Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Gesondheid
Sahpra tref spesiale reëling vir toediening van ivermektien

Dokters sal eersdaags ivermektien vir mense met Covid-19 kan voorskryf, maar die beskikbare data oor die middel het die Suid-Afrikaanse Gesondheidsproduktebeheerraad (Sahpra) nog nie oortuig om dit vir menslike gebruik te registreer nie.

Sahpra het Woensdag op ’n mediakonferensie gesê dat hy ’n program sal koördineer wat “beheerde en gekontroleerde deernis-toegang” tot ivermektien vir die behandeling van Covid-19 moontlik sal maak.

Dit beteken egter nie dat sy standpunt oor ivermektien verander het nie, sê dr. Boitumelo (Tumi) Semete-Makokotlela, hoof van Sahpra. Deur die program kan Sahpra egter toesien dat die middel nie onwettig gebruik word nie terwyl die raad nog data oor die doeltreffendheid en veiligheid daarvan insamel.

Ivermektien word in Suid-Afrika vir diere gebruik om parasiete soos wurms te behandel. Medici kan wél van geval tot geval vir ’n art. 21-permit aansoek doen om ivermektien (as ’n ongeregistreerde produk) vir pasiënte voor te skryf om toestande soos brandsiekte en kopluise te behandel.

Sahpra maak binnekort meer besonderhede oor die nuwe program bekend.

‘Navorsing beperk’

Semete-Makokotlela het Woensdagmiddag weer na ’n rits voorlopige studies oor ivermektien verwys, maar volgehou medisynereguleerders wêreldwyd stem saam dat daar onvoldoende bewyse is vir ’n reguleerder om ’n “ingeligte besluit” oor ivermektien vir spesifiek die behandeling van Covid-19 te neem.

Sy het gesê Sahpra het die afgelope tyd groot reguleerders soos die Amerikaanse voedsel-en-dwelmadministrasie (FDA) en die Britse reguleringsagentskap vir medisyne en gesondheidsorgprodukte (MHRA) geraadpleeg en almal is dit eens: Daar is nie genoegsame, betroubare data oor ivermektien beskikbaar wat die suksesvolle behandeling van Covid-19 staaf nie.

Maar as ’n reguleerder verstaan ons die konteks met beperkte moontlikhede (vir behandeling) waarin ons is. Sahpra het sy besluit op grond hiervan geneem.

Daar is tot op hede ook geen klinkklare bewyse oor die veiligheid daarvan vir mense wat dit voorkomend of as behandeling teen Covid-19 gebruik nie.

Selfs die Wêreldgesondheidsorganisasie (WGO) erken data hieroor is beperk, sê Semete-Makokotlela.

“Maar as ’n reguleerder verstaan ons die konteks met beperkte moontlikhede (vir behandeling) waarin ons is. Sahpra het sy besluit op grond hiervan geneem.

“Dit (die program) sal ons in staat stel om die proses te monitor. Dit sal in samewerking met gesondheidswerkers gedoen word en ons sal binnekort met hulle daaroor praat.”

'Moenie dieremedisyne drink'

Volgens Semete-Makokotlela gaan die middel wat voorgeskryf word, nié die dieremiddel wees wat tans in Suid-Afrika beskikbaar is nie.

’n Oorsese middel wat vir menslike gebruik aangepas is en in byvoorbeeld tablet- of kapsulevorm voorkom, sal deur farmaseutiese maatskappye ingevoer moet word.

“Dit sal egter maatskappye moet wees wat deur Sahpra gelisensieer is en moet aan ons vereistes vir veiligheid voldoen,” het sy gesê.

Prof. Helen Rees, voorsitter van die Sahpra-raad en deskundige raadgewer van die WGO, die Gavi-entstofverbond, die Koalisie vir Epidemiologiese Gereedheid en Innovering (Cepi) en ander WGO-komitees oor aansteeklike siektes, het benadruk dat Sahpra as reguleerder nie by magte is om ’n middel in te voer of self kliniese proewe te doen nie. ’n Verskaffer moet hiervoor aansoek doen, het sy verduidelik.

Volgens Rees is hierdie besluit deur Sahpra “anders as ons goedkeuring van byvoorbeeld die AstraZeneca-entstof”.

“Daarvoor het ons data oor veiligheid en doeltreffendheid,” het sy gesê.

Op ’n vraag van ’n joernalis oor die feit dat ivermektien al jare lank vir mense voorgeskryf word, het Semete-Makokotlela gesê dis voorheen gelys, “maar nie vir profilakse (as voorkomingsmiddel) of die behandeling van Covid-19 nie.”

Sy het Dinsdagaand in ’n paneelgesprek op BusinessDay TV verduidelik: “Dit word al jare gebruik en dit word as veilig beskou, maar (dít is) vir die spesifieke behandeling van spesifieke toestande teen ’n spesifieke dosering”.

Reaksie

Volgens dr. Gerhard Verdoorn, kenner in toksikologie verbonde aan die Griffon-gifinligtingsentrum, sal hierdie nuwe program toesien dat ivermektien deur ’n dokter voorgeskryf, toegedien en gekontroleer word.

Hy is verheug oor die besluit.

“Die ‘deernis’ beteken: In ’n situasie waar iemand dalk kan sterf, word daar besluit om hom ivermektien te gee om te kyk of dit help.

“Dis ’n stap in die regte rigting – ook dat Sahpra erken daar is steeds nie bewys dat dit veilig is nie. Of dit simptome verlig of nie, mense wat probeer het om die goed te gebruik, bel my steeds.”

Dis ’n stap in die regte rigting – ook dat Sahpra erken daar is steeds nie bewys dat dit veilig is nie. Of dit simptome verlig of nie, mense wat probeer het om die goed te gebruik, bel my steeds.

AfriForum sê in ’n verklaring sy hofsaak oor ivermektien teen Sahpra en dr. Zweli Mkhize, minister van gesondheid, gaan op 2 Februarie in die hooggeregshof in Pretoria voort.

Die organisasie meen Sahpra se besluit is “ ’n stap in die regte rigting”, maar “uiters beperkend”.

Die besluit bied volgens AfriForum “steeds nie die nodige verligting en sekerheid wat dringend nodig is nie”.

Meer oor:  Koronavirus  |  Ivermektien  |  Covid-19
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.