Tharina Human was oënskynlik 'n goeie vriendin van Angeline de Jager. Hulle verskyn op verskeie foto's saam op Human se Facebookblad wat intussen gesluit is.

'n Gemeenskaplike vriendin het vroeër op voorwaarde van anonimiteit aan Netwerk24 gesê die vriendskap het reeds byna twee maande voor die ontvoering van Angeline se dogtertjie, Amy'Leigh, versuur.

Die saak teen Human en haar medeverdagtes, Laetitia Nel en Pieter van Zyl, is tot 19 September vir formele borgtogaansoeke verdaag. 

Vier dae nadat sy in hegtenis geneem is, verskyn Tharina Human (26), in die landdroshof in Vanderbijlpark in verband met die ontvoering van haar eertydse vriendin, Angeline de Jager, se dogtertjie, Amy'Leigh.  Foto: Felix Dlangamandla

Tharina Human voor haar in hegtenisname in verband met die ontvoering van Amy'Leigh de Jager (6). Sy was 'n gr. RR-onderwyseres aan dieselfde skool as die klein meisie en is intussen geskors.  Foto: Facebook

Tharina Human op haar troudag met Rudi Human. Sy het hom intussen verlaat en het teruggetrek Vanderbijlpark toe. Haar skoonpa het vroeër aan Netwerk24 gesê hoewel die egpaar nie geskei is nie, is Tharina die skoonouers se huis belet.

"Sy het my seun 'n jaar en 'n half, twee jaar gelede, net so in Rustenburg gelos waar hulle gebly het."  Foto: Facebook

So het Tharina Human gelyk toe sy Maandag in die landdroshof in Vanderbijlpark op aanklag van ontvoering verskyn het. Sy is nie gevra om te pleit nie en die saak is tot 19 September vir borgtogverrigtinge uitgestel.  Foto: Felix Dlangamandla

Tharina Human, een van die vermeende ontvoerders wat Maandag in die landdroshof in Vanderbijlpark verskyn het, hurk langs klein Amy'Leigh op 'n foto wat op Facebook geplaas is.

Human (26) was 'n gr. RR-onderwyseres aan Amy'Leigh se skool, die Laerskool Kollegepark in Vanderbijlpark. Sy is intussen geskors en staar tugstappe in die gesig, hangende die strafsaak teen haar.  Sy en die ander twee verdagtes, Laetitia Nel en Pieter van Zyl, bly in aanhouding tot 19 September wanneer hulle formeel om borgtog sal kan aansoek doen. 

Die pa van Tharina Human, een van die drie beskuldigdes in die ontvoeringsaak van Amy’Leigh de Jager, het die polisie vir hul puik optrede geloof en die gemeenskap van Vanderbijlpark en die Laerskool Kollegepark om verskoning gevra dat sy dogter by die misdryf betrek word.

Amy’Leigh, 'n gr. R-leerling, is verlede Maandag voor die skool ontvoer. 

“Ek vra uit die diepte van my hart om verskoning. Dit wat gebeur het, is buite ons beheer, maar ons vra vir julle om verskoning en die goeie, groot Geneesheer sal die wonde toemaak en heel maak," het Riaan Botha (66) buite die landdroshof in Vanderbijlpark gesê.

Hy het gesnik soos hy huil. Botha is deur Anneke Taljaard, ’n familievriendin, ondersteun. 

Human het Maandag saam met Laetitia Nel en Pieter van Zyl verskyn. Hulle staan op aanklag van ontvoering tereg. Human se hare was in 'n los bolla agter haar kop vas gemaak. Sy het in 'n stadium met Nel gesels. Nel het net voor haar uitgestaar. Van Zyl het heeltyd kop onderstebo gestaan en slegs opgekyk toe landdros Hussain Khota met hom gepraat het. Wynand en Angeline de Jager, Amy’Leigh se ma en pa, was ook in die hof. Die ouers het voor in die hof gesit en Angeline het in ’n stadium haar kop op Wynand se skouer gerus.

Stoffel Venter verteenwoordig Nel en Jaco van Heerden vir Human. Van Zyl maak van Regshulp SA gebruik.

Human het haar pa omhels toe die hof tot 19 September vir die formele borgtogaansoeke verdaag.   Foto: Felix Dlangamandla

Fotograwe het net 'n kort rukkie tyd gehad om die drie vermeende ontvoerders van klein Amy'Leigh de Jager af te neem. Laetitia Nel, in die pers baadjie, het vir die kameras weggekruip. Sy verskyn in die middel van Tharina Human, 'n geskorste onderwyseres van die Laerskool Kollegepark, en Pieter van Zyl, wat glo op dieselfde kleinhoewe as Nel bly.  Foto: Felix Dlangamandla