Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Misdaad
Oproeriges brand 13 Limpopo-skole af
Die Vudzani Secondary School in die Vuwani-gebied in Limpopo is een van 13 skole wat deur betogers afgebrand is. Foto: Rudzani Tshikororo

Altesaam 13 skole in die Vuwani-streek van Limpopo is sedert Sondag afgebrand deur booswigte wat nie deel wil wees van ’n nuwe munisipaliteit nie.

Duisende leerlinge van sowat 50 skole in die gebied kan weens die geweld nie skool bywoon nie. Diegene wat skool wil bywoon, word deur oproerige belhamels geïntimideer.

Lt.kol. Malesela Ledwaba, polisiewoordvoerder in Limpopo, sê nege skole is Dinsdagaand aan die brand gesteek.

“Sedert Sondag is 13 skole heeltemal in brande verwoes. Nóg drie skole is gedeeltelik deur brande beskadig,” het Ledwaba gesê.

Verskeie groot vragmotors wat aan die departement van openbare werke in Limpopo en aan die Makhado-munisipaliteit in Louis Trichardt behoort, is ook aan die brand gesteek.

Vandale het ook ’n satellietpolisiekantoor in die Mashau-gebied en ’n poskantoor naby Levubu aan die brand gesteek.

Die geweld in Vuwani het Sondag uitgebreek nadat die hooggeregshof in Limpopo Vrydag beslis het inwoners het nie grondige redes om die nuwe munisipale afbakenings teen te gaan nie.

Paaie in die gebied, sowat 150 km noordoos van Polokwane, is met groot klippe versper. Oproeriges verhoed voertuie om in of uit die gebied te ry.

Vuwani is nou deel van die Makhado-munisipaliteit in Louis Trichardt. Luidens die voorgestelde nuwe munisipale afbakenings gaan Vuwani ná die verkiesing deel wees van ’n nuwe munisipaliteit wat ook Malamulele sal insluit.

Dr. Naledzani Rasila, woordvoerder van die onderwysdepartement in Limpopo, het by inwoners gepleit om leerlinge toe te laat om skool by te woon.

Phuti Seloba, woordvoerder van die Limpopo- provinsiale regering, het die geweld veroordeel.

“Die afbrand van skole was nog nooit en sal nooit revolusionêr wees nie,” het hy gesê.

Die geweld in Vuwani kom ’n week nadat pres. Jacob Zuma in Giyani tydens Vryheidsdagvieringe gesê het mense moenie hul ontevredenheid wys deur skole, geboue, voertuie en treine af te brand nie.

Hy het gesê die regering sal nié skole wat afgebrand word prioritiseer om herstel te word nie.

Stan Mathabatha, premier van Limpopo, het gesê daar is reeds ’n ernstige geldtekort om skole te herstel.

Meer oor:  Malamulele  |  Skole  |  Munisipaliteit  |  Afgebrand
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.