanvoorwerk vir die NGV.

Dr. Jonathan Broomberg, uitvoerende hoof van die mediesefondsadministrateur Discovery Health, sê die onverwagte aankondiging raak nie net laerinkomstehuishoudings nie, maar alle hoofstroom-mediesefondsplanne.

Die laekosteprojek is juis begin as ’n manier om mediese fondse geldelik volhoubaarder te maak.

Weens voorgeskrewe minimum voordele (VMV’s), ’n lys van meer as 270 toestande wat ten volle en sonder limiete gedek moet word, raak die differensiasie tussen mediese fondse se topplanne en intreevlakplanne al hoe minder. Aangesien alle planne die minimum voordele moet dek, raak die intreevlakplanne al hoe duurder en onbekostigbaarder. Die gevolg is dat net ’n kleiner-wordende groep van (dikwels ouer) rykes nog ’n mediese fonds kan bekostig. En hoe minder en sieker die oorblywende lede word, hoe onbekostigbaarder word die fonds – ’n klassieke doodspiraal.

Die laekosteprojek – wat in Maart nog in ’n besprekingsdokument van die RMS uiteengesit is – sou ’n uitweg bied deur mediesefondsopsies toe te laat wat nié alle minimum voordele dek nie, maar wel redelike omvattende dienste.

Die RMS se eie vooruitskattings was dat honderdduisende gesinne dan mediese fondse sou kon bekostig, die risikopoel sou vergroot en verbeter en ’n baie groot las van die openbare sektor sou verlig. Die voorgestelde premies in die besprekingsdokument het gewissel van tussen R828 en R1 647 vir ’n hele gesin.

Damian McHugh, uitvoerende hoof van bemarking vir Momentum Health Solutions, sê hulle kan die aankondiging nie net gelate aanvaar nie en sal nou deur Business Unity South Africa (Busa) en ander bedryfsinstansies probeer om die minister en die RMS van plan te laat verander.

McHugh sê die RMS belowe hulle gaan met ’n hersiene minimumvoordelepakket vorendag kom wat die probleem gaan oplos, maar Momentum twyfel of dit teen 2021 in plek gaan wees.

Dié proses sloer ook al jare.

Die RMS het verlede week uiteindelik ’n voorgestelde primêre gesondheidsorgpakket (PHC) gepubliseer vir kommentaar. Daar word algemeen verwag dat dié PHC-pakket as grondslag sal dien vir die NGV-dienste. Die pakket sluit voorkomende gesondheidsdienste soos doktersbesoeke, ’n geslote lys van medikasie, basiese prosedures soos om wonde met steke te heg en besnydenis in.

Kabane verwys na die PHC-pakket as die grondslag vir “die ontwikkeling van ’n bekostigbare en gehaltegesondheidsorg-finansieringspakket vir alle Suid-Afrikaners”.

Broomberg sê die PHC-pakket sal ’n bykomende verpligting vir mediese fondse wees as sommige voordele nie van die VMV-lys verwyder word nie en kan mediese fondse nóg swaarder laat kry.

Die PHC-pakket het nog geen kostebepalings nie. Dis juis gepubliseer vir kommentaar van medici en mediese fondse om data in te stuur oor hul  eise vir dié items sodat die RMS kan bepaal wat dit sal kos en hoe haalbaar dit is.

* Lees hier wat Rapport sê.

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.