Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Matrieks
Gedig in Engels-vraestel klip in matrieks se skoolskoen

Nie Dr Jekyll and Mr Hyde nie, maar ’n gedig het Bloemfonteinse matrieks met die letterkunde-vraestel in Engels eerste addisionele taal laat stoei.

Hoewel leerlinge aan die Hoër Meisieskool Oranje sê dié vraestel Woensdagoggend was “lekker”, het heelparty met die vrae oor Jeremy Cronin se gedig To learn how to speak gesukkel.

Leerlinge aan die Hoër Meisieskool Oranje nadat hulle Engels eerste addisionele taal se letterkunde-vraestel geskryf het. Van links is Kayla Kruger, Petri Reinach, Michelle Reynolds, Kira Koegelenberg en Jean-Marie Venter. Foto: Marita Herselman

Die vraestel van twee uur en 70 punte het vier afdelings bevat, waarvan leerlinge ’n vraag uit twee van die afdelings moes beantwoord. Die vraestel het ’n roman-, drama-, kortverhaal- en poësie-afdeling bevat.

Leerlinge wat die roman-afdeling gekies het, moes vrae oor Cry the Beloved Countryof The Strange Case of Dr Jekyll and Mr Hyde beantwoord en by die drama-afdelingtussen Macbeth of My Children! My Africa!kies. Matrieks wat die ander twee afdelings gekies het, het nie ’n keuse gehad wat die teks betref nie.

Leerlinge aan Oranje het vrae oor The Strange Case of Dr Jekyll and Mr Hyde en die poësie-afdeling beantwoord.

Jean-Marie Venter van dié skool het lekker geskryf.

“Jekyll and Hyde was lekker. Ek het net met die een gedig, To learn how to speak, gesukkel. Ek het nie so hard daarvoor geleer nie, maar verder was die vraestel regtig baie maklik.”

Tammy Blair en Erica Moolman van die Hoër Meisieskool Oranje nadat hulle Engels eerste addisionele taal se letterkunde-vraestel geskryf het. Foto: Marita Herselman

Haar klasmaat Kayla Kruger sê To learn how to speak was effens moeilik. Sy sê ook sommige vrae by die roman was uitdagend.

“Oor die algemeen het dit regtig goed gegaan en ek het regtig hard geleer,” sê Kayla.

Kira Koegelenberg sê die vraestel was “orraait”, met die einste gedig wat haar laat sukkel het.

Tammy Blair het nie van die vraestel gehou nie. Sy sê die vraagwyse by To learn how to speak het nie vir haar sin gemaak nie. Sy kon wel die vrae oor die roman gemaklik beantwoord.

Erica Moolman het haar nie laat flous nie en het met haar voorbereiding op dié gedig gefokus en kon die vrae beantwoord.

Dr. Mandie Uys, kenner in Engelsonderrig aan die Noordwes-Universiteit, sê To learn how to speak is ’n moeilike gedig.

“ ’n Mens verwag amper nie dié gedig in ’n vraestel vir eerste addisionele taal nie. ‘A nasty surprise,’ het een onderwyseres vir my gesê.”

Uys sê sommige onderwysers meen die gedig was nie ’n billike keuse vir die gemiddelde tweedetaal-leerling nie.

Sy sê wel leerlinge en onderwysers kan tevrede wees dat kennis van letterkundige beginsels, leesbegrip en interpretasie op ’n uitdagende, dog regverdige wyse getoets is.

“Daar was in die verlede al kere dat leerlinge vrae kon beantwoord sonder om die werke te gelees het.”

Uys sê die vraestel het goeie insig en kennis geverg.

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.