Die joernalis Pinky Khoabane ontken dat sy sedert 2012 geld van Bosasa ontvang het om positiewe berigte oor die maatskappy te skryf.
Pinky KhoabaneFoto: Twitter
Angelo Agrizzi het in sy getuienis voor die Zondo-kommissie die vinger na Khoabane gewys as een van die joernaliste wat omkoopgeld vir positiewe publisiteit oor Bosasa ontvang het.
In ’n onderhoud Maandag met die radiostasie Power FM het Khoabane dit egter ontken. Sy het in die onderhoud gesê sy het in Oktober verlede jaar ’n opname ontvang waarin Agrizzi uitvaar teen onder andere Adriaan Basson, hoofredakteur van News24, en Derek Watts van Carte Blanche. Volgens Khoabane het City Press ’n artikel oor die opname gepubliseer, maar nagelaat om Basson of Watts se name daarin te noem. Khoabane sê sy het Bosasa gekontak om daaroor met hul woordvoerder, Papa Leshabane, te praat. “Ek het ’n e-pos as bewys.” Leshabane het volgens haar bevestig dat die opname bestaan.
Agrizzi het Maandag getuig Leshabane het Khoabane, ’n rubriekskrywer vir die Sunday Times, en twee ander joernaliste, ene “Bongs” van die Oos-Kaap en “Ntuli”, wat na bewering vir The Star of die Sunday Times werk, betaal.zondo
In reaksie op Khoabane se bewerings het Basson getwiet dat Khoabane sedert verlede jaar leuens oor hom verkoop. “Ek vind meneer Agrizzi se getuienis dat sy na bewering deur Bosasa betaal is om my te diskrediteer, interessant. Ek sal dit verder ondersoek,” het Basson getwiet.
