Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Misdaad
Boervrou ‘wat weet van skiet’, weer aanval af

’n Boervrou van Jeffreysbaai het losgebrand op twee vermeende plaasaanvallers en een vier keer in die bors geskiet.

Marlene Ferreira (48) se man, Fanie, sê dit is net omdat sy weet hoe om met ’n vuurwapen te werk dat sy haar man kon staan en die aanval afweer.

Sy was Vrydagaand alleen op die plaas toe twee aanvallers op die huis toeslaan.

Sy en Fanie woon al vir ongeveer 20 jaar op hul plaas in die Kabeljous-distrik, sowat 10 km van Jeffreysbaai, waar hulle met onder meer beeste boer.

Marlene, wat ook in die voorval beseer is, het nie Sondag kans gesien om self met die media te praat nie.

“Dit bly maar ’n lelike ding wat gebeur het, al is sy oukei,” het Fanie gesê en bygevoeg dat sy goed aansterk.

Sy was Vrydagaand alleen in die plaaskantoor net sowat 4 m van die huis, terwyl Fanie elders op die plaas besig was.

Dit was maandeinde en Marlene was agter ’n geslote deur besig om papierwerk af te handel.

Teen omstreeks 20:30 het sy geluide gehoor en twee onbekende mans deur die venster gesien. Hulle het klippe deur die ruite gegooi.

Een man het op haar begin skiet en die ander een het ’n klip deur die venster gegooi en deurgeklim.
Fanie, slagoffer se man.

“Een man het op haar begin skiet en die ander een het ’n klip deur die venster gegooi en deurgeklim. Hy het haar met ’n skroewedraaier geslaan en gesteek,” sê Fanie.

Marlene kon dit regkry om haar 9 mm-pistool in die hande te kry.

“Sy is gelukkig baie bedrewe met haar vuurwapen en weet hoe om daarmee te werk,” sê Fanie.

Marlene het die aanvaller vier keer in die bors geskiet.

Hy het inmekaargesak, waarna sy makker, wat nog buite die venster gestaan het, op Marlene begin skiet het.

Sy het kopgehou en die ligte afgeskakel voordat sy haar aandag op hom gevestig en begin skiet het.

Hy het weggehardloop nadat hy vermoedelik ook raakgeskiet is.

“Ons weet nie wat hulle gesoek het nie, die twee het nie maskers aangehad nie en het amper dadelik begin skiet, daar was nie tyd vir enige eise nie,” sê Fanie.

Sy het kopgehou en die ligte afgeskakel voordat sy haar aandag op hom gevestig en begin skiet het.

Marlene het hom dadelik gebel, waarna die polisie en veiligheidsdienste ontbied is.

Hy sê hy is beïndruk met hoeveel moeite daar gedoen is om na die tweede aanvaller te soek.

“Ons het regtig goeie bystand ontvang. Die boere in die omgewing het met soekligte en hommeltuie na die aanvaller gesoek,” sê Fanie.

Die aanvaller wat in die kantoor geskiet is, is in ’n kritieke toestand hospitaal toe gebring.

“Marlene het steke vir die steekwond gekry en is behandel vir die kneusplekke op haar kop waar sy geslaan is,” sê Fanie.

Kapt. Gerda Swart, ’n polisiewoordvoerder, sê die vermeende aanvaller, van in sy dertigs, sal na verwagting vir nog twee weke in die hospitaal moet bly voordat hy in die hof kan verskyn. ’n Klag van poging tot moord en huisroof word ondersoek.

Die tweede verdagte was teen Sondagmiddag laat nog nie vasgetrek nie.

Enigiemand wat die polisie in die ondersoek kan help, kan die ondersoekbeampte, speur-a.o. Francis Scott, by 082 441 7645 bel.

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.