Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Gesondheid
SA staak ook tydelik toediening van J&J-entstof

Suid-Afrika het as voorsorgmaatreël die toediening van die Johnson & Johnson-entstof tydelik opgehef totdat daar groter duidelikheid kom oor ’n moontlike verband tussen dié entstof en ’n seldsame siektetoestand.

Dr. Zweli Mkhize, minister van gesondheid, het Dinsdagaand dié aankondiging op ’n aanlyn mediakonferensie gemaak.

Hy sê die besluit spruit uit kommer omdat die Amerikaanse gesondheidsreguleerders vroeër die dag dieselfde stap in die VSA aangekondig het. Mkhize het benadruk dat Suid-Afrika die besluit slegs as voorsorgmaatreël geneem het en dat dit nie sy inentingsprogram, wat swaar op die J&J-entstof staatmaak, behoort te ontwrig nie.

“Ek doen ’n oproep om kalmte en geduld terwyl ons die versekering gee dat ons volhou om na behore deur die wetenskap gelei te word om die veiligheid van ons mense te verseker namate ons die inentingsveldtog uitvoer.”

Die Amerikaanse voedsel-en-medisyne-owerheid (FDA) en sentrums vir siektebeheer en -voorkoming (CDC) se besluit is daarop gegrond dat ses vroue bloedklonte tesame met lae bloedplaatjievlakke ontwikkel het nadat hulle met die J&J-entstof ingeënt is. Een van hulle is dood en een is in die waakeenheid.

Miljoene mense in die VSA het reeds inentings met die entstof van J&J ontvang.

Mkhize het plaaslike wetenskaplikes dringend geraadpleeg, wat aanbeveel het dat die besluit deur die FDA nie ligtelik opgeneem kan word nie.

“Gegrond op hul raad, het ons besluit om die verspreiding vrywillig te staak totdat die verband tussen die ontwikkeling van bloedklonte en die J&J-entstof voldoende ondersoek is,” sê Mkhize.

Ek doen ’n oproep om kalmte en geduld terwyl ons die versekering gee dat ons volhou om na behore deur die wetenskap gelei te word om die veiligheid van ons mense te verseker namate ons die inentingsveldtog uitvoer.

Volgens hom het nie ’n enkele gesondheidswerker wat in die plaaslike Sisonke-studie ingeënt is die betrokke siektetoestand ontwikkel wat in die VSA aangemeld is nie.

“Ons hoop die kwessie sal binne dae opgeklaar word.”

Mkhize sê gegewe die voorlopige literatuur is plaaslike wetenskaplikes vol vertroue dat die FDA se besluit nie tot ’n permanente opheffing sal lei nie. Die Suid-Afrikaanse Gesondheidsproduktebeheerraad (Sahpra) sal intussen verdere inligting van J&J en die FDA aanvra en die regering daaroor inlig.

Mkhize het ook aangekondig dat Suid-Afrika se eerste groot besending van die J&J-entstof van die Aspen-fasiliteit in die Oos-Kaap einde volgende week verwag word.

Volgens hom het die regering, wat reeds ’n kontrak gesluit het vir 20 miljoen dosisse van die entstof van Pfizer-BioNtech, ’n verdere 10 miljoen dosisse verseker.

“Dit beteken in die uiters onwaarskynlike scenario dat die ingebruikneming van J&J (se entstof) heeltemal opgehef word, sal ons geen struikelblok hê om met fase 2 voort te gaan met Pfizer nie.”

Prof. Helen Rees, voorsitter van Sahpra, benadruk dat die enkele voorvalle in die VSA op ’n baie klein risiko dui, indien daar wel enige verband is, synde dat miljoene reeds die inenting ontvang het. Volgens haar moet veiligheidsaanduiders egter fyn dopgehou word wanneer groot dele van die bevolking die entstof ontvang.

“Maar selfs as daar ’n verband (met die siektetoestand) is, moet daar bepaal word of die entstof nie steeds toegedien moet word omdat die risiko so klein is nie,” sê sy.

Prof. Glenda Gray, hoof van die Suid-Afrikaanse Mediese Navorsingsraad (SAMNR), sê hulle sal ondersoek instel of enige pasiënte in die Sisonke-studie van die spesifieke soort bloedklonte ontwikkel het.

Hulle dien reeds op ’n gereelde grondslag verslae oor veiligheid by Sahpra in.

Maar selfs as daar ’n verband (met die siektetoestand) is, moet daar bepaal word of die entstof nie steeds toegedien moet word omdat die risiko so klein is nie.

Peter Marks, direkteur van die FDA se sentrum vir biologiese ontleding en navorsing, het op ’n afsonderlike aanlyn mediakonferensie gesê hulle het “ses verslae ontvang oor ’n seldsame soort bloedklont in die brein (serebrale aarsinustrombose – CVST), gekombineer met ’n lae bloedplaatjievlak in vroue tussen die ouderdom van 18 en 48 jaar, wat simptome gehad het tussen ses en 13 dae nadat hulle die entstof ontvang het”.

Volgens hom word alternatiewe behandeling vir die siektetoestand vereis omdat die gewone behandeling vir bloedklonte vir dié pasiënte dodelik kan wees.

Volgens Marks word die bloedklonte waarskynlik deur dieselfde “meganisme” veroorsaak as met die AstraZeneca-entstof, waarvan die gebruik in verskeie Europese lande ophef is, ook weens ’n beweerde verband met uiters seldsame gevalle van bloedklonte.

“Die FDA sal nuwe feitestelle met die newe-effekte aan gesondheidswerkers en pasiënte verskaf sodat gesondheidsverskaffers na behore ’n besluit kan neem oor behandeling wanneer iemand wat ingeënt is met die simptome van die siektetoestand opdaag,” sê Marks.

Op die vraag oor of hulle nie oorreageer nie, het amptenare van die FDA gesê hulle probeer slegs versigtig wees wat negatiewe uitwerkings rakende Covid-19-entstowwe betref.

Meer oor:  Entstof  |  Enstof-Newe-Effekte  |  J&J  |  Covid-19  |  Johnson & Johnson
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.