Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Gesondheid
Suid-Afrika is deel van studie om entstof te vind

Die soektog na ’n entstof teen en medikasie vir die koronavirus is in volle gang en Suid-Afrika neem aan van dié studies deel.

Soveel as 35 maatskappye werk aan entstowwe terwyl ’n paar bestaande medisynes ook geïdentifiseer is wat doeltreffend kan wees om mense met Covid-19 te behandel.

Die Wêreldgesondheidsorganisasie (WGO) het Woensdag aangekondig dat kliniese toetse binnekort begin om te bepaal watter medisyne vir MIV- en malaria-pasiënte ook doeltreffend is teen Covid-19. Suid-Afrika en nege ander lande het ingestem om aan die studie onder WGO-toesig deel te neem.

Prof. Wolfgang Preiser, hoof van mediese virologie by die departement patologie aan die Universiteit Stellenbosch, het bevestig hy is deel van ’n groep wat voorbereidings tref vir Suid-Afrikaanse deelname.

Entstof dalk eers oor 18 maande gereed.

“Dit is ’n groot en dringende poging. Ons het reeds voor die uitbreking ’n prokolol voorberei, so ons begin darem nie van voor af nie. Die toetse sal gelisensieerde medikasies se moontlike doeltreffendheid teen Covid-19 vergelyk. Die bevindings . . . moet behoorlik ge-evalueer word in ’n groot toets wat ordentlik ontwerp is.”

Volgens Preiser neem die papierwerk “weke” selfs wanneer die proses bespoedig word. “Anders is dit ’n cowboy-benadering tot nadeel van pasiënte en die wetenskap. Ons het darem nog nie baie pasiënte nie, so ons sal uiteindelik reg wees, hoop ek!”

Middels wat ­getoets word is remdesivir, die kombinasie van die twee MIV-teenmiddels lopinavir en ritonavir, en die malaria-teenmiddel chlorokwien. Al die middels is reeds in proefbuise of op diere getoets. Dié toetse het gewys dat dit moontlik suksesvol kan wees teen Covid-19.

The New England Journal of Medicine het egter die afgelope week berig dat in ’n Chinese studie bevind is dat die lopinavir-ritonavir-kombinasie nie die oorlewingskoers of die tempo van herstel onder Covid-19-pasiënte in China verbeter het nie. Van die 199 pa­siënte wat die middel gekry het, is 22% dood. Dit kan wel wees dat die resultate skeefgetrek is “deur ’n ernstig siek bevolking”. Die studie was ook nie blind nie, wat beteken dokters het geweet watter pasiënte die medisyne gekry het, wat beteken dit kon hul kliniese besluite beïnvloed.

Die middel remdesivir word getoets deur die Amerikaanse firma Gilead Sciences. Remdisi­vir se hoofdoel is om koors te behandel en pasiënte gouer uit die hospitaal te kry. Dit is voorheen op Ebola-pasiënte getoets maar het nie die gewenste uitwerking gehad nie.
Intussen is die wedloop om ’n entstof te ontwikkel op dreef.

Moderna, ’n biotegniese maatskappy in Boston, Amerika, het ’n rekord opgestel deur ’n kandidaat-entstof gereed te hê binne 42 dae nadat die DNS van die virus deur Chinese wetenskaplikes ontsyfer is. ’n Eerste-fase-studie op gesonde vrywilligers het reeds in Seattle in die VSA begin. As die nuwe middel, mRNA-1273, veilig is, sal ’n groter studie begin om te bepaal of dit mense teen infeksie beskerm.

Die Moderna-entstof bestaan uit “boodskapper-RNA”, wat sinteties vervaardig is. Dié RNA-molekules spoor die liggaam aan om teenliggaampies te produseer wat jou teen die virus beskerm. Wetenskaplikes waarsku egter dat dié tegniek nog nooit gebruik is om ’n entstof wat goedgekeur is vir menslike gebruik te vervaardig nie.

Die studie is boonop nog net in sy eerste fase – waar die middel vir ’n klein groep vrywilligers gegee word om te kyk of dit veilig is. Eers dan kan fase twee en drie begin waartydens die middel eers aan ’n paar honderd en daarna ’n paar duisend vrywilligers gegee word om te kyk of dit doeltreffend is.

Nog ’n Amerikaanse maatskappy, Inovio, het reeds ’n DNS-entstof – wat ook die liggaam aanspoor om teenliggaampies te vervaardig – suksesvol op muise en marmotjies getoets. ’n Studie op ape het pas begin en hulle verwag om volgende maand met hul eerste toetse op mense te begin.

Werk is ook aan die gang om ’n entstof op ’n meer tradisionele wyse te ontwikkel – soos om minder skadelike weergawes van die nuwe koronavirus te kweek wat dan die liggaam aanmoedig om teenliggaampies te kweek wat jou beskerm teen die ware Jakob.

Ander werk behels dat wetenskaplikes klein dele van die koronavirus se DNS “lig” en in skadelose virusse inplant wat dan as entstof gebruik kan word.

The New York Times het berig daar is ’n reusewedloop tussen veral Amerikaanse, Europese en Chinese firmas om die eerste te wees om ’n entstof te ontwikkel.

Wetenskaplikes verwag dat die ontwikkeling van ’n geslaagde entstof minstens 18 maande sal duur.

Meer oor:  Wolfgang Preiser  |  Wgo  |  Entstof  |  Covid-19  |  Koronavirus
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.