Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Onderwys
KYK: Afrikaans nou heel onder op US-kenteken

Kort nadat die Universiteit Stellenbosch (US) Dinsdag sy nuwe kenteken bekend gestel het, het mense vrae begin vra oor hoekom die Afrikaanse woord op die kenteken nou heel onder staan.

Op die nuwe embleem het die Engelse en Afrikaanse woorde “university” en “universiteit” plekke omgeruil, terwyl die Afrikaanse woord voorheen altyd eerste gestaan het.

Op die ou kenteken was die woord “universiteit” in Afrikaans, gevolg deur die Xhosa- en Engelse vertalings: Universiteit – iYunivesithi – University.

Afrikaans laaste. Een stap voordat dit finaal by die agterdeur uitgeskuif word.
Die nuwe US-kenteken, waar die Afrikaans laaste staan. Foto: Verskaf

Op die nuwe embleem is die volgorde omgeswaai met Afrikaans heel onder: University – iYunivesithi – Universiteit.

Dit maak sommige mense warm onder die kraag, veral ná die onlangse omstredenheid oor bewerings dat die gebruik van Afrikaans in sekere koshuise verbied is.

Die ou US-kenteken waarop net Afrikaans en Engels verskyn. Foto: Argief

“Afrikaans laaste. Een stap voordat dit finaal by die agterdeur uitgeskuif word,” skryf een persoon op Facebook.

Die US sê dié verandering is bloot vir grafiese ontwerp en dui nie op ’n rangorde nie.

“Die US is ’n nasionale bate wat inklusiewe meertaligheid nastreef. Die universiteit gebruik die drie landstale van die provinsie waar die instelling geleë is. Meertaligheid verbreed toegang en verryk die leer- en onderrigervaring.

“Dit is egter ’n uitdaging ten opsigte van logo-ontwerp. Die grafiese kunstenaars se kundige advies was dat die langste woord vir goeie balans aan die basis geplaas moet word.

“Die plasing van die tale in die logo dui geensins op ’n rangorde nie – geen van die tale is belangriker as ander nie. Uit ’n simboliese perspektief vorm Afrikaans egter die grondslag omdat dit die oorsprong is waaruit die US ontwikkel het.”

’n Meer onlangse weergawe van die ou kenteken waarby Xhosa ook ingesluit is. Foto: Argief

Die US sê die woord “universiteit” vorm die basis, “iyunivesithi” weerspieël die feit dat die US meer divers raak, en “university” dui op internasionalisering.

“Die komposisie van die woordesamestelling in die nuwe logo verskil grootliks van dié in die ou logo, waar ‘Stellenbosch’ in dieselfde lettertipe-grootte as die universiteitsbewoording is.

“Die pleknaam, Stellenbosch, is groter in die nuwe logo, wat ons onderskei van ander universiteite, en dus moes die komposisie van die bewoording aangepas word.”



MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.