Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Omgewing
Soektog na boorkewers in Tuinroete se bosse
Prof. Wilhelm de Beer van die Universiteit van Pretoria (naasregs) neem ’n boom af in die botaniese tuin in George terwyl omstanders toekyk. Foto: Jackie Kruger

Dit gaan moeilik wees om te bepaal hoeveel skade ’n uitheemse boorkewer aangerig het aan bome in die boomryke gebiede van Sanparke, soos Tsitsikamma en die Knysnabos, sê prof. Wilhelm de Beer van die Universiteit van Pretoria (UP).

Hy is op ’n tweedaagse besoek aan die Tuinroete om groter duidelikheid te kry oor die spoor van verwoesting wat waarskynlik deur die kewer in George en Knysna gelaat word.

Hy was Donderdag in George vir ’n ondersoek ter plaatse en sal Vrydag Knysna besoek. Hy sal na bome in Knysna kyk en ook Sanparke se personeel toespreek. Sanparke het vroeër gesê hy is bewus van die kewer, Euwallacea fornicatus, maar in dié stadium hou dit nie ’n bedreiging in vir die inheemse bosgebiede in die park nie.

Die George-munisipaliteit het vroeër gesê noodmaatreëls word oorweeg nadat besmetting deur die kewer en sy verwante swam in heelwat groot bome in George aangetref is.

Die kewer deurboor die boom se bas en dra die swam oor na die lewende hout. Dit kan tot besmetting lei wat veroorsaak dat bome kan vrek.

Op ’n vergadering Donderdag met belanghebbendes in George het De Beer onder meer gesê daar is ’n poging om ’n kaart saam te stel van die verspreiding. ’n Lys word saamgestel van die soort bome wat geraak word en die effektiwiteit van insek- en swamdoders. ’n Gifstof kan van Kanada af ingevoer word, maar dit is duur.

Hy sê DNS-monsters van die bome wat moontlik geraak word, sal geneem en getoets word. Die toetse duur sowat drie weke.

Tekens van besmetting wat reeds aan bome in George gewaar is, sluit in klein, opgehewe blou en swart letsels met ’n gaatjie in. Inheemse en uitheemse bome word geraak.

Volgens De Beer het bome in Sandton in Gauteng reeds begin vrek. “Dit is ’n natuurramp.”

Die kewer en sy swam is verlede jaar die eerste keer in die KwaZulu-Natalse Botaniese Tuin gevind. Die kewer is afkomstig van Suidoos-Asië. Dit is ’n indringer in Kalifornië, Israel en Suid-Afrika.

Tekens van besmetting wat reeds aan bome in George gewaar is, sluit in klein, opgehewe blou en swart letsels met ’n gaatjie in. Inheemse en uitheemse bome word geraak.

De Beer het gesê munisipaliteite moet betrokke raak, onder meer om stortingsterreine te identifiseer vir die geaffekteerde hout. Mense kan die besmette hout afsaag en dadelik verbrand.

MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.