Lees jou gunsteling-tydskrifte en -koerante nou alles op een plek teen slegs R99 p.m. Word 'n intekenaar
Politiek
EU sal nié militêr ingryp in Mosambiek; SAOG dink nog

Die Europese Unie (EU) sê hy sal beslis nie op militêre gebied betrokke raak by die stryd teen Moslem-militante in die noordelike Cabo Delgado-provinsie in Mosambiek nie.

Intussen is die Suider-Afrikaanse Ontwikkelingsgemeenskap (SAOG) besig om ’n “omvattende streekplan” te finaliseer om Mosambiek by te staan.

Dit kom nadat die sogenaamde troika van die SAOG Vrydag in Gaborone, Botswana, vergader het.

Pres. Cyril Ramaphosa, Zimbabwe se pres. Emmerson Mnangagwa, Botswana se pres. Mokgweetsi Masisi, die Demokratiese Republiek van die Kongo se pres. Félix Tshisekedi, Malawi se pres. Lazarus Chakwera en Tanzanië se adj.pres. Samia Hassan het die vergadering bygewoon.

Pres. Filipe Nyusi van Mosambiek het nie die vergadering bygewoon nie en die land se minister van verdediging, Jaime Neto, het hom verteenwoordig.

Die plan wat die SAOG nou saamstel, moet later op ’n spesiale leiersberaad goedgekeur word.

Meer as 2 000 mense het al in die geweldpleging in Cabo Delgado gesterf.

Mosambiek het die EU ook vroeër om hulp gevra. Hoewel die EU besluit het om nie militêr in te gryp nie, is hy bereid om die Mosambiekse regering op logistieke gebied en met spesialis-opleiding van die land se weermag te help.

“Militêre ondersteuning is nie op die (EU se) agenda nie. Ons sal slegs Mosambiek se kapasiteit verbeter sodat sy eie veiligheidsmagte in staat is om die insurgente te stuit,” het Antonio Sánchez-Benedito Gaspar, die EU se ambassadeur in Mosambiek, volgens die webwerf Club of Mozambique, gesê.

Die EU, wat uit 27 lidlande bestaan, het reeds €15 miljoen hiertoe bygedra. Dit sluit onder meer ook humanitêre hulp aan die sowat 500 000 mense in wat uit hul huise gevlug het sedert die militantes in 2017 dié olie- en gasryke provinsie binnegesypel het.

Die Internasionale Rooi Kruis lewer humanitêre hulp in die Cabo Delgado-provinsie in die noorde van Mosambiek. Foto: Rooi Kruis

Portugal, die voormalige koloniale heerser van Mosambiek, is ’n lid van EU.

Verteenwoordigers van die EU het verlede maand in Mosambiek met verteenwoordigers van dié land se ministerie van buitelandse sake vergader om die politieke, ekonomiese en maatskaplike situasie in Suid-Afrika se noordoostelike buurland te bespreek.

Verskeie Europese lande het belange aan die kus van Cabo Delgado.

Mosambiek het vroeër erken die optrede van die Moslem-militantes – sowel as die teenwoordigheid van vegters van die opposisie Renamo – maak dit baie moeilik om behoorlike openbare dienste aan die inwoners daar te lewer.

Kundiges meen egter die feit dat die Frelimo-regering Cabo Delgado oor baie jare heen afgeskeep het, het daartoe bygedra dat die militantes daar vastrapplek gekry het.

Meer oor:  Politiek  |  Mosambiek  |  Saog  |  Terreur  |  Isis  |  Eu
MyStem: Het jy meer op die hart?

Stuur jou mening van 300 woorde of minder na MyStem@netwerk24.com en ons sal dit vir publikasie oorweeg. Onthou om jou naam en van, ‘n kop-en-skouers foto en jou dorp of stad in te sluit.

Ons kommentaarbeleid

Netwerk24 ondersteun ’n intelligente, oop gesprek en waardeer sinvolle bydraes deur ons lesers. Lewer hier kommentaar wat relevant is tot die onderwerp van die artikel. Jou mening is vir ons belangrik en kan verdere menings of ondersoeke stimuleer. Geldige kritiek en meningsverskille is aanvaarbaar, maar dit is nie 'n platform vir haatspraak of persoonlike aanvalle nie. Kommentaar wat irrelevant, onnodig aggressief of beledigend is, sal verwyder word. Lees ons volledige kommentaarbeleid hier.

Stemme

Hallo, jy moet ingeteken wees of registreer om artikels te lees.