Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Gesondheid
Pfizer-entstof waarskynlik eers laat in 2021 in SA

Die kandidaat-entstof van Pfizer met ’n voorlopige sukseskoers van 90% sal waarskynlik eers laat aanstaande jaar in Suid-Afrika beskikbaar wees.

’n Gebrek aan geriewe om dit te stoor sal die gebruik daarvan verder beperk.

Prof. Shabir Madhi, ’n entstofkundige aan die Universiteit van Witwatersrand (Wits), het Dinsdag gesê die koronavirusentstof van Pfizer en BioNTech, ’n Duitse vennoot, sal op die vroegste eers in die derde kwartaal van 2021 plaaslik beskikbaar gestel kan word, indien groter en ryker lande dit nog nie opgeraap het nie.

Madhi, wat verbonde is aan die Suid-Afrikaanse Mediese Navorsingsraad (MNR) se analitiese navorsingseenheid vir entstowwe en aansteeklike siektes, sê Pfizer se aankondiging oor die sukseskoers is ’n ongelooflike prestasie en het in ’n kort tyd iets bereik wat gewoonlik jare duur.

Prof. Shabir Madhi Foto: Verskaf

Hy wys egter op twee kwessies wat die beskikbaarheid van dié entstof in Suid-Afrika aansienlik gaan raak – die nodigheid om dit onder ultra-lae temperature te stoor en ander lande wat die voorraad opkoop.

Volgens Madhi moet entstowwe soos die kandidaat, BNT162b2, teen sowat -70 ºC geberg word en sulke temperature word slegs in gespesialiseerde laboratoriums gebruik.

“Daar is uiters beperkte vermoë om dié geriewe in lande sonder die kapasiteit beskikbaar te stel.”

Wat die beskikbare voorraad betref, het Amerika reeds ’n kontrak van miljarde dollar gesluit om 100 miljoen dosisse van die kandidaat-entstof aan te skaf. Dit moet in twee dosisse geneem word.

Ander welaf lande in Europa, Noord-Amerika en Asië het ook reeds voorafbestellings geplaas en kan die meeste van die oorblywende voorraad opraap.

“Dit gaan waarskynlik daartoe lei dat die voorraad wat teen die derde kwartaal nog beskikbaar is, reeds bespreek sal wees. As gevolg van dié twee redes is die kanse skraal dat dit voor die derde kwartaal beskikbaar sal wees en selfs dan is dit onwaarskynlik dat die nodige infrastruktuur aangebring sal word.”

Pfizer en BioNTech het ’n kontrak van $1,95 miljard met die Amerikaanse regering gesluit om 100 miljoen dosisse van vanjaar af te lewer, sowel as ooreenkomste met die Europese Unie, Brittanje, Kanada en Japan, berig Reuters.

Die farmaseutiese maatskappy het ook aangedui dat hy beoog om soveel as 1,3 miljard dosisse van die kandidaat-entstof in 2021 te vervaardig, met 50 miljoen dosisse vanjaar.

Madhi sê daar is al voorlopige uitslae van die studie van die entstof op ’n klein groep mense en meer data behoort vandeesmaand beskikbaar gestel te word.

“Indien daar enige kommer oor veiligheid was, sou dit tydens die uitvoer van die studies uitgekom het.”

Dit is ook die eerste keer dat nuwe tegnologie met die gebruik van sogenaamde “boodskapper-RNS” vir ’n entstof ingespan is, volgens Madhi.

Genetiese materiaal wat die skerppunt-proteïene van die virus kodeer, word gebruik om by spierweefsel in te spuit, waarna die spier self skerppunt-proteïene vervaardig en aan die immuunstelsel blootstel om teenliggame te skep.

Dié benadering is voorheen in die ontwikkeling van kankerbehandelings gebruik, het Madhi gesê.

Dit kan ook glo vinnig op groot skaal vervaardig word omdat dit van sintetiese gene gebruik maak en nog ’n kandidaat-entstof met boodskapper-RNS van Moderna gaan na verwagting later vandeesmaand die uitslae van ’n grootskaalse studie bekend maak.

Albert Bourla, uitvoerende hoof van Pfizer. Foto: AP Photo/Pablo Martinez Monsivais

Pfizer het Maandag bekend gemaak dat ’n tussentydse ontleding van die doeltreffendheid van die kandidaat-entstof ’n sukseskoers van meer as 90% sewe dae ná die tweede dosis gevind het, in vergelyking met die mense wat ’n plasebo ontvang het.

Dit kom neer op 28 dae se beskerming sedert die inentings begin het, maar die finale syfer kan wissel namate die studie voortgaan, luidens ’n verklaring.

Verdere inligting oor die veiligheid van die entstof word ook ingesamel.

Dr. Albert Bourla, Pfizer se uitvoerende hoof, het Maandag met die bekendstelling van die eerste uitslae van sy fase-drie-toetse gesê dit is ’n “groot dag vir die wetenskap en die mensdom”.

Hy het gesê in ’n tyd waar die infeksies weer die hoogte inskiet, is die wêreld nou ’n stap nader daaraan om ’n “broodnodige deurbraak” teen die pandemie te maak.

Fase drie van die kliniese studie van die entstof het op 27 Julie begin en 43 538 deelnemers tot op hede gehad, waarvan 38 955 teen Sondag ’n tweede dosis ontvang het.

Pfizer sê sowat 42% van die deelnemers wêreldwyd en 30% in die VSA is van “diverse ras- en etniese agtergronde”. Die studie gaan voort totdat 164 Covid-19-gevalle aangemeld word en daar word ook gekyk of dit beskerming bied aan mense wat reeds die virus opgedoen het en of hulle weerstand kan bied om nie ernstig siek te raak nie.

Die deelnemers sal nog twee jaar lank gemonitor word om die entstof se veiligheid op lang termyn te bepaal.

Ugur Sahin, uitvoerende hoof van BioNTech, het aan Reuters gesê hy is optimisties dat die entstof se uitwerking ’n jaar sal duur, maar dit is nog nie bevestig nie.


Meer oor:  Pfizer  |  Koronavirus  |  Entstof  |  Covid-19
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.