Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Onderwys
US: 2de konsepbeleid beklemtoon belang van Afrikaans
Die Ou Hoofgebou op die kampus van die Universiteit Stellenbosch (US). Foto: Leánne Stander

’n Tweede, nuwe konseptaalbeleid vir die Universiteit Stellenbosch (US) laat aansienlike ruimte vir die gebruik en bevordering van Afrikaans as akademiese taal.

Die tweede konsepbeleid is op die US se webtuiste gepubliseer nadat ’n werkgroep die publiek en belanghebbendes se insette bygewerk het.

Die formulering van die beleid verskil aansienlik van die eerste konsepbeleid met ’n sterk klem daarop om “institusionele en individuele meertaligheid as belangrike onderskeidende eienskappe van die US en sy gegradueerdes te bevorder”.

“Afrikaans het oor dekades heen ’n akademiese repertoire ontwikkel waartoe die US beduidend bygedra het. Die toepassing en verryking van Afrikaans se akademiese potensiaal is ’n instrument om ’n groot en diverse gemeenskap in Suid-Afrika te bemagtig,” lui die konsepbeleid. “Sprekers van die onderskeie Suid-Afrikaanse tale gebruik Engels om met mekaar te kommunikeer, en Engels het beduidende akademiese, bedryfs-, en internasionale waarde. Daarom gebruik die US Engels deurlopend – maar nie uitsluitlik nie – in sy akademiese, maatskaplike, administratiewe en professionele kontekste.”

Soortgelyk aan die eerste konsepbeleid bepaal die dokument dat parallelmedium voortaan in voorgraadse kursusse gebruik word – dus sal daar aparte lesings in Afrikaans en Engels wees. Waar hulpbronne en praktiese oorwegings parallelmediumonderrig verhoed, sal dubbelmediumonderrig gebruik word. In dié klasse sal inligting in Engels oorgedra word en, waar daar genoeg tyd is, in Afrikaans herhaal word. Beklemtoonde dele of opsommings sal ook in Afrikaans voorsien word, en vrae in Afrikaans sal in Afrikaans beantwoord word.

Intydse tolkdienste in dubbelmedium-eerstejaarmodules sal waar moontlik gebied word. Tolkdienste sal ook gebruik word waar ’n betrokke dosent in dubbelmediummodules slegs Afrikaans óf Engels magtig is. In nagraadse kursusse kan enige taal gebruik word, mits almal die leerstof kan verstaan.

Fakulteite mag slegs van die taalbeleid afwyk met die goedkeuring van die betrokke fakulteitsraad en die senaat. Die onderskeie fakulteite, bestuurstrukture en studenteraad moet een keer per jaar ’n verslag indien wat die struikelblokke, asook voorstelle vir verbeterings van die beleid uiteensit.

Die beleid bepaal ook dat die US die akademiese potensiaal van Afrikaans moet versterk deur onder meer onderrig, navorsing, simposiums, kortkursusse en steun aan taalonderwysers en gasdosente in Afrikaans. Die US verbind hom daartoe om Afrikaans te bevorder deur die belegging in parallelmediumonderrig, onderrig in Afrikaans tydens dubbelmediumlesings, die beskikbaarstelling van onderrighulp in Afrikaans, die vertaling van leermateriaal in Afrikaans en die aanbieding van Afrikaanse taalverwerwingskursusse vir studente.

Voorts sal die US ook volhou met die ontwikkeling van akademiese en professionele geletterdheid in Afrikaans, taaldienste wat vertaling, redigering en dokumentontwerp in Afrikaans insluit, die ontwikkeling van meertalige woordelyste met Afrikaans as een van die tale, en die bevordering van Afrikaans deur populêr-wetenskaplike publikasies in die algemene media.

Wat van leermateriaal?

Die tweede konsepbeleid bepaal dat alle verpligte leesstof in Engels voorsien word, behalwe waar die aard van die module oor die taal self handel.

Verpligte leesstof sal ook in Afrikaans voorsien word, indien geregverdig deur die aantal studente wat daarby sou baat vind, die omvang van die voordeel en die tyd wat personeel sou benodig om die Afrikaanse weergawes voor te berei.

Moduleraamwerke en studiegidse wat deur die US voorberei word, sal in Afrikaans en Engels beskikbaar wees.

Die vraestelle vir toetse, eksamens en ander samevattende assesserings is in Afrikaans en Engels beskikbaar. 

Studente mag alle assesserings in Afrikaans óf Engels beantwoord en alle geskrewe werk in Afrikaans óf Engels inlewer.

Die bevordering van akademiese materiaal in Afrikaans, Engels en Xhosa sal deur die progressiewe ontwikkeling van meertalige woordelyste en ander akademiese materiaal gesteun word.



MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ‘n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar hierdie is nie ‘n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier

Stemme

Hallo, jy moet ingeteken wees of registreer om artikels te lees.