Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Hof
OORSIG: Moenie my pa vir ewig wegsit nie, smeek Packham-dogter

Die hof het Woensdag getuienis ter strafversagting van die veroordeelde moordenaar Rob Packham aangehoor. 

Rob Packham
Rob Packham. Foto: Jaco Marais

Packham is Maandag skuldig bevind aan die moord op sy vrou, Gill. Dit was inderdaad hy wat sy vrou se lyk in die motor van sy kattebak gelaai en dit later aan die brand gesteek het om van bewyse ontslae te raak, het regter Elize Steyn beslis.

Packham het 'n dubbele lewe gelei en dit was duidelik dat hy op verskeie vlakke mense mislei het. Aan sy vrou het hy voorgegee dat hy aan hul huwelik wou werk, maar hy het ook vir die sogenaamde Persoon X, met wie hy 'n buite-egtelike verhouding gehad het, gesê hy wou skei.

Die hof het Packham as emosieloos beskryf en 'n suksesvolle leuenaar, hoewel hy in die hof senuweeagtig geraak het omdat hy nie sy optrede kon verduidelik nie.

22 Mei 11:48:31

Getuienis word gelewer oor die susters se impakverslag en hoe lank hulle die verhoor bygewoon het.

Regter Steyn sê dan aan Kerry: Die hof wens jou alles van die beste toe vir 'n toekoms wat sekerlik moeilik gaan wees.

Die hof verdaag tot 10 Junie vir slotbetoë.

22 Mei 11:38:59

Regter Steyn aan Kerry (Packham se dogter): Ek is bewus daarvan dat dit moeilik moet wees vir jou om te getuig, veral omdat die een persoon vermoor is - en die ander ouer bly agter. Die een kan nog 'n invloed op jou lewe hê. Ek verstaan dit.

Met betrekking tot van die slagofferimpakverslae - wat was jou ma se verhouding met haar susters?

Kerry: Sy het drie susters - een in Amerika, een in Frankryk en een Nederland: Helen, Roslyn en Gillian.

Steyn: Volgens die impakverslae het jou ma nie oor haar huwelik en finansiële probleme met haar susters gepraat nie.

Kerry: Van hulle was vervreem. Gill en Roslyn het hul verhouding begin herbou en sy het met die jongste suster ook begin herbou.

Steyn: Is jy bewus daarvan dat twee van die susters baie getraumatiseerd is?

Kerry: Ja, almal van ons is. My tannie aan my pa se kant ook.

Steyn: Het jy vir traumaberading gegaan?

Kerry: Ek het een keer 'n week gegaan. Ek's bewus daarvan dat almal aan albei kante vir berading gegaan het.

Steyn: Wil jy enigiets byvoeg oor hoe haar dood jou geraak het?

Kerry: Sy het altyd daarin belang gestel om te hoor hoe my dag was. Sy was maklik om mee te praat. Ek het dit geniet om met my ma te praat - haar dood het 'n groot gat in my lewe gelos, in almal se lewe, insluitende my pa.

22 Mei 11:36:55

Kerry word weer geroep.

22 Mei 11:32:16

Die hofverrigtinge gaan binnekort voort.

22 Mei 11:14:26

Webster sluit die verdediging se saak

Hy sê die staat het nie getuies om te roep nie, maar het twee impakverklarings van Gill se susters. Die staat vra dat dit nie op die rekord gelees word nie - dis baie persoonlik.

Steyn: Moet jy nie dalk getuies roep om die staat vir meer as die minimum vonnis te vra nie?

Galloway: Die probleem is dat die suster oorsee is en nie kan kom getuig nie.

Webster: Met verwysing na die slagofferimpakstudies, ek versoek die hof om dit voor Vrydag te lees omdat sy Vrydag die land verlaat.

Die hof verdaag tot 11:30.

22 Mei 11:11:54

Regter Steyn: Hoe het jy gevoel dat jou pa nie by jou troue was nie?

Kerry: Ek was hartseer, maar ek het dit verstaan. Ek weet baie mense verstaan dit nie, maar hy is steeds my pa.

Steyn vra Kerry om haar ma te beskryf.

Kerry: Wonderlike vriendin, wonderlike vrou en wonderlike suster  - sy het die grootste hart gehad.

Ek het my ma verloor . . . en ek weet nie hoe om dit te beskryf nie. Ek is platgeslaan.

Steyn: Sy was klein?

Kerry: Ja, sy was 'n bietjie langer as ek.

Steyn: Jou pa se aktiwiteite - het jou ma enige oefening gedoen?

Kerry: Sy was lief vir tuinmaak en het saam met vriende gestap.

Kerry word verskoon.

22 Mei 11:08:24

Galloway: Jy het die hof gevra om nie jou pa "weg te sit" nie. Hoe voel jy oor jou ma wat nie meer daar is nie?

Kerry: Dis baie traumaties en ek werk nog daardeur.

Galloway: Hoewel jou pa sy lewe met julle gehad het, het hy uiteindelik 'n ander lewe gekies.

Kerry: Ek kan nie kommentaar daarop lewer nie.

Die staat is klaar.

22 Mei 11:07:06

Oor die buite-egtelike verhouding

Galloway: Jy beskryf jou pa as 'n wonderlike mens, maar hy het 'n buite-egtelike verhouding gehad.

Kerry: En dit was iets waarvan ek nie geweet het nie.

Galloway: So hy het sy dubbele lewe van jou weggesteek?

Kerry: Ja, hy het.

Galloway: Persoon X het getuig dat jou pa ook die huwelik wou red. Hy het egter aan berader gesê hy en jou ma moet skei sodat hy Persoon X kon sien.

Kerry: Ek het gedink hy het by my tannie gewoon.

Regter Steyn: Soos wat ek dit nou hoor, klink dit asof jou tannie deel was van die verraad. Dit is getuienis wat nie betwis is nie.

Kerry: Ek kan net getuig oor wat ek weet.

Galloway: Jou pa het 'n baie lekker lewe gehad.

Kerry: Ja.

Galloway: Sou dit wees hoekom hy gesê het hy het nie sy vrou lief nie, maar dat hy wel lief is vir sy lewe?

Kerry: Ek kan dit nie beantwoord nie.


22 Mei 11:03:36

Oor die laaste woorde wat sy met Gill gepraat het

Galloway: Jou ma het jou aangemoedig om verlof te neem vir die troue - die laaste keer wat julle gepraat het - so familie was baie belangrik vir haar.

Kerry: Ja, dit was. Die troue was ou vriende van my en nie van my ouers nie.

Galloway: En die feit dat familie vir haar belangrik was, sou pas by haar wat 'n berader wou spreek en die probleme in die huwelik hanteer.

Kerry: Ja, sy was platgeslaan oor die buite-egtelike verhouding, maar dit was haar eie keuse om vir berading te gaan, want sy wou aan die huwelik werk.

Galloway: Jou pa het ook aangedui dat hy die huwelik wou laat werk.

Kerry: Ja.

Galloway: Daar's getuienis oor 'n stryery wat jou ouers op 21 Februarie gehad het.

Kerry: Ja, my pa het my vertel. Ek het die aand van 21 Februarie gebel, maar dit was laat in Kaapstad. My pa het gesê hulle het 'n berader gaan sien en my ma is baie kwaad oor dinge wat hy daar gedeel het en hulle werk daaraan.

Galloway: Het jy met jou ma gepraat daai aand?

Kerry: Nee, maar ek het haar in die agtergrond gehoor.

Regter Steyn: Hoekom het jy nie met jou ma gepraat nie?

Kerry: Ek wou hê hulle moes oor die huwelik praat en hul argument uitsorteer.

Galloway: Wat was jou pa se normale optrede wanneer hulle sou argumenteer?

Kerry: Konflik is iets waarvan my pa nie gehou het nie. Hy het altyd as mediator opgetree tussen ons (dogters en ma) en daar was tye dat hy gefrustreerd geraak het. Die meeste van die tyd wou hy haar egter kalmeer en na haar luister.

Galloway: Ek praat van jou pa en ma - as hulle stry - hoe reageer hy?

Kerry: Hy sou gefrustreerd wees en ander kere probeer hy vrede maak.

Galloway: Hoe?

Kerry: Deur haar te probeer kalmeer en na haar te luister.

Galloway: Het jou ma ooit vrede probeer maak?

Kerry: Albei van hulle.

Galloway: Het jy ooit opgelet hoe hy reageer as hy gekonfronteer word - loop hy weg of wat doen hy?

Kerry: Hy sou nooit wegloop nie.

Galloway: Jy het gesê die Saterdag was jou ma gelukkig omdat jou pa 'n dag vroeg van Jhb af teruggekom het om by haar te wees - op 17 Februarie.

Kerry: Ja.

Galloway: Persoon X het getuig sy het jou pa op 21 Februarie gesien en in daardie ontmoeting het hy gesê hy wou skei.

Kerry: Ek het nie persoonlik daarvan geweet nie, maar ek het gehoor.

Galloway: Jou ma wou ook skei - sy het skeipapiere opgetrek.

Kerry: Ek was nie bewus daarvan nie.


22 Mei 10:51:22

Adv. Susan Galloway ondervra nou vir Kerry Meyer, Rob se dogter.

Galloway: Waar was jou ma met jul vakansies in Hermanus?

Kerry: Sy was daar.

Galloway: So julle was 'n hegte familie?

Kerry: Ja, ons was, maar met verskillende dinamikas. Ek en Nicola (Rob se ander dogter en Kerry se suster) het verskillende verhoudinge met ons ouers gehad.

Galloway: Hoe het jou ma oor die buite-egtelike verhouding gevoel?

Kerry: Sy was platgeslaan en baie seergemaak daardeur.

Galloway: Wat was die tydperk toe hy nie werk gehad het nie?

Kerry: Van 2010 tot sowat einde 2011 - nie seker nie.

Galloway: Daar's getuienis dat jou ma woonstelle in Claremont bestuur het as verblyf.

Kerry: Ja, sy het twee woonstelle gehad.

Galloway: En jou ouers het 'n stuk grond voor haar dood verkoop?

Kerry: Ja, in 2016 - dit was in my ma se naam.

Galloway: Jou ma het onlangs 'n werk gekry.

Kerry: Ja, sy het Januarie 2018 by die skool begin werk.

Galloway: As jou pa vir julle gesorg het, hoekom moes jou ma werk?

Kerry: Sy het die woonstelle geniet en dit het ons finansieel ondersteun terwyl my pa nie werk gehad het nie. Hulle het alles verloor en moes van voor begin. Sy wou ektra geld verdien.

Galloway: So jou pa het nie alleen vir julle gesorg nie. Sy was die een wat die familie finansieel gedra het.

Kerry: Ja, maar net totdat hy werk gekry het, wat net 'n paar maande was.

Galloway: Jy het gesê jou ma het nie na jou pa se ouers se 60ste huweiksherdenking gegaan nie.

Kerry: Sy wou nie gaan nie, daar sou ander familielede wees wat vrae sou vra en sy wou nie vrae beantwoord nie

Galloway: So sy wou nie wrywing veroorsaak nie?

Kerry: Nee.

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.