Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Gesondheid
VSA-owerheid keur Covid-19-middel amptelik goed

Die Amerikaanse voedsel-en-medisyne-owerheid (FDA) het Donderdag ’n antivirale middel van Gilead Sciences genaamd remdesivir goedgekeur vir gebruik op gehospitaliseerde pasiënte met Covid-19.

Die middel is tans die eerste en enigste middel wat vir die behandeling van die virus in Amerika goedgekeur is.

Remdesivir, wat binneaars toegedien word, is een van die middels wat gebruik is om pres. Donald Trump mee te behandel nadat hy Covid-19 opgedoen het.

Die FDA se amptelike goedkeuring is aangekondig slegs ure voor Vrydag se finale presidensiële debat tussen Trump en sy Demokratiese teenstander, Joe Biden, voor die verkiesing op 3 November.

Remdesivir is sedert Mei onder ’n FDA-noodgoedkeuring beskikbaar, nadat ’n studie deur die Nasionale Instituut vir Gesondheid daarop gedui het dat die middel die tyd in die hospitaal van pasiënte met sowat vyf dae verminder het.

Maar die Wêreldgesondheidsorganisasie (WGO) het verlede week gesê hul wêreldwye toetse van Covid-19-behandelings het bevind dat remdesivir nie ’n beduidende invloed op die duur van ’n pasiënt se hospitaalbehandeling of kans op oorlewing het nie. Die studie is nie deur kenners van buite hersien nie.

Gilead het die moontlikheid van vooroordeel in die WGO-studie bevraagteken, aangesien dit nie ’n “blinde toets” was nie, wat beteken dat pasiënte en hul dokters met die toetse nie bewus was van watter behandelings gebruik word nie.

Remdesivir, wat onder die handelsnaam Veklury verkoop sal word, kos sowat R50 000 ($ 3 120) vir ’n behandelingskursus van vyf dae, of ongeveer R38 000 ($ 2 340) vir regeringsinstansies wat die middel aankoop.

Gilead se aandeelprys het in verhandeling ná ure met 4,3% gestyg tot $63,30.

Remdesivir het die standaardbehandeling geword vir pasiënte met ernstige Covid-19-simpotome, selfs al is daar nie bewys dat dit die oorlewingskoers verbeter nie.

Daar is ook nie bewyse dat die middel ’n beduidende verskil maak by matig siek pasiënte nie, en talle dokters is huiwerig om dit te gebruik vir pasiënte met minder ernstige simptome.

Gilead het gesê hulle voldoen tans aan Amerika se vraag na die middel en verwag om teen einde Oktober aan die wêreldwye vraag te voldoen.

Die maatskappy het gesê Veklury het gereguleerde goedkeuring óf tydelike toestemming in ongeveer 50 lande.

Die FDA het ook Donderdag ’n nuwe noodgoedkeuring uitgereik vir remdesivir om pediatriese pasiënte van onder 12 jaar oud in die hospitaal te behandel, maar genoeg weeg om ’n binneaarse middel te ontvang.

Gilead het gesê hulle werk nog daaraan om die volle potensiaal van remdesivir te verstaan onder verskillende toestande en as deel van ’n gekombineerde behandeling.

’n Weergawe van die middel wat ingeasem kan word en buite die hospitaal gebruik kan word, indien goedgekeur, word ook tans deur maatskappy ontwikkel. Reuters


Meer oor:  Amerika  |  Remdesivir  |  Covid-19  |  Koronavirus  |  Virus  |  Behandeling
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.